ភ្នំពេញ ៖ អត្រាប្តូរប្រាក់រៀលធៀបនឹងដុល្លារអាមេរិកនៅឆ្នាំ២០២៣ បន្តមានស្ថិរភាពបើទោះបីមានកម្រិតខ្ពស់បន្តិចធៀបនឹងគ្រាមុនមានវិបត្តិកូវីដ១៩ ក៏ដោយ។ អត្រាប្តូរប្រាក់រៀលធៀបនឹងដុល្លារអាមេរិកមានកម្រិតជាមធ្យម ៤ ១១០ រៀលក្នុងមួយដុល្លារអាមេរិក ដោយប្រាក់រៀលបានថយថ្លៃ ០,២% ធៀបនឹងឆ្នាំមុន (៤ ១០២រៀល) និង ១,៤% ធៀបនឹងគ្រាមុនវិបត្តិ ២០១៦-២០១៨ (៤ ០៥២រៀល)។ នេះបើយោងតាមរបាយការណ៍របស់ធនាគារជាតិនៃកម្ពុជា។

របាយការណ៍បានឱ្យដឹងទៀតថា ចាប់ពីខែឧសភា រហូតមក អត្រាប្តូរប្រាក់បានកើនឡើងជាលំដាប់ និងកើនឡើងដល់ ៤ ១៥៨ រៀលក្នុងមួយដុល្លារអាមេរិក នៅចុងខែសីហា ដែលជាចម្បងបណ្តាលមកពីការថយចុះចំណូលពន្ធ ការកើនឡើងចំណាយសាធារណៈ កម្រិតទាបនៃលំហូរចូលប្រាក់ដុល្លារអាមេរិក និងការឡើងថ្លៃនៃប្រាក់ដុល្លារអាមេរិកនៅទីផ្សារអន្តរជាតិ។

ដើម្បីកាត់បន្ថាយសម្ពាធថយថ្លៃនេះ ធនាគារជាតិនៃកម្ពុជាបានធ្វើអន្តរាគមន៍លើទីផ្សារប្តូរប្រាក់ និងប្រើប្រាស់ឧបករណ៍នយោបាយរូបិយវត្ថុផ្សេងៗទៀត ដែលធ្វើឱ្យអត្រាប្តូរប្រាក់បានថយចុះមកវិញមកត្រឹម ៤ ០៨១ រៀលក្នុងមួយដុល្លារអាមេរិកនៅចុងខែធ្នូ ឆ្នាំ២០២៣កន្លងមកនេះ។ ចំណែករូបិយប័ណ្ណប្រទេសដៃគូពាណិជ្ជកម្មសំខាន់របស់កម្ពុជាមួយចំនួនបានថយថ្លៃគួរកត់សម្គាល់ធៀបនឹងដុល្លារអាមេរិក ដូចជា យ៉េនជប៉ុន (-៩%) យ៉ន់ចិន (-៦,៧%) បាតថៃ (-១,៤%) ដុងវៀតណាម (-២,៦%) និងផោនអង់គ្លេស (-១,៣%) ខណៈប្រាក់អឺរ៉ូកើនឡើងបន្តិច (០,៨%)។

លោជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានថ្លែងថា កម្ពុជារក្សាបានតម្លៃប្រាក់រៀលធៀបនឹងដុល្លារអាមេរិកឱ្យមានស្ថិរភាពល្អប្រសើរ ដោយមានអត្រាប្រែប្រួលទាបជាង ២% ប៉ុណ្ណោះធៀបនឹងការប្រែប្រួលតម្លៃរូបិយប័ណ្ណនៅប្រទេសមួយចំនួន ដូចជា ប្រាក់យ៉េនជប៉ុនធ្លាក់ថ្លៃ ៩% យ៉ន់ចិនធ្លាក់ថ្លៃ ៦,៧% និងគីបឡាវធ្លាក់ថ្លៃ ២៩,៨% ក្នុងស្ថានភាពដែលប្រាក់ដុល្លារអាមេរិកបានកើនឡើងក្រោមឥទ្ធិពលនៃដំឡើង និងរក្សាអត្រាការប្រាក់គោលក្នុងកម្រិតខ្ពស់។

លោជំទាវបណ្ឌិត ជា សិរី បានថ្លែងថា ៖

“ស្ថិរភាពអត្រាប្តូរប្រាក់ បានរួមចំណែកយ៉ាងសំខាន់ក្នុងការពង្រឹងជំនឿទុកចិត្តវិនិយោគិនគ្រប់គ្រងសម្ពាធអតិផរណាបានមួយផ្នែក ក៏ដូចជារក្សាស្ថិរភាពម៉ាក្រូសេដ្ឋកិច្ច”។

អត្រាប្តូរប្រាក់ត្រូវបានសេដ្ឋវិទូចាត់ទុកជាសូចនាករមួយបង្ហាញពីសុខភាពសេដ្ឋកិច្ច ដូចដែលអតីតនាយកគ្រប់គ្រងរបស់មូលនិធិរូបិយវត្ថុអន្តរជាតិ លោក Per Jacobson ធ្លាប់បានលើកឡើងថា «ការលើកម្ពស់តម្លៃរូបិយវត្ថុជាតិឱ្យបានល្អ ជាការងារអាទិភាពនៃការកសាងមូលដ្ឋានអភិវឌ្ឍន៍សេដ្ឋកិច្ចជាតិ»។

លោជំទាវបណ្ឌិត បានលើកឡើងថា ការរក្សាបានស្ថិរភាពអត្រាប្តូរប្រាក់រៀលធៀបនឹងដុល្លារអាមេរិក ជាចម្បងអាស្រ័យដោយការអនុវត្តនយោបាយរូបិយវត្ថុប្រកបដោយភាពប្រុងប្រយ័ត្ន តាមរយៈការគ្រប់គ្រងចរាចរណ៍ប្រាក់រៀលសមស្រប និងការធ្វើអន្តរាគមន៍លក់ប្រាក់ដុល្លារអាមេរិកនៅលើទីផ្សារប្តូរប្រាក់តាមការចាំបាច់។ ការងារនេះអាសម្រេចទៅបាន ដោយសារការរក្សាបានកម្រិតខ្ពស់គ្រប់គ្រាន់នៃទុនបម្រុងអន្តរជាតិ ដែលបានកើនឡើងដល់ប្រមាណ ២០ ពាន់លានដុល្លារអាមេរិក ពោលគឺបានកើនឡើង ១២,៣% ធៀបនឹងឆ្នាំ២០២២ និងស្មើនឹងជាង ៧ខែ នៃការនាំចូលទំនិញ និងសេវានាគ្រាបន្ទាប់។  

ដោយឡែក ជុំវិញប្រតិបត្តិការប្តូរប្រាក់នៅលើផ្លែតហ្វម NBCP របស់ធនាគារជាតិនៃកម្ពុជា ដែលត្រូវបានបង្កើតឡើងនៅក្នុង២០១៨ មកដល់បច្ចុប្បន្ននេះ មានសមាជិកជួញដូរក្នុងប្រព័ន្ធចំនួន ៦៩ គ្រឹះស្ថាន រួមមាន ៖ ធនាគារពាណិជ្ជ ៥០ ធនាគារឯកទេស ៤ គ្រឹះស្ថានមីក្រូហិរញ្ញវត្ថុ ១០ និងអាជីវកម្មប្តូរប្រាក់ចំនួន ៥។ ប្រតិបត្តិការជួញដូរប្រាក់ដុល្លារអាមេរិកក្នុងផ្លែតហ្វម NBCP បានកើនឡើងជាលំដាប់ពីឆ្នាំ២០១៨ រហូរឆ្នាំ២០២២ តែបានថយចុះ -៤% មកប្រមាណ ១,៨ ពាន់លានដុល្លារអាមេរិកនៅឆ្នាំ២០២៣នេះ (បើទោះជាចំនួនប្រតិបត្តិការជួញដូរមាន ១ ៤៤៣ ប្រតិបត្តិការប្រហាក់ប្រហែលនឹងឆ្នាំ២០២២)។ ការថយនេះ បណ្តាលមកពីការថយចុះតម្រូវការទិញ-លក់ប្រាក់ដុល្លារអាមេរិក និងការធ្វើអន្តរាគមន៍លើទីផ្សារប្តូរប្រាក់របស់ធនាគារជាតិនៃកម្ពុជា។

គួររំលេចផងដែរថា ក្នុងឆ្នាំ២០២៣ ធនាគារជាតិនៃកម្ពុជាបានធ្វើអន្តរាគមន៍លើទីផ្សារប្តូរប្រាក់ចំនួន ១២ លើកដោយលក់ប្រាក់ដុល្លារអាមេរិកសរុបចំនួន ១៣៩,១ លានដុល្លារអាមេរិក នៅគ្រឹះស្ថានធនាគារនិងហិរញ្ញវត្ថុ និងអាជីវករប្តូរប្រាក់ធៀបនឹងការលក់ ៩ លានដុល្លារអាមេរិកកាលពីឆ្នាំមុន។ ការសម្រេចធ្វើអន្តរាគមន៍នេះគឺដើម្បីរក្សាស្ថិរភាពតម្លៃប្រាក់រៀល និងការពារអំណាចទិញនៃចំណូលរបស់ប្រជាជន បន្ទាប់ពីអត្រាប្តូរប្រាក់រៀលធៀបនឹងដុល្លារអាមេរិកឡើងខ្ពស់ជាងនិន្នាការកន្លងមកគួរឱ្យកត់សម្គាល់៕