សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមបច្ចុប្បន្ននេះ ការងារវាស់វែង និងចុះបញ្ជីដីធ្លីនៅក្នុងប្រទេសកម្ពុជាសម្រេចបានប្រមាណ ២លាន ៣សែនក្បាលដីបន្ថែមពីលើក្បាលដីដែលបានចុះបញ្ជីកាលពីអាណត្តិមុនៗ និងបានធ្វើឱ្យដីធ្លីដែលមិនទាន់ចុះបញ្ជីមានកាន់តែតិចទៅៗ ដូច្នេះកម្ពុជានឹងអាចបំបែកកំណត់ត្រាប្រវត្តិសាស្ត្ររបស់ខ្លួន ដែលបានចុះបញ្ជីដីធ្លីនៅទូទាំងប្រទេសបាន១០០ភាគរយ ។ នេះបើតាមប្រសាសន៍ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងក្នុងពិធីបើកពិព័រណ៍សំណង់ CAMBUILD 2024 នៅព្រឹកថ្ងៃទី១១ ខែកញ្ញា ឆ្នាំ២០២៤ ។
ឯកឧត្តមបានមានប្រសាសន៍បន្តថា គិតមកដល់ពេលនេះ ដីធ្លីដែលមិនទាន់បានបញ្ជីនៅប្រមាណតែជាង១លានក្បាលដីទៀតប៉ុណ្ណោះ ដូច្នេះនឹងបញ្ចប់ទាំងស្រុងនៅពេលឆាប់ៗនេះ ហើយក៏ជាលើកទី១ក្នុងប្រវត្តិសាស្ត្ររបស់ខ្លួន ដែលបានចុះបញ្ជីវាស់វែងដីទាំងអស់ ។
ឯកឧត្តមមានប្រសាស៍ថា ៖
«កិច្ចការងារវាស់វែងចុះបញ្ជីដីធ្លី នៅកម្ពុជាបានចាប់ផ្ដើមនៅក្នុងឆ្នាំ ១៩៨៩ ដោយអតីតនាយករដ្ឋមន្ត្រីសម្ដេចអគ្គមហាសេនាបតីតេជោ ហ៊ុន សែន ហើយនៅក្នុងរយៈពេលប៉ុន្មានឆ្នាំខាងមុខទៀត នឹងដល់គម្រប់ខួប៤០ឆ្នាំ នៃការចុះបញ្ជីដីនៅកម្ពុជា ។ នៅក្នុងគម្រប់ខួបលើកទី៤០នេះដែរ ក្រសួងរៀបចំដែនដី នគរូបនីយកម្ម និងសំណង់ មានការប្ដេជ្ញាចិត្តខ្ពស់ចំពោះមុខប្រជាជន ចំពោះមុខរាជរដ្ឋាភិបាល ចំពោះមុខគណបក្សប្រជាជនកម្ពុជា ដោយត្រូវចុះបញ្ជីដីធ្លីឱ្យបានរួចរាល់មុនឆ្នាំ២០២៩»។
ឯកឧត្តមបន្ថែមថា តាមការកត់សម្គាល់ពីសកម្មភាពក្រុមការងារចុះវាស់វែង និងចុះបញ្ជីដីធ្លីរបស់ក្រសួងនាពេលបច្ចុប្បន្ននេះ គឺមិនដល់ឆ្នាំ២០២៩នោះទេ គឺការចុះបញ្ជីដីធ្លីនឹងត្រូវបញ្ចប់នៅពេលឆាប់ៗនេះហើយ ប៉ុន្តែត្រូវការពេលវេលាដើម្បីជម្រះបញ្ជីដូចជាចេញបណ្ណ និងសម្អាតការងារឱ្យបានស្អាត ដូច្នេះ ការងារនេះ អាចនឹងបញ្ចប់នៅក្នុងឆ្នាំ២០២៧ ឬ២០២៨ ។
ឯកឧត្តមបញ្ជាក់ថា ៖
«នៅពេលក្រសួងចុះបញ្ជី ចេញបណ្ណបញ្ជាក់ក្បាលដីរួចរាល់ ពេលនោះប្រជាជនកម្ពុជា ក៏ដូចជារាជរដ្ឋាភិបាលនឹងលែងមានបញ្ហាស្មុគ្រស្មាញ ឬមានទំនាស់ពាក់ព័ន្ធនឹងដីធ្លីទៀតហើយ ទាំងដីរដ្ឋ និងដីឯកជន ។ ជាក់ស្ដែងជម្លោះដីធ្លី គិតត្រឹមម៉ោងនេះ បញ្ហាធំៗពាក់ព័ន្ធនឹងវិវាទដីធ្លីមិនមានទៀតទេ ដោយក្រុមការងាររបស់ក្រសួងបានដោះស្រាយជាបន្តបន្ទាប់ តែនៅមានវិវាទតូចតាច ដែលត្រូវបន្តដោះស្រាយបន្តទៀត»។
ការពន្លឿនការចុះបញ្ជីដីធ្លីនៅទូទាំងប្រទេសរបស់រាជរដ្ឋាភិបាលកម្ពុជានាពេលនេះ ក៏ជាយុទ្ធសាស្ត្រមួយក្នុងការទាក់ទាញការវិនិយោគពីបរទេស និងក្នុងស្រុកផងដែរ ។ ជាក់ស្ដែងវិនិយោគិនបរទេសកាន់តែមានទំនុកចិត្តទៅលើដីធ្លី ទីតាំងវិនិយោគរបស់ពួកគេថាជាទ្រព្យដែលស្របច្បាប់មានឯកសារបញ្ជាក់ត្រឹមត្រូវច្បាស់លាស់៕
Account
Security
Favourite Content