ស្រូវ ជាដំណាំដែលមានសក្ដានុពលខ្លាំងបំផុតនៅក្នុងប្រទេសកម្ពុជា ដែលកសិករជាអ្នកបង្ករបង្កើនផលគួរស្វែងយល់បន្ថែមពីចំណេះដឹង និងបច្ចេកទេសក្នុងការដាំដុះឱ្យបានត្រឹមត្រូវ ជាពិសេស ការថែទាំតាំងពីដំណាក់កាលសាបព្រោះរហូតដល់ការប្រមូលផល ធ្វើយ៉ាងណាអាចកាត់បន្ថយការខាតបង់ទិន្នផលស្រូវ​ក្រោយពេលប្រមូលផល។  

ថ្មីៗនេះ ក្រសួងកសិកម្ម រុក្ខាប្រមាញ់ និងនេសាទ បានដាក់ចេញ និងផ្សព្វផ្សាយនូវឯកសារស្ដីពីការបាត់បង់ស្រូវក្រោយពេលប្រមូលផល និងកចិ្ចប្រតិបត្តិមួយចំនួនដែលកសិករអាចអនុវត្តដើម្បីកាត់បន្ថយបញ្ហាទាំងនេះបាន។ ជាក់ស្ដែង ការបាត់បង់ស្រូវក្រោយពេលប្រមូលផល ឬខូចខាតនៅក្រោយពេលប្រមូលផល សំដៅលើការបាត់បង់ទាំងបរិមាណ និងគុណភាពនៃទិន្នផលបន្ទាប់ពីការច្រូតកាត់រួច ដោយការបាត់បង់នេះអាចកើតមានក្នុងដំណាក់កាលលផ្សេងៗនៃប្រព័ន្ធការងារក្រោយប្រមូលផល។

ការបាត់បង់ស្រូវអង្ករនេះ អាចបាត់បង់រាប់ចាប់ពីដំណាក់កាលច្រូតកាត់ លើកដាក់ បោកបែន សម្ងួត ទុកដាក់ និងដឹកជញ្ជូន ដែលសរុបអាចបាត់បង់ពី១០-១៥ភាគរយនៃទិន្នផលសរុប ដែលអាចកើតមានឡើង។ ដោយឡែកការប្រើប្រាស់ពូជស្រូវដែលមានគុណភាពអន់ ការដាំដុះថែទាំមិនបានល្អ ឬការដែលមានសត្វល្អិតបំផ្លាញនៅក្នុងស្រែ ក៏អាចបណ្ដាលឱ្យមានការបាត់បង់តាំងពីមិនទាន់ប្រមូលផលម្ល៉េះ។ ម៉្យាងវិញទៀត ការបាត់បង់ខាងលើក៏រាប់ទាំងការថយចុះនូវសារធាតុរូបសាស្ត្រនៃផលិតផល គឺការបាត់បង់បរិមាណ ឬទម្ងន់។ ការថយចុះនូវអត្រាសំណើម បានបណ្ដាលឱ្យថយចុះនូវទម្ងន់គ្រាប់ តែវាពុំបាត់បង់បរិមាណស្បៀងទេ ផ្ទុយទៅវិញ ការកើនឡើងនូវទម្ងន់គ្រាប់ដែលបណ្ដាលមកពីការស្រូបសំណើមពីបរិយាកាស ដោយសារស្រូវត្រូវទឹកសន្សើម ឬភ្លៀងទទឹកជាដើម ដែលអាចបង្កឱ្យមានការខូចខាតខ្លាំង។

ចំណែក ការបាត់បង់គុណភាព គេអាចគិតទៅលើរូបភាពខាងក្រៅ ទំហំ ក្លិន និងរសជាតិ​ ដោយផលិតផលដែលស្អាត និងគ្មានជំងឺ ជាសារៈសំខាន់ទីមួយសម្រាប់តម្រូវការទីផ្សារ។ ការបាត់បង់គុណភាព នឹងស្ដែងចេញជាការថយចុះនូវតម្លៃផលិតផលនៅលើទីផ្សារផ្ទាល់តែម្ដវង។

ក្នុងន័យនេះ ដើម្បីកាត់បន្ថយការខាតបង់ កសិករត្រូវយល់ដឹងពីប្រតិបត្តិការនានានៅក្រោយពេលប្រមូលផល រាប់តាំងពីការច្រូតកាត់ត្រូវធ្វើនៅពេលដែលគ្រាប់ស្រូវមានអត្រាសំណើមពី ២០-២៥ភាគរយ ស្រូវទុំប្រមាណ ៨០-៨៥ភាគរយ មានពណ៌លឿងទុំល្អ គ្រាប់ស្រូវរឹង តែមិនស្រួយនៅពេលខាំ ក្រោយចេញផ្កា ២៨-៣៥ថ្ងៃសម្រាប់ស្រូវប្រាំង និង ៣២-៣៨ថ្ងៃសម្រាប់ស្រូវវស្សា។ ក្នុងនោះក៏ត្រូវចៀសវាងការប្រមូលផលយឺតពេក ឬមុនកំណត់ដែលអាចបណ្ដាលឱ្យទិន្នផលស្រូវទុំខូចខាត។

ចំពោះមធ្យោបាយក្នុងការច្រូតកាត់អាចធ្វើឡើងដោយប្រើកណ្ដៀវ ម៉ាស៊ីនកាត់ផ្ដួល ដែលមានគុណប្រយោជន៍ជាងគេដូចជាអាចច្រូតកាត់បានទាន់ពេល ចំណេញពេល ចំណាយពលកម្មតិច បាត់បង់តិច និងគុណភាពស្រូវល្អ។ មុននឹងច្រូតកាត់ គេត្រូវបង្ហូរទឹកចេញពីស្រែ ៧-១០ថ្ងៃមុនច្រូត រង់ចាំឱ្យអស់សន្សើម ឬគ្រាប់ស្រូវស្ងួតសិនទើបច្រូត។

ចំពោះការបោកដោយម៉ាស៊ីន ត្រូវធ្វើឡើងនៅពេលស្រូវមានអត្រាសំណើម ២០-២៤ភាគរយ កុំឱ្យត្បាល់វិលលឿនពេក ចៀសវាងខូចគុណភាពគ្រាប់ស្រូវអង្ករ។ បន្ទាប់មកដាក់ហាលឱ្យបានឆាប់ ពោលគឺហាលឱ្យវាកាត់បន្ថយសំណើមចុះដល់ ១៤ភាគរយ ទើបអាចទុកបានយូរ ព្រោះស្រូវសើមធ្វើឱ្យងាយឡើងកម្ដៅ មានសត្វល្អិត និងជំងឺផ្សិតបំផ្លាញ ធ្វើឱ្យអង្ករស្រអាប់ លឿង ខ្មៅ ឬរលួយខូច។

ចំណុចសំខាន់មួយទៀតកាតទុកដាក់ស្រូវឱ្យមានសុវត្ថិភាព ដោយកសិករអាចរើសយកការទុកដាក់ស្រូវក្នុងបាវធម្មតា ជង្រុក ឬកន្លែងដាក់ស្រូវ និងប្រើបរិក្ខាបិទជិត។ ដោយបរិក្ខាបិទជិតអាចមានដូចជាធុង ពាង ធុងសាំង ធុងប្លាស្ទិកជាដើម ដែលគេអាចរក្សាទុកស្រូវបានយូរ និងរក្សានូវដំណុះគ្រាប់បានល្អសម្រាប់លក្ខខណ្ឌអកាសធាតុនៅប្រទេសយើង និងអាចការពារស្រូវពីការយាយីរបស់សត្វបំផ្លាញដូចជាសសត្វល្អិត សត្វស្លាប និងកណ្ដុរផងដែរ៕