ការតាំងពិព័ណរ៍ ឬកម្មវិធីដាក់តាំងបង្ហាញផលិតផល ជាឱកាសមួយសម្រាប់ម្ចាស់អាជីវកម្មក្នុងស្រុកដាក់លក់ និងតាំងបង្ហាញផលិតរបស់ខ្លួន ដើម្បីឱ្យអ្នកដែលមកចូលរួមទស្សនា ឬក៏អតិថិជនបានឃើញ ក៏ដូចជាយល់ពីអត្ថប្រយោជន៍ និងចំណុចពិសេសរបស់ផលិតតាំងនោះ។ ក្នុងនោះ អ្នកជំនាញ ក៏បានលើកឡើងពីចំណុចសំខាន់ៗមួយចំនួនដែលម្ចាស់អាជីវកម្មគួរដឹងនៅពេលយកផលិតផលទៅដាក់តាំងបង្ហាញ។

លោកបណ្ឌិត សួង ណយ អគ្គលេខាធិការរង គណៈកម្មាធិការជាតិជំរុញចលនាភូមិមួយផលិតផលមួយ នៃទីស្តីការគណៈរដ្ឋមន្ត្រីបានលើកឡើងពីចំណុចសំខាន់ៗនៅពេលយកផលិតផលទៅតាំងបង្ហាញលក់ផលិតផល។

ទីមួយគឺ អាជីវករត្រូវនិយាយរៀបរាប់ឱ្យអ្នកទិញស្ដាប់ ដោយបង្ហាញពីគុណសម្បតិ្ត អត្ថប្រយោជន៍របស់ផលិតផលរបស់ខ្លួនឱ្យក្បោះក្បាយ ពីមួយចំណុចទៅមួយចំណុច ដើម្បីជាព័ត៌មាន និងទាក់ទាញអតិថិជនឱ្យចាប់អារម្មណ៍លើផលិតផល។ បន្ថែមលើនេះ អាជីវករក៏ត្រូវប្រាប់ពីរបៀបប្រើប្រាស់ និងផ្ដល់ជាឯកសារ អត្ថាធិប្បាយអំពីផលិតផលនីមួយទៅតាមប្រភេទ បរិមាណ ឬចំណុះឱ្យបានគ្រប់គ្រាន់ផងដែរ។

ទីពីរ ម្ចាស់អាជីវកម្មត្រូវនាំយកនូវផលិតផលឱ្យអ្នកទិញបានឃើញផ្ទាល់នឹងភ្នែកថាតើផលិតផលនោះមានរូបរាងបែបណា បានកាន់ផ្ទាល់ដៃ ដើម្បីបង្កើនទំនុកចិត្តពីអតិថិជន ដែលគាត់បានឃើញ បានស្ទាប។ ក្រៅពីនេះ អតិថិជនក៏ត្រូវការសាកល្បងនូវគុណភាពផលិតផលជាមុន មិនថា​តាមរយៈការហិតក្លិន ឬការភ្លក្សរសជាតិនោះទេ ដែលទាមទារឱ្យអ្នកលក់គួរមានផលិតផលគំរូ (sample) គ្រប់ផលិតផងដែរ។   

ចុងក្រោយ បន្ទាប់ពីបានឃើញ បានស្គល់ និងបានភ្លក្សរួចហើយ គេក៏ត្រូវការព័ត៌មានទាក់ទងនឹងតម្លៃ អាសយដ្ឋានទាក់ទង គឺរឹតតែសំខាន់សម្រាប់អតិថិជនងាយស្រួលស្វែងរកព័ត៌មាននៅថ្ងៃក្រោយ ឬនៅពេលណាដែលគេចង់ទាក់ទងទិញផលិតផល។

ជារួមមក ម្ចាស់អាជីវករទាំងអស់ត្រូវមានការយកចិត្តទុកដាក់ ក៏ដូចជាត្រៀមលក្ខណៈឱ្យបានគ្រប់ជ្រុងជ្រោយ ដើម្បីពន្យល់បង្ហាញដល់អតិថិជន ចៀសវាងភ្លេចភ្លាំងចំណុចណាមួយ ឬខ្វះខាតសម្ភារអ្វី ដែលធ្វើឱ្យខាតបង់ឱកាសក្នុងផ្សព្វផ្សាយផលិតផលរបស់ខ្លួន៕