ប្រទាលកន្ទុយក្រពើ ជាដំណាំងាយដាំ មិនពិបាកថែទាំ ហើយថែមទាំងមានអត្ថប្រយោជន៍ច្រើនយ៉ាងទៀតផង ដែលគេអាចយកធ្វើជាភេសជ្ជៈ ជាឱសថសម្រាប់ព្យាបាល និងជួយសម្រួលផ្លូវរំលាយអាហារ ក៏ដូចជាយកធ្វើជាវត្ថុធាតុដើមសម្រាប់ជួយថែរក្សាសម្រស់ស្បែក និងសរសៃសក់យ៉ាងមានប្រសិទ្ធភាព។ អាស្រ័យហេតុតែមានអត្ថបទប្រយោជន៍ច្រើនបែបនេះ ប្រទាលកន្ទុយត្រូវបានក្លាយជារុក្ខជាតិដែលមានតម្រូវការទីផ្សារខ្ពស់ ហើយតម្លៃក៏ទទួលបានសមរម្យ ទើបអ្នកជំនាញកសិកម្មបានចងក្រងជាបច្ចេកទេសដាំដុះយ៉ាងត្រឹមត្រូវដែលអាចធានាថាទទួលបានទិន្នផលល្អជាទីគាប់ចិត្ត។

ប្រទាលកន្ទុយក្រពើ ជារុក្ខជាតិងាយដាំ និងថែទាំ​ដែលគេអាចដាំនៅលើដីផ្ទាល់ ឬនៅក្នុងផើង កេស ថង់ បាវ ហើយវាផ្ដល់ផលបានល្អ ទោះបីស្ថិតក្រោមអាកាសធាតុក្ដៅ ឬត្រជាក់ខ្លាំងក៏ដោយ ត្បិតវាក៏ជារុក្ខជាតិដែលមានធាង និងកម្ពស់ដើមចាប់ពី ៦០-១០០សង់ទីម៉ែត្រ ទទឹងធាងមានទំហំពី ៣-៥សង់ទីម៉ែត្រ។

ដំណាំប្រភេទនេះអាចដុះលូតលាស់ល្អនៅក្នុងលក្ខខណ្ឌមានពន្លឺ៥០ភាគរយ និងម្លប់៥០ភាគរយ ព្រោះបើគេដាំនៅក្នុងម្លប់ពេកអាចបណ្ដាលឱ្យដំណាំឆ្លងជំងឺ ហើយអាចជាំទឹក ហេតុនេះដីខ្ពស់ ឬងាយជ្រាបទឹក ជាប្រភេទដីដែលសមស្របសម្រាប់ប្រទាលកន្ទុយក្រពើ។

ពាក់ព័ន្ធនឹងការរៀបចំដី គេត្រូវភ្ជួរដីឱ្យបាន ២-៣ដដងដើម្បីសម្អាតស្មៅ និងសម្លាប់សមាសភាពចង្រៃផ្សេងៗដូចជាពពួកសត្វល្អិត ជំងឺសល់ពីរដូវកាលមុន។ សម្រាប់ទីតាំង ត្រូវរើសកន្លែងណាដែលមានអាកាសធាតុក្ដៅល្មម អាចមានពន្លឺថ្ងៃពី ៨-១០ម៉ោងក្នុងមួយថ្ងៃ។

ចំណែកការដាំក្នុងផើង ត្រូវលាយដីឱ្យស្មើសាច់ ខ្សាច់ និងដីក្រួស ចៀសវាងការជាំទឹក ហើយក្រោយពេលដាំត្រូវយកដីគ្របឫស ប៉ុន្តែកុំឱ្យធាងរបស់វាប៉ះដី ព្រោះបណ្ដាលឱ្យរលួយ។ បន្ទាប់ពីដាក់ដាំហើយ មិនត្រូវស្រោចទឹកភ្លាមៗនោះទេ ពោលគឺត្រូវផ្អាកស្រោចទឹកប្រមាណ ២-៣ថ្ងៃសិន។

ប្រទាលកន្ទុយក្រពើមានឫសខ្លី និងស្លឹកធ្ងន់ ហេតុនេះបើដាំក្នុងផើងត្រូវប្រើផើងធំដើម្បីកុំឱ្យខ្វះសារធាតុចិញ្ចឹមនៅពេលវាធំ និងមានកម្ពស់ដើមខ្ពស់។ នៅពេលវាលូតលាស់ល្អ អាចបែកកូនបានច្រើន យើងអាចរំលែកកូនដាំក្នុងផើងផ្សេងទៀតបាន។

នៅរដូវប្រាំងមានកម្ដៅថ្ងៃគ្រប់គ្រាន់ គេត្រូវស្រោចទឹកវាជាប្រចាំទើបអាចលូតលាស់បានលឿន តែក៏ត្រូវពិនិត្យមើលតាមស្ថានភាពដីផងដែរ។ ក្រៅពីនេះការថែទាំក៏ត្រូវការជីបំប៉នខ្លះៗ ប៉ុន្តែមិនច្រើនពេកទេ ដោយគ្រាន់តែប្រើសារធាតុអាសូតក្នុងកម្រិតតិចតួច សារធាតុផូស្វ័រច្រើន និងជីប៉ូតាស្យូមទាបក្នុងកម្រិត ១០-៤០-១០ ឬ ១៥-៣០-១៥ និងត្រូវន្ថែមជីនោះម្ដង ក្នុងមួយឆ្នាំចាប់ពីរយៈពេលចាប់ផ្ដើមដាំ។

សម្រាប់ការប្រមូលផល ដំណាំនេះអាចប្រមូលផលបាននៅពេលមានអាយុពី ៩-១០ខែក្រោយពេលដាំដុះ និងអាចប្រមូលផលបានរហូដល់រយៈពេលប្រាំឆ្នាំ។ ចំណែកទិន្នផលវិញ ជាមធ្យមគេអាចប្រមូលផលបានពី ៤៥-៥០តោនក្នុងមួយហិកតា ដោយប្រទាលខ្លះល្អអាចមានធាងទម្ងន់ ២០០ក្រាមក្នុងមួយធាង ហើយក្នុងមួយគុម្ពអាចពី ១៦-២០ធាង។

គួរបញ្ជាក់ដែរថា ប្រទាលកន្ទុយក្រពើសម្បូរទៅដោយសារធាតុបំប៉នសំខាន់ៗមួយចំនួនទៀតដែលធ្វើឱ្យរបបអាហារមានតុល្យភាពជួយបង្កើនថាមពល និងមានសុខភាពល្អ រួមមានវីតាមីA វីតាមីនB1 វីតាមីនC និងវីតាមីនE។ ដំណាំនេះក៏ត្រូវបានគេចាត់ទុកថាជាឱសថធម្មជាតិក្នុងការជួយថែរក្សាសម្រស់ ព្យាបាលរបួស រលាក សត្វល្អិតទិច ឬខាំ បំបាត់ការឈឺចាប់ បញ្ហារមាស់ និងបញ្ហាសើរស្បែកដទៃទៀត៕