សៀមរាប ៖ តាមរយៈក្រុមហ៊ុន ជីប ម៉ុង ដែលជាដៃគូសហការផ្ដាច់មុខរបស់ GUMBALL 3000 ក្នុងការរៀបចំព្រឹត្តិការណ៍ដ៏មហស្ចារ្យ និងជាលើកដំបូងនៅកម្ពុជា បន្ទាប់ពីបញ្ចប់ពិធីក្រុងពាលីនៅមុខប្រាសាទអង្គរធំក្រោមវត្តមានថ្នាក់ដឹកនាំសំខាន់នៅពីក្រោយការរៀបចំមហាព្រឹត្តិការណ៍នេះនារសៀលថ្ងៃទី៣១ ខែកញ្ញា ឆ្នាំ២០២៤នោះ នៅព្រឹកថ្ងៃទី០១ ខែកញ្ញា នេះ រថយន្តទំនើបៗប្រភេទ Sportcar Supercar Hypercar និងរថយន្តផ្សេងៗទៀត ដែលមានតម្លៃរហូតដល់ខ្ទង់លានដុល្លារសរុបប្រមាណជាង១០០គ្រឿង បានបង្ហាញវត្តមានគួរឱ្យភ្ញាក់ផ្អើល និងទទួលបានការចាប់អារម្មណ៍យ៉ាងខ្លាំងពីសំណាក់ប្រជាពលរដ្ឋ ក៏ដូចជាបណ្តាភ្ញៀវទេសចរជាតិ – អន្តរជាតិយ៉ាងកុះករ។

នៅព្រឹកថ្ងៃទី០១ ខែកញ្ញា ឆ្នាំ២០២៤នេះផងដែរ ម្ចាស់រថយន្តទំនើបៗដែលមានវត្តមាននៅក្នុងព្រឹត្តិការណ៍ Gumball 3000​ បានបង្ហាញពីទេពកោសល្យក្នុងការបញ្ជារថយន្តរបស់ខ្លួននៅលើទីលាននៃអាកាសយានដ្ឋានអន្តរជាតិ (ព្រលានចាស់) ដោយមានអ្នកចូលរួមទស្សនារាប់ពាន់នាក់ ដោយក្នុងនោះក៏មានវត្តមានរបស់កំពូលអ្នកប្រណាំងរថយន្តស្រីប្រចាំប្រទេសម៉ាឡេស៊ី អ្នកនាង លីអូណា ជីន ផងដែរ។

គួរបញ្ជាក់ដែរថា តាមកម្មវិធីដែលបានគ្រោងទុក រថយន្តទំនើបៗរួមមាន Supercar Hypercar Sportcar ប្រមាណ ១៣០ ទៅ ១៥០ គ្រឿង មកពីបណ្ដាប្រទេសជាង ៤០ ចម្រុះដោយ ៤០ជាតិសាសន៍ផ្សេងៗគ្នា នឹងធ្វើដំណើរមកកាន់ប្រទេសកម្ពុជា ក្នុងព្រឹត្តិការណ៍ GUMBALL 3000 Rally នៅថ្ងៃទី១៥ រហូតដល់ថ្ងៃទី ១៧ ខែកញ្ញា ឆ្នាំ២០២៤នេះ ដែលប្រជុំដោយបុគ្គលមានឥទ្ធិពលជាច្រើន មានអ្នកតាមដានរាប់លាននាក់ លើប្រព័ន្ធផ្សព្វផ្សាយនេះ នឹងមកបង្កើតទំព័រប្រវត្តិសាស្ត្រជាច្រើនក្នុងប្រទេសកម្ពុជា ដែលជាឱកាសដ៏វិសេសវិសាលមួយក្នុងការផ្សព្វផ្សាយ ពីប្រទេសកម្ពុជា ទៅកាន់ពិភពលោក។

នៅថ្ងៃទី១៥ ខែកញ្ញា ឆ្នាំ ២០២៤ នេះ ក្បួនរថយន្តរបស់សមាជិក GUMBALL 3000 ប្រមាណ ១៣០ ទៅ ១៥០គ្រឿង រួមជាមួយរថយន្តទំនើបៗរបស់អ្នកចូលក្នុងប្រទេសកម្ពុជា ប្រមាណជាង ៣០០គ្រឿងទៀត នឹងធ្វើការចត នៅបរិវេណវិមានឯករាជ្យ រហូតដល់ជិតរង្វង់មូលសម្ដេចព្រះសង្ឃរាជ ជួន ណាត រយៈពេលជាង ១ម៉ោង ចាប់ពីម៉ោង ២រសៀល ដើម្បីឱ្យមហាជនបានទស្សនា ក៏ដូចជាផ្ដិតយករូបភាពដ៏អស្ចារ្យបំផុតក្នុងប្រវត្តិសាស្ត្រ។ ដោយឡែក នៅថ្ងៃទី១៧ ខែកញ្ញា ឆ្នាំ២០២៤ ក្បួនរថយន្ត GUMBALL 3000 នឹងធ្វើការចត នៅមុខប្រាសាទអង្គរ ដើម្បីបំបែកឯកគ្គទកម្មពិភពលោក ដែលនេះគឺជាលើកដំបូងក្នុងប្រវត្តិសាស្ត្រហើយ ដែលរថយន្តទំនើបៗរាប់រយគ្រឿង បានចតនៅមុខប្រាសាទអង្គរ។ តាមរយៈរូបភាពដ៏អស្ចារ្យនេះនឹងត្រូវបានផ្សព្វផ្សាយយ៉ាងទូលំទូលាយទៅកាន់ពិភពលោក ហើយនេះជាផលចំណេញដ៏ធំសម្រាប់ប្រទេសកម្ពុជា ក្នុងការផ្សព្វផ្សាយវិស័យទេសចរណ៍៕