ក្នុងនាមជាប្រទេសមានសេដ្ឋកិច្ចខ្លាំងជាងគេបំផុតទី២នៅពេលបច្ចុប្បន្ននេះ ប្រទេសចិនបានទទួលរងនូវបទពិសោធដ៏ជូរចត់ក្នុងអំឡុងពេលជាង២ឆ្នាំចុងក្រោយនេះជាមួយនឹងវិបត្តិធំៗផ្ទួនៗគ្នា ប៉ុន្តែបញ្ហាដែលលំបាកជាងគេនៅពេលនេះគឺជាបញ្ហាក្នុងវិស័យអចលនទ្រព្យ។

អចលនទ្រព្យ គឺជាចំណែកដ៏ធំ និងសំខាន់បំផុតនៃកិច្ចអភិវឌ្ឍរបស់ប្រទេសដែលមានទំហំដល់ទៅ១ភាគ៥នៃផលិតផលក្នុងស្រុកសរុបរបស់ចិននៅពេលនេះ ប៉ុន្តែអ្វីដែលជាក្តីបារម្ភរបស់ក្រុមអ្នកជំនាញនោះគឺថាវិបត្តិអចលនទ្រព្យនឹងអាចរីករាលដាលបន្ថែមទៀតទៅដល់ប្រព័ន្ធហិរញ្ញវត្ថុ និងសកម្មភាពវិនិយោគផ្សេងទៀត។ ក្រៅពីនោះ ចិនក៏បានជួបប្រទះទៅនឹងបញ្ហាជាបន្តបន្ទាប់ទៀតបូករួមទាំងបញ្ហាសកលបញ្ហាអតិផរណា ជាពិសេសការអនុវត្តគោលការណ៍សូន្យកូវីដ ដែលជាលទ្ធផលវាបានធ្វើឲ្យមានផលប៉ះពាល់យ៉ាងខ្លាំងទៅដល់សង្វាក់ផលិតកម្ម និងចែកចាយទំនិញទាំងអស់របស់ចិន ហើយបន្ថែមលើសពីនេះ វាបានធ្វើឲ្យសេដ្ឋកិច្ចចិនរង ផលប៉ះពាល់យ៉ាងខ្លាំងផងដែរ។ យ៉ាងណាក៏ដោយ បើទោះបីស្ថិតនៅក្នុងកាលៈទេសៈលំបាកបែបនេះក្តី ប៉ុន្តែអ្នកជំនាញនៅតែអាចសម្លឹងមើលឃើញថា កំណើនសេដ្ឋកិច្ចរបស់ចិននឹងនៅតែដើរឆ្ពោះទៅកាន់តំណែងជាមហាអំណាចទី១របស់ពិភពលោកដដែលជំនួសឲ្យអាមេរិកដែលអ្វីៗគឺនឹងអាស្រ័យទៅលើតែពេលវេលាប៉ុណ្ណោះ។

IMF បានព្យាករណ៍ថា កំណើនសេដ្ឋកិច្ចរបស់ចិននឹងបន្តកើនឡើងប្រមាណជា ២,៧ភាគរយនៅក្នុងឆ្នាំ២០២៣នេះ ហើយឥទ្ធិពលនៃកំណើនសេដ្ឋកិច្ចរបស់ចិនបានចូលរួមចំណែកដល់ទៅដល់កំណើននៃសេដ្ឋកិច្ចសកលទាំងមូលក្នុងទំហំច្រើនជាងគេអាមេរិកដល់ទៅ ៣ដង ខណៈដែលអាមេរិកនឹងនៅបន្តតំណែងជាមហាអំណាចសេដ្ឋកិច្ចផុតលេខនៅឡើយក្នុងឆ្នាំនេះទោះបីជាកំណើនសេដ្ឋកិច្ចនឹងមានត្រឹមតែ១ភាគរយក្តី។

បើមិនមានអ្វីប្រែប្រួលខ្លាំងជាងនេះទេនោះ អ្នកជំនាញជាច្រើនទៀតនៅតែមានទំនុកចិត្តថា នៅពេលអនាគតចិននឹងក្លាយទៅជាម្ចាស់តំណែងសេដ្ឋកិច្ចធំជាងគេបំផុតរបស់ពិភពលោកជំនួសឲ្យអាមេរិក ឬយ៉ាងយូរបំផុតត្រឹមឆ្នាំ២០៣៥ប៉ុណ្ណោះ ហើយចំណែកឯឥណ្ឌានឹងមានសន្ទុះខ្លាំងដើម្បីចាប់យកតំណែងទី២ជំនួសអាមេរិកនៅក្នុងឆ្នាំ២០៧៥។ នេះបើយោងតាមការព្យាករណ៍ទុកដោយក្រុមហ៊ុន Goldman Sachs ។

អ្នកជំនាញសេដ្ឋកិច្ចរបស់ Goldman Sachs លោក Kevin Daly និង Tadas Gedminas ដែលជាអ្នកបង្កើតរបាយការណ៍វិភាគដ៏ស៊ីជម្រៅមួយដែលមានទំព័រសរុបដល់ទៅ៤៥ទំព័របានរៀបរាប់ថា រយៈពេល៣០ឆ្នាំខាងមុខនេះផលិតផលក្នុងស្រុកសរុប ឬ GDP របស់សកលលោកនឹងមានទម្ងន់កាន់តែធ្ងន់ឡើងនៅប៉ែកប្រទេសតំបន់អាស៊ីជាមិនខាន ដោយក្នុងនោះគិតត្រឹមឆ្នាំ២០៥០ ក្រៅតែពីចិនឈរនៅលេខរៀងកំពូល ឥណ្ឌានៅលេខ២ និងអាមេរិលលេខ៣ ហើយឥណ្ឌូនេស៊ីនឹងរំកិលខ្លួនឡើងទៅលេខ៤ ខណៈដែលអាល្លឺម៉ង់នឹងមានតំណែងនៅលេខរៀងទី៥ ជាមហាអំណាចកំពូលទាំង៥របស់ពិភពលោក។

របាយការណ៍ដដែលក៏បានព្យាករណ៍ដែលថា ប្រទេសនីហ្សេរីយ៉ាប៉ាគីស្ថាន និងអេហ្ស៊ីបនឹងអាចទទួលបានតំណែងជាមហាអំណាចកំពូលទាំង១០នៅត្រឹមឆ្នាំ២០៧៥ ប្រសិនបើពួកគេបានអនុវត្តតាមគោលការណ៍ត្រឹមត្រូវ ពីព្រោះថាជាប្រទេសដែលមានសក្តានុពលខ្លាំងផ្នែកធនធានមនុស្សទាំងបរិមាណ និងគុណភាព។

Goldman Sachs ក៏បានព្យាករណ៍ដែរថា កំណើនសេដ្ឋកិច្ចសកល ចន្លោះពីឆ្នាំ២០២៤ទៅដល់ឆ្នាំ២០២៩ខាងមុខនេះនឹងអាចទទួលបានកំណើនជាមធ្យមប្រមាណជា២,៨ភាគរយប្រចាំឆ្នាំធៀបទៅនឹងកំណើនសេដ្ឋកិច្ចសកលជាមធ្យមមួយទសវត្សរ៍មុនពេលវិបត្តិសេដ្ឋកិច្ចសកលចុងក្រោយដែលមានទៅដល់ ៣,៦ភាគរយ និងនៅតិចជាងកំណើនសេដ្ឋកិច្ចសកលចន្លោះ១០ឆ្នាំមុនពេលកូវីដដែលមានប្រមាណជា ៣,២ភាគរយប្រចាំឆ្នាំ៕