សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ យោងតាមរបាយការណ៍របស់ក្រុមហ៊ុន ក្រេឌីតប្យូរ៉ូ ខេមបូឌា ( CBC ) បានបង្ហាញថា គិតត្រឹមដើមខែកក្កដា ២០២៤ ចំនួនគណនីឥណទានមានលក្ខណៈបុគ្គលនៅទូទាំងប្រទេសកើនឡើងដល់ចំនួនជាង ១,៩២លានគណនី ដោយក្នុងនោះចំនួនគណនីនៃកម្ចីអចលនទ្រព្យមានប្រមាណ ១០,៥៩ភាគរយ ដែលមានចំនួនតិចតួច ។
របាយការណ៍ដដែលបានបង្ហាញផងដែរពីសមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានចំនួនរហូតដល់ ១៥,៣១ពាន់លានដុល្លារអាមេរិក ហើយសម្រាប់ទំហំកម្ចីក្នុងវិស័យអចលនទ្រព្យមានទំហំរហូតដល់ជាងកណ្ដាលនៃសមតុល្យឥណទានមានលក្ខណៈសម្រាប់ប្រើប្រាស់ផ្ទាល់ខ្លួន ដោយមានទំហំរហូតដល់ ៥២,៩២ភាគរយ ។
បើតាមលោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុន ក្រេឌីតប្យូរ៉ូ ខេមបូឌា បានមានប្រសាសន៍ថា តម្រូវការពាក្យស្នើសុំឥណទានបុគ្គលសម្រាប់ប្រើប្រាស់ផ្ទាល់ខ្លួនមានការថយចុះ ប៉ុន្តែសមិទ្ធផលឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួននៅតែវិជ្ជមាន ជាមួយចំនួនគណនី និងសមតុល្យ ។
អ្នកនាង លាវ ហ្គេចលាង មន្ត្រីទំនាក់ទំនងនៃក្រុមហ៊ុន ក្រេឌីតប្យូរ៉ូ ខេមបូឌា បានប្រាប់ AMS Economy នៅរសៀលថ្ងៃទី២០ ខែកញ្ញា ឆ្នាំ២០២៤ ឱ្យដឹងថា កម្ចីអចលនទ្រព្យដែលអតិថិជនបានដាក់ពាក្យស្នើសុំយកទៅប្រើប្រាស់រួមានដូចជា កម្ចីទិញផ្ទះ ទិញដី អគារ និងកម្ចីសម្រាប់បើកអាជីវកម្មហាងជាដើម ។
យ៉ាងណាក្ដី បើតាមអ្នកជំនាញនៃវិស័យអចលនទ្រព្យ លោក គាម សៀកឡុង អគ្គនាយកក្រុមហ៊ុនអចលនទ្រព្យ Dream Property បានមានប្រសាសន៍ថា ទីផ្សារអចលនទ្រព្យក្នុងប្រទេសសម្រាប់ការវិនិយោគមិនសូវមានច្រើនទេគិតចាប់តាំងពីក្រោយវិបត្តិកូវីដ១៩មក ប៉ុន្តែបើសិនជាតួលេខដែលផ្ដល់ដោយក្រុមហ៊ុន CBC ជាក់លាក់ពិតមែននោះ វាគឺជាសញ្ញាល្អសម្រាប់វិស័យនេះទាំងមូល ។
លោកបន្តថា ៖
« មែនទែនទៅ វិស័យអចលនទ្រព្យ សម្រាប់អ្នកដែលមានតម្រូវការពិតប្រាកដនៅតែមានការទិញ – លក់ ហើយបើសិនជាម្ចាស់អចលនទ្រព្យដែលដាក់លក់ក្រោមទីផ្សារ ក៏មានការទិញលក់ច្រើនដែរ ព្រោះនោះគឺជាឱកាសដ៏ល្អសម្រាប់អ្នកមានលុយមានទុនសម្រាប់ទិញទិញអភិវឌ្ឍន៍ឬវិនិយោគនៅពេលអនាគតខាងមុខនេះ ។ បច្ចុប្បន្ននេះ អចលនទ្រព្យដែលមានទីផ្សារល្អ គឺជាប្រភេទអចលនទ្រព្យដែលមានតម្រូវការប្រើប្រាស់ជាក់ស្ដែង ប៉ុន្តែសម្រាប់អចលនទ្រព្យប្រភេទវិនិយោគ គឺមិនទាន់មានសកម្មភាពកម្រើកដូចមុននោះទេ ដោយសារតែពីមុនមានការវិនិយោគច្រើន ដែលធ្វើឱ្យចាល់ទីផ្សារមកដល់បច្ចុប្បន្ន» ។
បើតាមអ្នកអភិវឌ្ឍន៍ដីឡូត៍ និងលំនៅឋាននៅតំបន់ជាយក្រុង បានបង្ហើបឱ្យដឹងថា ពេលនេះជាពេលដែលចម្រាញ់យកអ្នកណាជាអ្នកអភិវឌ្ឍន៍ពិត អ្នកណាជាអ្នកមានតម្រូវការទិញអចលនទ្រព្យពិតប្រាកដ ។ បន្ទាប់ពីស្ងប់ស្ងាត់វិបត្តិកូវីដ១៩ មានអតិថិជនស្វែងរកទិញដីឡូត៍ និងផ្ទះជាហូរហែរ ហើយពួកគេ ទិញហើយមិនលក់ដូរទៀតទេ គឺទិញសម្រាប់សង់ផ្ទះនៅ (សម្រាប់ដីឡូត៍) និងទិញសម្រាប់ស្នាក់នៅ ឬធ្វើអាជីវកម្មតែម្ដង (សម្រាប់លំនៅឋាន) ខុសពីមុន ដែលការទិញ-លក់មានចំនួនច្រើន ប៉ុន្តែអ្នកដែលទិញទាំងនោះ មិនមែនជាអ្នកដែលមានតម្រូវការពិតប្រាកដទេ គឺគេទិញសម្រាប់ទុកលក់បន្តយកចំណេញប៉ុណ្ណោះ ហើយម្នាក់ៗបានទិញច្រើនប្លង់ ទិញច្រើនផ្ទះ ដើម្បីត្រៀមលក់បន្ត លុះដល់ពេលសេដ្ឋកិច្ចធ្លាក់ចុះ ពួកគេក៏ត្រូវជួបបញ្ហាបង្វិលទុនមិនទាន់ ដែលធ្វើឱ្យទីផ្សារអចលនទ្រព្យមានបញ្ហាបន្ថែមមួយកម្រិតទៀត៕
Account
Security
Favourite Content