បរទេស ៖ ពេលវេលាដ៏លំបាករយៈពេលជិត៥ឆ្នាំ តាំងតែពីឆ្នាំ២០១៩នៅពេលដែលរដ្ឋាភិបាលក្រោមការដឹកនាំរបស់លោក Donald Trump បានសម្រេចចិត្តដាក់ទណ្ឌកម្មធ្ងន់ធ្ងរប្រឆាំងទៅនឹងក្រុមហ៊ុនបច្ចេកវិទ្យាយក្ស Huawei ដែលជាលទ្ធផលប្រាក់ចំណូលដល់ទៅ៣០ពាន់លានដុល្លារត្រូវបានបាត់បង់ជារៀងរាល់ឆ្នាំពីមុខជំនួញលក់ស្មាតហ្វូន។

ទណ្ឌកម្មសេដ្ឋកិច្ច និងពាណិជ្ជកម្ម បានធ្វើឲ្យ Huawei មិនអាចទទួលបានការផ្គត់ផ្គង់វត្ថុធាតុដើមសម្រាប់ផលិតផលបន្ទះឈីបដើម្បីដំណើរការផែនការ 5G ព្រមទាំងបាត់បង់កិច្ចសហប្រតិបត្តិការជាមួយនឹង Google Service ធ្វើឲ្យគ្រប់ស្មាតហ្វូនរបស់ Huawei មិនអាចទទួលបានសេវាកម្ម GMS (Google Mobile Service) បន្តទៀត និងការរារាំងមិនអាចដំណើរការប្រព័ន្ធ Android system ផងដែរ។

ទោះបីជាយ៉ាងណាក្តី រយៈពេលកន្លងមក Huawei បានធ្វើឲ្យពិភពលោកមានការភ្ញាក់ផ្អើលទាំងដែលមិនអាចប្រតិបត្តិការអាជីវកម្មលក់ស្មាតហ្វូនក្តី ហើយគិតត្រឹម៣ខែដំបូងឆ្នាំ២០២៤នេះ Huawei អាចរកបានប្រាក់ចំណូលកើនឡើងខ្ពស់មកវិញ។

យោងតាមរបាយការណ៍ធ្វើឡើងដោយ China’s National Interbank Funding Center បានបង្ហាញថា Huawei អាចទទួលបានប្រាក់ចំណូលកើនឡើងដល់ទៅ៣៧ភាគរយត្រូវជា ប្រមាណ ១៧៨,៥ពាន់លានយ័ន ធ្វើឲ្យប្រាក់ចំណេញសុទ្ធកើនឡើង ៥៦៤ភាគរយ ឬត្រូវជា ១៩,៦៥ពាន់លានយ័ន (២,៧១ពាន់លានដុល្លារ)។

ភាពជោគជ័យនៃការវិលត្រឡប់មកវិញលើកនេះមិនបានមកដោយងាយស្រួលពេកនោះទេ ដោយក្នុងនោះអ្នកនាំពាក្យរបស់ Huawei បានលើកឡើងថា មានកត្តាជាច្រើនដែលនាំឲ្យក្រុមហ៊ុនអាចចាប់បានទីផ្សារមកវិញដោយក្នុងនោះមានទាំងការធ្វើទំនើបកម្មបច្ចេកវិទ្យា បច្ចេកវិទ្យាឆ្លាតវ៉ៃ និងការដកខ្លួនចេញពីអាជីវកម្មដែលបញ្ចេញការបំពុលបរិយាកាស (decarbonization)ជាដើម។

ក្រុមហ៊ុនក៏បានលើកឡើងផងដែរអំពីបញ្ហាឧស្សាហកម្ម និងទីផ្សារពិភពលោកដែលនឹងអាចនៅតែមានភាពមិនប្រាកដប្រជាសម្រាប់ពេលវេលាដែលនៅសេសសល់ក្នុងឆ្នាំ២០២៤នេះ។ យ៉ាងណាក៏ដោយ ក្រុមហ៊ុនបានបញ្ជាក់ថា នឹងនៅតែបន្តបង្កើតយន្តការសម្រាប់ភាពបន្តនៃអាជីវកម្មសកល និងប្រតិបត្តិការដ៏រហ័សរហួនយ៉ាងមានទំនុកចិត្តដើម្បីសម្រេចឲ្យបានតាមគោលដៅអាជីវកម្មប្រចាំឆ្នាំ និងសម្រេចបាននូវកំណើនប្រកបដោយចីរភាព។

តាមពិត ភាពជោគជ័យរបស់ Huawei ក្នុងដំណើរវិលត្រឡប់លើកនេះត្រូវបានបង្ហាញតាំងតែពីឆ្នាំ២០២៣មកម្ល៉េះ។ របាយការណ៍នៃប្រាក់ចំណូលកាលពីឆ្នាំកន្លងទៅគឺជាអត្រាកើនឡើង
ខ្ពស់បំផុតក្នុងរយៈពេល៤ឆ្នាំចុងក្រោយ។ ពោល ក៏ដោយសារតែការស្ទុះងើបឡើងវិញនៃប្រតិបត្តិការទិញពីសំណាក់អតិថិជនថ្មីរបស់ខ្លួនទៅលើគ្រប់ប្រភេទអាជីវកម្ម និងផលិតផលថ្មីៗរបស់ខ្លួនផ្សេងទៀត។

គួរឲ្យដឹងដែរថា ការងើបឡើងវិញរបស់ Huawei លើកនេះ ក្រុមហ៊ុនមិនបានផ្តោតសំខាន់តែទៅលើស្មាតហ្វូនទៀតឡើយ ដោយក្នុងនោះសូម្បីតែបច្ចេកវិទ្យាបន្ទះឈីបសំភារៈប្រើប្រាស់ និងរថយន្តអគ្គិសនីជាដើម។ ដូច្នេះ អ្វីដែលគេអាចរៀនសូត្របានពីភាពជោគជ័យរបស់ Huawei ក្នុងការវិលត្រឡប់បើទោះបីជាបន្តមានសំពាធពីទណ្ឌកម្មអាមេរិកក្តី ក៏ក្រុមហ៊ុនយក្សមួយនេះអាចធ្វើខ្លួនឲ្យស្របទៅតាមបច្ចេកវិទ្យា និងតំរូវការទីផ្សារនាពេលបច្ចុប្បន្ន ដែលក្នុងនោះមានទាំងការពឹងផ្អែកលើខ្លួនឯងចំពោះបច្ចេកវិទ្យាបន្ទះឈីបនិងការផលិតរថយន្តអគ្គិសនី ដោយការចាប់យកតែទីផ្សារក្នុងស្រុកជាមុនសិន។

ជាមួយគ្នានេះ ក្នុងពេលដែលស្ថានភាពមិនច្បាស់លាស់នៃសេដ្ឋកិច្ចសកលផងនោះ Huawei ក៏បានបង្ហាញពីបទពិសោធដ៏ល្អមួយទៀតគឺការបត់បែនបានខ្លាំង និងឆាប់រហ័សទៅតាមសមត្ថភាព និងតំរូវការជាក់ស្តែងនៃទីផ្សារដែលជាឧទាហរណ៍ស្រាប់ Huawei មិនផលិតតែស្មាតហ្វូនទៀតទេ ប៉ុន្តែក៏បានចាប់យកការផលិតរថយន្តអគ្គិសនី និងការអភិវឌ្ឍប្រព័ន្ធមុខងារក្នុងរថយន្តអគ្គិសនីដើម្បីលក់បន្តជាដើម។

ចំពោះការលក់ផលិតផល និងសេវាកម្មថ្មីៗនេះ បច្ចុប្បន្ន Huawei បានចាប់ផ្តើមលក់ប្រព័ន្ធជំនួយរថយន្តអគ្គិសនីរបស់ខ្លួនទៅកាន់ក្រុមហ៊ុនផលិតរថយន្តធំៗរបស់ចិនដែលយ៉ាងហោចណាស់មានចំនួន៧មកហើយក្នុងពេលដែលខ្លួនក៏កំពុងចាប់ផ្តើមអភិវឌ្ឍ និងលក់ស្មាតហ្វូនប្រភេទ Pura 70 ជាច្រើនម៉ូដេលចូលក្នុងទីផ្សារ៕