សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី Bloomberg បានរាយការណ៍ថា ការកើនឡើងឥទ្ធិពលយ៉ាងឆាប់រហ័សនៃ BRICS កំពុងផ្លាស់ប្តូរសេដ្ឋកិច្ចពិភពលោក ជាមួយនឹងលក្ខខណ្ឌនៃអំណាចទិញ (PPP) អាចនឹងកើនឡើងលើសពីក្រុមប្រទេសសេដ្ឋកិច្ចជឿនលឿនធំៗ G7 ក្នុងពេលដ៏ខ្លីខាងមុខនេះ។
បច្ចុប្បន្ននេះ ក្រុមប្រទេស BRICS រួមមានប្រទេស ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ប៉ុន្តែក្រុមនេះនឹងបន្ថែមសមាជិករួមមាន អាហ្សង់ទីន អេហ្ស៊ីប អេត្យូពី អ៊ីរ៉ង់ អារ៉ាប៊ីសាអូឌីត និងអារ៉ាប់រួម នៅខែមករាខាងមុខនេះ។ ទន្ទឹមនឹងនេះ ក្រុមប្រទេសសេដ្ឋកិច្ចធំៗ G7 រួមមានសហរដ្ឋអាមេរិក កាណាដា ចក្រភពអង់គ្លេស បារាំង អ៊ីតាលី អាល្លឺម៉ង់ និងជប៉ុន ដែលសុទ្ធតែជាបណ្តាប្រទេសឧស្សាហកម្ម និងអភិវឌ្ឍន៍។
របាយការណ៍បានបង្ហាញថា ការពង្រីករបស់ក្រុមប្រទេស BRICS មានទំហំធំជាង G7 រួចទៅហើយ។ នៅឆ្នាំ២០២២ ប្លុកនេះមានចំណែក ៣៦ ភាគរយនៃសេដ្ឋកិច្ចពិភពលោក ខណៈដែលក្រុមប្រទេស G7 មានចំណែក ៣០ ភាគរយតែប៉ុណ្ណោះ។ យោងតាមការព្យាករណ៍របស់ Bloomberg បង្ហាញថា ការកើនឡើងនៃកម្លាំងពលកម្ម និងសក្តានុពលជាច្រើនសម្រាប់ការចាប់យកបច្ចេកវិទ្យានឹងជំរុញឲ្យសេដ្ឋកិច្ច BRICS មានចំណែកដល់ ៤៥ ភាគរយនៅឆ្នាំ២០៤០ បើធៀបនឹងសេដ្ឋកិច្ច G7 នឹងមានចំណែក ២១ ភាគរយប៉ុណ្ណោះ។
លើសពីនេះ របាយការណ៍ក៏បានចង្អុលបង្ហាញថា ក្រុមសេដ្ឋកិច្ច BRICS នឹងពង្រីកខ្លួនដោយមានការចូលរួមពីប្រទេសនាំចេញប្រេងធំៗមួយចំនួនរបស់ពិភពលោកដូចជា អារ៉ាប៊ីសាអូឌីត រុស្ស៊ី អារ៉ាប់រួម និងអ៊ីរ៉ង់ ព្រមទាំងប្រទេសនាំចូលប្រេងដ៏ធំបំផុត ដូចជា ចិន និងឥណ្ឌាផងដែរ។ មិនត្រឹមតែប៉ុណ្ណោះ ប្រសិនបើ BRICS ទទួលបានជោគជ័យក្នុងការផ្លាស់ប្តូរការទូទាត់នៃប្រតិបត្តិការប្រេងជាមួយនឹងរូបិយប័ណ្ណផ្សេងទៀត នោះអាចជះឥទ្ធិពលលើភាគហ៊ុននៃប្រាក់ដុល្លារក្នុងពាណិជ្ជកម្មអន្តរជាតិ និងទុនបំរុងប្តូររូបិយប័ណ្ណសកល។ ទន្ទឹមនឹងនេះ គេឃើញថា សមាជិក BRICS កំពុងធ្វើការយ៉ាងសកម្មដើម្បីបោះបង់ប្រាក់ដុល្លារអាម៉េរិកនៅក្នុងពាណិជ្ជកម្មរបស់ពួកគេ។
យ៉ាងណាមិញ របាយការណ៍ក៏បានចង្អុលបង្ហាញពីបញ្ហាមួយចំនួនដែលក្រុម BRICS ប្រឈមមុខ រួមមានដូចជា ការធ្លាក់ចុះសេដ្ឋកិច្ចរបស់ប្រទេសចិន និងការស្ទាក់ស្ទើរក្នុងការបោះបង់ប្រាក់ដុល្លារអាម៉េរិក។ ទោះជាយ៉ាងណាក្តី BRICS នឹងផ្លាស់ប្តូរពិភពលោកប្រហែលជាច្រើនជាងនេះ ដោយសារតែការកើនឡើងនៃផលិតផលក្នុងស្រុកសរុប ប្រព័ន្ធនយោបាយ និងសេដ្ឋកិច្ចមានភាពចម្រុះគ្នា៕
Account
Security
Favourite Content