ភ្នំពេញ ៖ រយៈពេល៤ថ្ងៃនៃពិធីបុណ្យចូលឆ្នាំចិន ដែលគិតចាប់ពីថ្ងៃទី ២១ ដល់ ២៤ ខែមករា ឆ្នាំ២០២៣ មានភ្ញៀវទេសចរជាតិ និងអន្តរជាតិចេញដើរកម្សាន្ដតាមតំបន់ទេសចរណ៍សរុប ១ ០៤៩ ២២២ នាក់។ ក្នុងចំណោមភ្ញៀវទាំងជាង ១លាននាក់ មាននូវភ្ញៀវជាតិចំនួន ១ ០០៧ ១៦៦នាក់ និងភ្ញៀវបរទេសចំនួន ៤២ ០៥៦នាក់។

ចំពោះគោលដៅទេសចរណ៍សំខាន់ៗក្នុងរយៈពេលនៃការដើរកម្សាន្ដរបស់ភ្ញៀវ ៤ថ្ងៃនេះរួមមាន ៖ ខេត្តព្រះសីហនុ (២៩៦ ០២៨នាក់) ខេត្តសៀមរាប (១០៥ ៤៨១នាក់) ខេត្តបាត់ដំបង (១០២ ៧៧៨នាក់) ខេត្តកំពត (៨២ ១៩៩នាក់) ខេត្តប៉ៃលិន (៨១ ៥០០នាក់) ខេត្តកំពង់ចាម (៦៧ ៩១៤នាក់) និងខេត្តកែប (៦៧ ០៣០នាក់)។

បើមើលអំពីបែបផែននៃការដើរកម្សាន្ដរបស់ប្រជាពលរដ្ឋក្នុងអំឡុងពេលចូលឆ្នាំចិន គឺច្រើនតែ ដើរជាលក្ខណៈគ្រួសារ ដែលជាហេតុធ្វើឱ្យគោលដៅទេសចរណ៍ទូទាំងប្រទេសសុទ្ធតែបានទទួល ភ្ញៀវកកកុញតែម្ដង។ សម្រាប់ខេត្តព្រះសីហនុវិញ ភ្ញៀវទេសចរភាគច្រើននិយមទៅវិលល្ងាច ជាមួយការ​ធ្វើដំណើរងាយស្រួលជាងមុន និងលឿនជាងមុនតាមផ្លូវល្បឿនលឿន។

យ៉ាងណាមិញ បើតាមក្រសួងទេសចរណ៍បានឱ្យដឹងថា ចរន្តនៃការដើរកម្សាន្ដរបស់ភ្ញៀវ ក្នុងអំឡុង ពេលចូលឆ្នាំចិននាឆ្នាំនេះ មានសភាពផុសផុលច្រើន ដោយហេតុថា ពិធីបុណ្យចូលឆ្នាំចិនធ្វើឡើង​ចំថ្ងៃចុងសប្ដាហ៍ស្រាប់ ដូច្នេះហើយ ប្រជាពលរដ្ឋបានចាកចេញពីទីក្រុង ទៅកាន់ស្រុកកំណើត តាំងតែពីថ្ងៃសុក្រទី ២០ម្ល៉េះ។

ក្រសួងទេសចរណ៍បានឱ្យដឹងទៀតថា ប្រជាជនមួយចំនួនបានត្រឡប់ចូលរាជធានីភ្នំពេញ​កាល​ពីថ្ងៃចន្ទ ហើយខ្លះទៀតបានត្រលប់ចូលវិញនាល្ងាចថ្ងៃអង្គារ។ ជាមួយគ្នានេះ អាជីវករនៅតាមផ្សារ និងអ្នកលក់ដូរនៅតាមផ្ទះបានបិទតូប និងហាងជាបណ្តោះអាសន្នក្នុងរយៈពេលចូលឆ្នាំនេះ ដើម្បី​ជួបជុំគ្រួសារ និងដើរកម្សាន្ត រីឯអង្គភាព និងស្ថាប័នមួយចំនួនបានអនុញ្ញាតឱ្យបុគ្គលិ​កឈប់សម្រាក ដោយដាក់ជាកម្មវិធីប្រជុំបូកសរុបប្រចាំឆ្នាំជាដើម។

ចំពោះការគ្រប់គ្រងសន្តិសុខ សុវត្ថិភាព និងសណ្ដាប់ធ្នាប់ទៀតសោត ត្រូវបានក្រសួងទេសចរណ៍​បញ្ជាក់ថា មានភាពល្អប្រសើរមិនមាន​បញ្ហា ឬការរំខានណាមួយកើតឡើងគួរកត់សម្គាល់ឡើយ៕