បរទេស ៖ ខណៈរដ្ឋបាលលោក Donald Trump កំពុងព្យាយាមក្នុងការរារាំងទីផ្សារផ្គត់ផ្កង់បន្ទះឈីបទៅកាន់ប្រទេសចិនដែលខ្លួនគិតថាវាគឺជាយុទ្ធសាស្ត្រដ៏សំខាន់ក្នុងការបង្អាក់ដំណើរការអភិវឌ្ឍបច្ចេកវិទ្យារបស់ចិននោះ ប៉ុន្តែអ្នកជំនាញពាណិជ្ជកម្មអន្តរជាតិបានយល់ឃើញថា លទ្ធផលតបទៅនឹងយុទ្ធសាស្ត្ររបស់លោក Trump ទំនងអាចផ្ទុយស្រឡះខុសពីផែនការ ឬអាចជំរុញឱ្យចិនក្លាយជាម្ចាស់ទីផ្សារបន្ទះឈីបពិភពលោកទៅវិញ។

អ្នកជំនាញជាច្រើនដែលបានផ្តល់បទសំភាសជាមួយនឹងកាសែត AFP បានលើកឡើងថា ការទប់ស្កាត់ផលិតផលបន្ទះឈីបទៅកាន់ប្រទេសចិននឹងប្រែក្លាយជាកត្តាជុំរុញដ៏ខ្លាំងក្លាដែលអាចធ្វើឲ្យក្រុមហ៊ុនបច្ចេកវិទ្យាចិនទាំងឡាយបង្ខំការអភិវឌ្ឍ និងផលិតបន្ទះឈីបផលិតក្នុងស្រុកដោយខ្លួនឯងកាន់តែច្រើន ហើយឈានទៅដល់ការក្តោបក្តាប់ទីផ្សារបន្ទះឈីបរបស់ពិភពលោកថែមទៀតផង។

លោក Jack Gold អ្នកវិភាគដ៏ល្បីម្នាក់របស់ J.Gold associates បានមើលឃើញបែបនេះថា៖ អ្វីដែលរដ្ឋាភិបាលក្រុងវ៉ាស៊ិនតោនកំពុងអនុវត្តនាពេលបច្ចុប្បន្នអាចក្លាយជាឱ្យកាសផ្តល់ជ័យជំនះដ៏ធំមួយទៅឲ្យប្រទេសចិនទៅវិញនោះទេ ជាពិសេសគឺអាជីវកម្មផលិតបន្ទះឈីបនៅក្នុងស្រុក។ នៅពេលណាមួយដែលពួកគេមានសមត្ថភាពគ្រប់គ្រងបាននោះ ពួកគេនឹងចាប់ផ្តើមលក់បន្ទះឈីបទៅកាន់ពិភពលោក ហើយគ្រប់គ្នានឹងបញ្ជាទិញផលិតផលរបស់ចិន។

លោកបន្ថែមថា៖ នៅពេលដែលវាកើតឡើងហើយ ច្បាស់ណាស់ សហរដ្ឋអាមេរិកនឹងមិនអាចឈរនៅក្នុងតំណែងកំពូលអ្នកចែកចាយបន្ទះឈីបទៀតទេ ហើយថែមទាំងបាត់បង់ចំណែកទីផ្សារទៅឱ្យប្រទេសចិនយ៉ាងធំធេងទៀតផង។

គួរកត់ាសម្គាល់ថា កាលពីសប្តាហ៍កន្លងទៅថ្មីៗនេះ ក្រុមហ៊ុនអ្នកផលិតដ៏ធំបំផុតរបស់អាមេរិក Nvidia និងគូប្រជែង Advanced Micro Devices (AMD) សុទ្ធតែមើលឃើញនូវតួលេខខាតបង់ដូចគ្នាជុំវិញការសម្រេចចិត្តរបស់អាមេរិកក្នុងការរឹតបន្តឹងអាជ្ញាបណ្ណអាជីវកម្មរបស់ពួកគេជាមួយនឹងប្រតិបត្តិការលក់បន្ទះឈីបទៅឲ្យប្រទេសចិន។

តាមការព្យាករណ៍ Nvidia នឹងអាចខាតបង់ប្រាក់យ៉ាងហោចណាស់ ៥,៥ពាន់លានដុល្លារ ខណៈដែល AMD នឹងអាចបាត់បង់ប្រាក់ចំណេញ ៨០០លានដុល្លារក្រោយគោលការណ៍ថ្មីនេះត្រូវបានប្រកាសជាផ្លូវការ។ ដោយឡែក បើយោងតាមការវិភាគដោយអ្នកជំនាញបច្ចេកវិទ្យាម្នាក់ទៀតគឺលោក Rob Enderle វិញក៏បានទស្សន៍ទាយទុកដូចគ្នាដែរថា ក្រុមហ៊ុនអ្នកផលិតបន្ទះឈីបទាំងឡាយរបស់ចិនដែលនាំមុខដោយក្រុមហ៊ុនយក្ស Huawei corporation នោះនឹងអាចឆក់យកឱកាសដ៏អស្ចារ្យនេះដើម្បីសម្រេចឲ្យបានផែនការក្លាយជាអ្នកផ្គត់ផ្គង់ផ្តាច់មុខបន្ទះឈីបរបស់ពិភពលោក។

លោកបន្តថា គោលនយោបាយរបស់លោកប្រធានាធិបតីអាមេរិក Donald Trump ដែលគិតថាអាចវាយប្រហារចិនបាននោះ តាមពិតទៅវាមិនមែនងាយដូចការគិតរបស់គាត់នោះទេ ពីព្រោះវាគឺជាដំណើរការបែបសេដ្ឋកិច្ច។ ដូច្នេះ ការតម្លើងពន្ធរបស់ Trump ពិតជាមិនបានធ្វើឲ្យចិនរងគ្រោះនោះទេ តែបែរធ្វើឲ្យចិនក្លាយជាអ្នកទទួលបានជ័យជំនះក្នុងសង្គ្រាមពាណិជ្ជកម្មមួយនេះទៅវិញ ហើយពិភពលោកនឹងងាកទៅរកចិនកាន់តែច្រើនឡើង៕