ភ្នំពេញ ៖ លើសពីប្រភេទផ្លែឈើ ជាម្ជូរ ឬច្នៃជាម្ហូបអាហារ និងភេសជ្ជៈដ៏មានឱជារស ផ្លែម្នាស់ ដែលមានរសជាតិជូរអែម ត្រូវបានគេយកទៅកែច្នៃជាផលិតផលនៃទឹកសាប៊ូលាងចានដ៏មានប្រសិទ្ធភាព ដែលកំពុងទទួលបានការសាទរ និងគាំទ្រពីសំណាក់ប្រជាពលរដ្ឋក្នុងស្រុកគួរឱ្យកត់សម្គាល់។

អ្នកស្រី នុត សម្ផស្ស គ្គនាយិការក្រុមហ៊ុន LSV Industry ដែលគេស្គាល់ជាក្រុមហ៊ុនកែច្នៃ និងបង្កើតផលិតផលថ្មីៗក្នុងស្រុកបានលើកឡើងថា ផលិតផលទឹកសាប៊ូលាងចានដែលកែច្នៃចេញពីផ្លែម្នាស់នេះមានឈ្មោះថា រីន (Rins) ហើយជាមោទនភាព ទោះជាផលិតផលថ្មី កែច្នៃ និងផលិតឡើងក្នុងស្រុក ប៉ុន្តែទទួលបានការគាំទ្រច្រើនពីសំណាក់មហាជន។

អ្នកស្រីបានបញ្ជាក់ថា ៖

«មានហេតុផលជាច្រើនដែលធ្វើឱ្យនាងខ្ញុំកែច្នៃម្នាស់មកជាទឹកលាងចាន និងផលិតផលផ្សេងៗទៀត ព្រោះម្នាស់មានសមាសធាតុល្អៗជាច្រើន ម៉្យាងទៀតវាក៏ការចូលរួមបង្កើតទីផ្សារបន្ថែមសម្រាប់បងប្អូនកសិករ ផងដែរ ជាក់ស្ដែងយើងប្រមូលទិញញផ្លែម្នាស់ណាដែលមិនសូវល្អ ផ្លែតូច មិនត្រូវតាមស្តង់ដារទីផ្សារ ដែលអាចនឹងសល់ចោល ឬលក់សម្រាប់ធ្វើជីក្នុងតម្លៃទាប»។

អ្នកស្រីបន្ថែមថា ៖

«ទោះបីនេះជាផលិតថ្មី តែតាមរយៈការចេញផ្សព្វផ្សាយលើបណ្ដាញសង្គម និងការចែករំលែក (Share) បន្តគ្នា ឃើញថាមានអ្នកនិយមគាំទ្រច្រើន ហើយយើងក៏រំពឹងទុកថា វានឹងមានការគាំទ្រច្រើនពីសំណាក់អ្នកប្រើប្រាស់កាន់តែច្រើនថែមទៀត ជាពិសេសអ្នកនិយមប្រើប្រាស់ផលិតផលក្នុងស្រុក និងផលិតច្នៃពីកសិផលធម្មជាតិផ្ទាល់តែម្ដង ដោយទឹកលាងចានម្នាស់ រីន មានចំណុះ ១២០០មីលីលីត្រ លក់ក្នុងតម្លៃ ៥០០០រៀលប៉ុណ្ណោះ»។

ពាក់ព័ន្ធទៅនឹងដំណើរការនៃសង្វាក់ផលិតកម្មទឹកលាងចានម្នាស់ រីន អ្នកស្រីបានបញ្ជាក់ថា បច្ចុប្បន្ននេះ អ្នកស្រីបានសហការជាមួយសហគមន៍មួយស្ថិតនៅក្នុងស្រុកម៉ោងឫស្សី ខេត្តបាត់ដំបងដែលជាអ្នកផ្គត់ផ្គង់ផ្លែម្នាស់យ៉ាងទៀងទាត់ ហើយម្នាស់ដែលត្រូវបានយកមកកែច្នៃ និងផលិតជាទឹកលាងចាននេះ ភាគច្រើនជាម្នាស់ដែលមិនមានតម្រូវការទីផ្សារ ដូចជាម្នាស់ដែលមានទំហំតូចៗជាដើម។

ចំពោះអត្ថប្រយោជន៍របស់ទឹកលាងចានម្នាស់ រីន ក៏អាស្រ័យលើលក្ខណៈសម្បត្តិនៃការសម្អាតបែបធម្មជាតិ ធ្វើឱ្យមានសុវត្ថិភាពសម្រាប់អ្នកប្រើប្រាស់ និងបរិស្ថាន ដូចជា Bromelain ដែលជាអង់ស៊ីមនៅក្នុងម្នាស់ ជួយបំបែកប្រូតេអ៊ីន និងសំណល់អាហារ ធ្វើឱ្យវាកាន់តែងាយស្រួលក្នុងការសម្អាតចាន។ អាស៊ីតធម្មជាតិនៃទឹកម្នាស់ក៏អាចជួយរំលាយជាតិខាញ់ និងស្នាមប្រឡាក់ ដែលធ្វើឱ្យចានស្អាត និងភ្លឺចាំង។ ទឹកលាងចានម្នាស់ត្រូវបានផលិតឡើងដោយមានសារធាតុផ្សំពីផ្លែឈើធម្មជាតិ គ្មានជាតិពុល មានសុវត្ថិភាពសម្រាប់គ្រួសារ ជាពិសេសកន្លែងដែលមានកុមារ ឬសត្វចិញ្ចឹម ព្រោះវា​គ្មាន​ជាតិ​គីមី​អាក្រក់ មានក្លិនក្រអូប ប្រឆាំងនឹងបាក់តេរី។ ជារួម ទឹកលាងចានម្នាស់រួមបញ្ចូលគ្នានូវការលាងសម្អាតប្រកបដោយប្រសិទ្ធភាពជាមួយនឹងអត្ថប្រយោជន៍យ៉ាងច្រើន ដែលធ្វើឱ្យវាក្លាយជាជម្រើសដ៏ល្អសម្រាប់អ្នកដែលកំពុងស្វែងរកដំណោះស្រាយទឹកលាងចានធម្មជាតិ សុវត្ថិភាព និងល្អសម្រាប់បរិស្ថានថែមទៀតផង៕