ភ្នំពេញ៖ ដោយផ្អែកលើគោលនយោបាយអភិវឌ្ឍបច្ចេកវិទ្យាហិរញ្ញវត្ថុកម្ពុជា ២០២៣-២០២៨ របស់រាជរដ្ឋាភិបាល បច្ចេកវិទ្យាហិរញ្ញវត្ថុបាន និងកំពុងដើរតួនាទីយ៉ាងសំខាន់ក្នុងការជំរុញវឌ្ឍនភាពសេដ្ឋកិច្ចឌីជីថលប្រកបដោយចីរភាព និងលើកស្ទួយការបំផុសនូវរចនាសម្ព័ន្ធដ៏ប្រសើរមួយសម្រាប់វិស័យហិរញ្ញវត្ថុ។

ជាមួយគ្នានេះ ដើម្បីលើកស្ទួយបច្ចេកវិទ្យាហិរញ្ញវត្ថុក្នុងប្រទេសកម្ពុជា «កម្មវិធីនវានុវត្តន៍បញ្ច្រាស» ដែលភាសាអង់គ្លេសហៅថា «Reverse Innovation» បានត្រូវបង្កើតឡើង ហើយរដូវកាលទី៤បានចាប់ផ្តើមជាថ្មីនាដើមខែកញ្ញា ឆ្នាំ២០២៤នេះ។

ឯកឧត្តមបណ្ឌិត តាំង ងួនលី នាយកប្រតិបត្តិនៃមជ្ឈមណ្ឌលបណ្តុះធុរកិច្ចថ្មី “តេជោ”បានថ្លែងថា៖ កម្មវិធីនវានុវត្តន៍បញ្ច្រាសរដូវកាលទី ៤ ត្រូវបានរចនាឡើងដើម្បីជំរុញឱ្យមានការរួមសហការ បង្កើនជំនាញ និងលើកស្ទួយនូវការអភិវឌ្ឍផ្សេងៗនៅក្នុងទិដ្ឋភាពបច្ចេកវិទ្យាហិរញ្ញវត្ថុក្នុងប្រទេសកម្ពុជា។

ឯកឧត្តមបណ្ឌិតបានឱ្យដឹងថា៖

«កម្មវិធីនវានុវត្តន៍បញ្រ្ចាស រដូវកាលទី ៤ គឺជាកម្មវិធីពន្លឿនអាជីវកម្មមួយដែលត្រូវបានរៀចំឡើងដោយផ្ដោតលើប្រធានបទបច្ចេកវិទ្យាហិរញ្ញវត្ថុជាចំបង ដោយក្នុងនោះស្ថាប័នធំៗ ឬអ្នកដឹកនាំនៃឧស្សាហកម្ម ធ្វើការចែករំលែកអំពីបញ្ហាប្រឈមរបស់ខ្លួនដើម្បីឱ្យធុរកិច្ចថ្មីស្វែងរក និងអភិវឌ្ឍនូវសេវាកម្ម ឬផលិតផលណាមួយ ដែលអាចក្លាយជាដំណោះស្រាយសម្រាប់បញ្ហាប្រឈមទាំងនោះ»។

លោកអ្នកអាចធ្វើការដាក់ពាក្យចូលរួមកម្មវិធីនវានុវត្តន៍បញ្ច្រាសរដូវកាលទី ៤ តាមរយៈ ៖ https://ri.techostartup.center/ ចាប់ពីថ្ងៃនេះរហូតដល់ថ្ងៃទី ៣ ខែកញ្ញា ឆ្នាំ២០២៤។បេក្ខជនដែលមានសិទ្ធិចូលរួមកម្មវិធីនេះបាន អាចជាក្រុមធុរកិច្ចថ្មី, អ្នកអភិវឌ្ឍកម្មវិធី, ឬ នវានុវត្តជន ដែលបានចងក្រងជាក្រុមស្រាប់ ហើយតម្រូវឱ្យសមាជិកចាប់ពី ៣ នាក់ឡើងទៅ ហើយក្នុងករណីដែលមានធុរកិច្ចថ្មីដែលបានចូលក្នុងទីផ្សាររួច ធុរកិច្ចថ្មីនោះត្រូវមានអាយុមិនលើសពី ៥ ឆ្នាំ។

ឯកឧត្តម តាំង ងួនលី បានបញ្ជាក់ថា៖ បេក្ខជនក្នុងកម្មវិធីនឹងទទួលបានអត្ថប្រយោជន៍ជាច្រើនដូចជា៖ ១) ការបណ្ដុះបណ្ដាល និង ការតម្រង់ទិសពីអ្នកជំនាញ, ២) ការបង្កើតបណ្ដាញទំនាក់ទំនងជាមួយដៃគូពាក់ព័ន្ធផ្សេងៗ, ៣) ការិយាល័យធ្វើការរួមគ្នា និង ការគាំទ្រហេដ្ឋារចនាសម្ព័ន្ធ ដូចជាការសាកល្បងការទូទាត់ប្រាក់ឌីជីថល (Digital Payment Sandbox), CamDX, CamDigiKey, Khmer OCR, Semantic Search, ការចុះឈ្មោះអាជីវកម្មតាមប្រព័ន្ធអនឡាញ, ថ្នាលឌីជីថលធុរកិច្ចថ្មីកម្ពុជា, ៤) ឱកាសទទួលបានឥណទានពពក ដើម្បីប្រើប្រាស់សេវាកម្ម AWS ដែលមានតម្លៃស្មើនឹង ៥ ពាន់ដុល្លារ, ៥) ទំនាក់ទំនងជាមួយភាគីពាក់ព័ន្ធក្នុងប្រព័ន្ធអេកូឡូស៊ីធុរកិច្ចថ្មី និង ៦) ការទទួលបានទុនវិនិយោគដែលមិនយកភាគហ៊ុនសរុប ១២៨ លានរៀលទៀតផង។

បេក្ខជនក្នុងកម្មវិធីនឹងទទួលបានអត្ថប្រយោជន៍ជាច្រើនដូចជា៖ ១) ការបណ្ដុះបណ្ដាល និង ការតម្រង់ទិសពីអ្នកជំនាញ, ២) ការបង្កើតបណ្ដាញទំនាក់ទំនងជាមួយដៃគូពាក់ព័ន្ធ ផ្សេងៗ, ៣) ការិយាល័យធ្វើការរួមគ្នា និង ការគាំទ្រហេដ្ឋារចនាសម្ព័ន្ធ ដូចជាការសាកល្បងការទូទាត់ប្រាក់ឌីជីថល (Digital Payment Sandbox), CamDX, CamDigiKey, Khmer OCR, Semantic Search, ការចុះឈ្មោះអាជីវកម្មតាមប្រព័ន្ធអនឡាញ, ថ្នាលឌីជីថលធុរកិច្ចថ្មីកម្ពុជា, ៤) ឱកាសទទួលបានឥណទានពពក ដើម្បីប្រើប្រាស់សេវាកម្ម AWS ដែលមានតម្លៃស្មើនឹង ៥ ពាន់ដុល្លារ, ៥) ទំនាក់ទំនងជាមួយភាគីពាក់ព័ន្ធក្នុងប្រព័ន្ធអេកូឡូស៊ីធុរកិច្ចថ្មី និង ៦) ការទទួលបានទុនវិនិយោគដែលមិនយកភាគហ៊ុនសរុប ១២៨ លានរៀលទៀតផង។

គួរបញ្ជាក់ផងដែរថា កម្មវិធីនវានុវត្តន៍បញ្រ្ចាសរដូវកាលទី ៤ ត្រូវបានរៀបចំដោយ ក្រសួងសេដ្ឋកិច្ច និងហិរញ្ញវត្ថុ និងមជ្ឈមណ្ឌលបណ្ដុះធុរកិច្ចថ្មី “តេជោ”, ដោយមានកិច្ចសហការរៀបចំកម្មវិធីដោយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងសហគ្រិនខ្មែរ។

ក្នុងពិធីប្រកាសកម្មវិធីនវានុវត្តន៍បញ្រ្ចាសរដូវកាលទី៤នេះដែរ មជ្ឈមណ្ឌលបណ្ដុះធុរកិច្ចថ្មី “តេជោ” ក៏បានចុះហត្ថលេខាលើអនុស្សរណៈយោគយល់គ្នាជាមួយក្រុមហ៊ុន វីសា (Visa) ដើម្បីផ្តោតលើកិច្ចសហការលើឌីជីថលនីយកម្ម និងបច្ចេកវិទ្យា សម្រាប់ធ្វើការគាំទ្រដល់អាជីវកម្ម និងធុរកិច្ចថ្មីនៅកម្ពុជា៕