សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ: ទីភ្នាក់ងារជាតិមុខរបរ និងការងារ(NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជារាជធានីភ្នំពេញ សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) អង្គការអន្តរជាតិខាងការងារ (ILO) និងអង្គការភីផលអីននិត (People in Need Cambodia) គាំទ្រដោយដៃគូពាក់ព័ន្ធជាច្រើនទៀត នឹងរៀបចំ “ពិព័រណ៍ការងារ និងផលិតភាពជាតិឆ្នាំ២០២៣” នៅអាគារពាណិជ្ជកម្ម និងពិព័រណ៍កោះពេជ្រ រយៈពេល២ថ្ងៃជាប់គ្នា គឺនៅថ្ងៃទី១០-១១ ខែវិច្ឆិកា ឆ្នាំ២០២៣ ខាងមុខនេះ ចាប់ពីម៉ោង ៨ព្រឹក ដល់ម៉ោង ៨យប់។
ថ្លែងក្នុងសន្និសីទសារព័ត៌មាន នៅក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី១៩ ខែតុលានេះ ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យរបស់ក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ពិព័រណ៍ការងារ និងផលិតភាពជាតិឆ្នាំ២០២៣នេះ មានការចូលរួមពីសំណាក់ក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំបណ្តុះបណ្តាលចំនួនប្រមាណ ១៥០ ហើយមានស្តង់សរុបជាង ១៨០ ដែលនឹងដាក់តាំងបង្ហាញពីឱកាសការងារយ៉ាងច្រើនសម្បូរបែប នឹងផ្តល់ឱកាសការងាររហូតដល់ជាង ២ម៉ឺនកន្លែង ហើយក្រសួងរំពឹងថា នឹងមានអ្នកចូលរួមប្រមាណជាង ៣០ ០០០នាក់។
ឯកឧត្តម រដ្ឋលេខាធិការ បញ្ជាក់ទៀតថា គោលបំណងសំខាន់ៗនៃការការៀបចំពិព័រណ៍ការងារ និងផលិតភាពជាតិឆ្នាំ២០២៣ នាពេលនេះ គឺដើម្បីបន្តរក្សាតុល្យភាពក្នុងទីផ្សារការងារតាមរយៈការជួយជ្រោមជ្រែងនិយោជក ដែលមានតម្រូវការជ្រើសរើសកម្លាំងពលកម្ម និងអ្នកស្វែងរកការងារធ្វើ បង្កើតឱ្យមានកន្លែងជួបជុំគ្នាដ៏ធំ និងងាយស្រួលរវាងអ្នកស្វែងរកការងារ និយោជក អ្នកផ្តល់ការអប់រំបណ្ដុះបណ្ដាល និងដៃគូពាក់ព័ន្ធនានា ដើម្បីធ្វើការផ្លាស់ប្ដូរ និងចែករំលែកព័ត៌មានទីផ្សារការងារ ហើយក៏មានការរៀបចំផង ដែលនូវសិក្ខាសាលាផលិតភាព ដើម្បីលើកកម្ពស់ការយល់ដឹងស្តីពីការបង្កើនផលិតភាពការងារដោយមានការចែករំលែកចំណេះដឹង និងបទពិសោធន៍ពីវាគ្មិនជំនាញជាច្រើន។ ក្នុងចំណោមឱកាសការងារប្រមាណ២ម៉ឺនកន្លែងនោះ វិស័យធនាគារនិងមីក្រូហិរញ្ញវត្ថុ ក៏បានចូលរួមចំណែកផ្តល់ឱកាសការងារជាច្រើនដល់យុវជន និស្សិត និងអ្នកស្វែងរកការងារធ្វើផងដែរ។
លោកស្រី ស៊ឹម ឡែនម៉ាលី ប្រធានជាន់ខ្ពស់ផ្នែកជ្រើសរើសបុគ្គលិកនៃធនាគារព្រីនស៍ ម. ក បានឱ្យដឹងថា នៅក្នុងពិព័រណ៍ការងារលើកនេះ ធនាគារព្រីនស៍ផ្តល់ឱកាសការងារជិត១០០នាក់ និងត្រៀមផ្តល់ព័ត៌មាន និងចែករំលែកបទពិសោធន៍ដល់និស្សិតដែលកំពុងស្វែងរកការងារធ្វើទៀតផង។
ជាមួយគ្នានេះដែរ លោក ហុង សុវណ្ណតារា ប្រធាននាយកនៃនាយកដ្ឋានសេវាកម្មធនធានមនុស្សធនាគារកាណាឌីយ៉ា បានឱ្យដឹងថាកាណាឌីយ៉ា នឹងផ្តល់ឱកាសការងារជាច្រើន ដែលរួមមានតាំងពីតំណែង Teller សេវាកម្មអតិថិជន រហូតដល់ជំនាញអ្នកហាត់ការ។
ក្នុងនាមជាអ្នកឧបត្ថម្ភធំចំពោះពិព័រណ៍ការងារ និងផលិតភាពជាតិឆ្នាំ២០២៣ ធនាគារកាណាឌីណា ក៏បានរៀបចំស្តង់ដ៏ធំដើម្បីត្រៀមទទួលនិងផ្តល់ពត៌មានក៏ដូចជាឱកាសការងារដល់និស្សិតនិងអ្នកដែលកំពុងរកការងារធ្វើផងដែរ។ យ៉ាងណាមិញ ក្នុងវេទិការពិព័រណ៍នេះនឹងមានវត្តមានរបស់ស្ថាប័នធនាគារ និងមីក្រូហិរញ្ញវត្ថុក្នុងស្រុកជាច្រើនដូចជា ធនាគារអ៊ូរី ធនាគារ ខេប៊ីប្រាសាក់ មីក្រូហិរញ្ញវត្ថុអម្រឹត និងធនាគារមួយចំនួនទៀត។
គួរបញ្ជាក់ផងដែរថា ពិព័រណ៍ការងារ និងផលិតភាពជាតិនេះ ក៏នឹងមានរៀបចំសិក្ខាសាលាផលិតភាពជាតិ ដើម្បីលើកកម្ពស់ការយល់ដឹងអំពីផលិតភាពការងារ តាមរយៈការចែករំលែកចំណេះដឹង បទពិសោធន៍ល្អៗពីសំណាក់វាគ្មិនជំនាញ។ លើសពីនេះ ពិព័រណ៍ការងារ និងផលិតភាពជាតិ ឆ្នាំ២០២៣ ក៏នឹងត្រូវរៀបចំតាមប្រព័ន្ធអនឡាញផងដែរ ដែលអ្នកស្វែងរកការងារធ្វើនៅទូទាំងប្រទេស អាចដាក់ពាក្យស្វែងរកការងារធ្វើតាមប្រព័ន្ធអនឡាញបានតាមរយៈ គេហទំព័រពិព័រណ៌ការងារ http://careerfair.nea.gov.kh/ ៕ អត្ថបទដោយ ៖ ញ៉ែម សុផល
Account
Security
Favourite Content