ភ្នំពេញ ៖ ជិតដល់រដូវបុណ្យចូលឆ្នាំថ្មីប្រពៃណីខ្មែរ នៅចន្លោះពីខែកុម្ភៈ ដល់ខែមេសា បងប្អូនប្រជាសហគមន៍នៅតាមតំបន់មួយចំនួនចាប់ផ្តើមទទួលបានប្រយោជន៍ក៏ដូចជាចំណូលពីអានុផលព្រៃឈើមួយចំនួនដូចជា ផ្លែគុយ ដែលឆ្នាំនេះទទួលផលមុនគេនោះ សាវម៉ាវព្រៃ គូលេនព្រៃ សិរមាន់ ផ្លែព្រូស និងផ្លែសំរងជាដើម ដែលអាចដោះស្រាយជីវភាពគ្រួសារបានមួយកម្រិត។

លោក ឡុង ណេត ជា​ប្រជាសហគមន៍ការពារព្រៃឈើ និងទេសចរណ៍នៃសហគមន៍ភ្នំទ័ពជាង ស្ថិតនៅខេត្ត​កោះកុង បាន​ឱ្យដឹងថា ​នៅ​ឆ្នាំនេះ ប្រជាសហគមន៍ភ្នំទ័ពជាង ដែលមាន​បងប្អូន ​កូន ក្មួយ​ជាង១០០​នាក់ហើយ បានចូលព្រៃរើស​ផ្លែ​សំរងជាប្រចាំចាប់តាំងពីដើមខែមីនារហូតមក និង​លក់​ឱ្យ​ឈ្មួញកណ្ដាល ១គីឡូក្រាម ​ក្នុងតម្លៃ ១២,០០០ ទៅ​១៥០០០​រៀល​។ អ្នក​ដែល​ចូលទៅ​រើស​ផ្លែ​សំរង​ទុំ ភាគ​ច្រើនជាប្រជាពលរដ្ឋសហគមន៍ ​បងប្អូន​ជនជាតិដើម​ភាគតិច ហើយក៏មានអ្នកស៊ីឈ្នួលរើសផ្លែសំរងមួយចំនួនផងដែរ​ ដែលក្នុង​មួយ​រដូវ​ៗ គ្រួសារ​ជនជាតិដើម​ភាគតិច និងប្រជាសហគមន៍​ទាំង​នោះ​អាច​រកចំណូលបានសម្រាប់មនុស្សម្នាក់ជាមធ្យមប្រមាណ៦លាន​រៀល​​។

លោកបញ្ជាក់ថា ប្រជាសហគមន៍ដែលចូលប្រមូលសំរង ពេលចូល​ព្រៃ​ម្ដង​១ ទៅ​២ថ្ងៃ​ ហើយ​ដាក់​ម្ហូបអាហារ​ទៅ​ទទួលទាននៅគ្នុងព្រៃសហគមន៍​តែម្ដង ដោយអ្នកខ្លះក៏ធ្វើដំណើរដោយជិះ​ម៉ូតូ​ ប៉ុន្តែត្រូវបន្តធ្វើដំណើរដោយថ្មើរជើងចូលទៅកាន់ព្រៃជ្រៅទើបមានដើមសំរងធំៗ និងខ្ពស់ៗដែលមានផ្លែ ក្រោមការមើលថែ និងការពារអភិរក្ស​ពី​ម​ន្រី្ត​ភូមិ ​ឃុំ មិនឱ្យ​មាន​នរណា​កាប់​ដើមឡើយ ដើម្បីឱ្យ​ដើម​សំរងមាននិរន្តរភាព និងមិនបាត់បង់​។  

បើតាមដឹងពី លោក ឡុង ណេត ដើម​សំរងភាគច្រើនមាន​រាង​ស្រ​លូន មិនសូវមាន​មែក​បែក និង​កម្ពស់​ពី​១០ ទៅ​ ២៥​ម៉ែត្រ​។ ប្រភេទ​ឈើ​ហូប​ផ្លែ​នេះ ហុច​ផល​ចាប់ពី​អាយុ​១០ ឆ្នាំ​ឡើងទៅ​ ដោយសំរង​មួយ​ដើម អាច​ផ្តល់​ផល​បាន​ពី​១០ ទៅ​៥០​គីឡូក្រាម អាស្រ័យ​ដើម​តូច​ឬ​ធំ​។ ដោយឡែកចំពោះតម្លៃលក់រាយនៅលើទីផ្សារនាពេលបច្ចុប្បន្ននេះ អាចមានចន្លោះពី ៤៥ ០០០ ទៅ ៥៥ ០០០រៀលក្នុងមួយគីឡូក្រាម។

ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន ធ្លាប់បានឱ្យដឹងថា កាលពីដើមឡើយ​ ភាគច្រើន ផ្លែសំរង​នេះ មាន​តម្រូវការ​តែ​ក្នុង​សហគមន៍​ប៉ុណ្ណោះ ប៉ុន្តែក្រោយមកដោយសារ​ដឹងពី​អត្ថប្រយោជន៍​ច្រើន​ចំពោះ​សុខភាព ប្រជាជន​តាម​សហគមន៍ចាប់ផ្តើម​ប្រមូល​ផល និង​ចែកចាយ​សំរងទៅ​តំបន់​ផ្សេងៗ​នៅ​ទូទាំងប្រទេស និង​ឈាន​ដល់ការនាំចេញទៅប្រទេសជិតខាង​ទៀតផង​។ ដោយសារតែទីផ្សារផ្លែសំរងមានតម្រូវការ បានធ្វើឱ្យការប្រមូលផលអនុផលព្រៃឈើមួយនេះប្រាសចាកពីសីលធម៌ ដែលមិនមែនប្រមូលផលដោយការរើសយកផ្លែទុំដែលជ្រុះមោះទេ ប៉ុន្តែអាចសកម្មភាពកាប់ដើមរំលំ ដែលជាបញ្ហាប្រឈម​នឹង​ការ​អន្តរាយ និង​ការបាត់បង់​ពូជ ដោយសារតែ​ការកាប់បំផ្លាញដើម្បី​ផលប្រយោជន៍។ ក្នុងន័យនេះ ​ក្រសួងបរិស្ថាន បានអំពាវនាវ​ឱ្យ​ពលរដ្ឋ ក៏ដូចជាប្រជាសហគមន៍ ចូលរួម​ការពារ​ដើម​សំរង និង​ប្រមូល​ផល​តាមបែប​ធម្មជាតិ ​ដែលមាន​និរន្តរភាព ដោយការ​រើស​ផ្លែ​ទុំ​ជ្រុះ ឬ​អង្រួន​។

សូមជម្រាបថា ថ្មីៗនេះអង្គការសត្វព្រៃ និងរុក្ខជាតិកម្ពុជា ក្នុងកិច្ចសហការជាមួយមន្ទីរបរិស្ថានខេត្តរតនគិរី បានរៀបចំសិក្ខាសាលាស្តីពីការផ្ទៀងផ្ទាត់ទិន្នន័យអនុផលព្រៃឈើ និងការធ្វើផែនការអភិវឌ្ឍន៍ជីវភាពសហគមន៍​នៅក្នុងឧទ្យានជាតិវីរៈជ័យ ស្រុកវឺនសៃ និងស្រុកតាវែង ក្នុងខេត្តរតនគិរី និងស្រុកសៀមបាង ក្នុងខេត្តស្ទឹងត្រែង ដោយមានបំណងធ្វើការបញ្ជាក់លើអនុផលព្រៃឈើ (NTFPs) និងផ្លែសំរង ជាអនុផលព្រៃឈើសំខាន់ សម្រាប់ការអភិវឌ្ឍន៍ខ្សែច្រវាក់តម្លៃ ការកំណត់ផែនទីតំបន់ប្រមូលអនុផលព្រៃឈើ និងវាយតម្លៃលើរចនាសម្ព័ន្ធប្រមូលផល ការពិភាក្សាពីលទ្ធផលការវិភាគទីផ្សារ និងយុទ្ធសាស្ត្រចូលទៅក្នុងទីផ្សារនៃផលិ​តផលសំរង៕