បរទេស ៖ យោងតាមប្រភពពី Weforum បានបង្ហាញថា អ៊ីដ្រូសែន ជាមធ្យោបាយសំខាន់ក្នុងការកាត់បន្ថយការបំភាយឧស្ម័នសកល និងជួយដល់វិស័យជាច្រើនដូចជាការដឹកជញ្ជូនតាមផ្លូវឆ្ងាយ និងឧស្សាហកម្មធុនធ្ងន់។

ទីភ្នាក់ងារថាមពលអន្តរជាតិ (IEA) បាននិយាយថា អ៊ីដ្រូសែនគឺជាផ្នែកសំខាន់កាន់តែខ្លាំងឡើងនៃការបំភាយសូន្យសុទ្ធនៅឆ្នាំ២០៥០។ លើសពីនេះ បំពង់បង្ហូរមានសារៈសំខាន់សម្រាប់ការពង្រីកការប្រើប្រាស់អ៊ីដ្រូសែន និងការផ្លាស់ប្តូរថាមពល។ យ៉ាងណាមិញ ការដឹកជញ្ជូន ឬផ្លាស់ទីអ៊ីដ្រូសែនពីអ្នកផលិតទៅអ្នកប្រើប្រាស់នៅមានកម្រិត។

ទន្ទឹមនឹងនេះ អឹរ៉ុបមានបំពង់បង្ហូរអ៊ីដ្រូសែននេះមានប្រវែងប្រហែល ១ ៦០០ គីឡូម៉ែត្ររួចទៅហើយ។ លើសពីនេះ បំពង់អ៊ីដ្រូសែនថ្មី ឬ SoutH2 ដែលជាបំពង់បង្ហូរអ៊ីដ្រូសែនដែលត្រៀមរួចជាស្រេចក្នុងការតភ្ជាប់អាហ្វ្រិកខាងជើងទៅអឺរ៉ុបកណ្តាល ហើយវាទទួលការគាំទ្រពីក្រសួងថាមពលអ៊ីតាលី អូទ្រីស និងអាល្លឺម៉ង់សម្រាប់ការអភិវឌ្ឍន៍របស់ខ្លួននៅក្នុងសហភាពអឺរ៉ុប និងសម្រាប់គម្រោងហេដ្ឋារចនាសម្ព័ន្ធរៀងៗខ្លួន។

មិនត្រឹមតែប៉ុណ្ណោះ បំពង់បង្ហូរអ៊ីដ្រូសែន SouthH2 ក៏ភ្ជាប់ទៅអាហ្វ្រិកខាងជើងផងដែរ ដោយអាចផ្តល់អ៊ីដ្រូសែន ៤០ ភាគរយក្រោមគោលដៅ RePowerEU របស់សហភាពអឺរ៉ុប ដើម្បីសម្អាតប្រព័ន្ធថាមពល។ ប្លុកនេះមានគោលបំណងនាំចូលអ៊ីដ្រូសែនចំនួន ១០ លានតោន និងផលិតចំនួន ១០ លានតោនទៀតនៅឆ្នាំ២០៣០។ បន្ថែមពីនេះ អឺរ៉ុបមានបំណងបង្កើតបំពង់បង្ហូរ SoutH2 ជាផ្នែកមួយនៃផែនការ European Backbone Hydrogen របស់អឺរ៉ុប ដែលគាំទ្រដល់ផែនការថាមពលស្អាតរបស់ទ្វីបនេះ។ ផែនការនេះគម្រោងសាងសង់បំពង់បង្ហូរអ៊ីដ្រូសែនប្រវែង ១១ ៦០០ គីឡូម៉ែត្រនៅឆ្នាំ ២០៣០ និងប្រហែល ៤ ០០០គីឡូម៉ែត្រនៅឆ្នាំ ២០៤០។ លើសពីនេះផងដែរ ខ្សែបំពង់បង្ហូរនៅក្រោមសមុទ្រពី Barcelona ប្រទេសអេស្ប៉ាញទៅកាន់ Marseille ប្រទេសបារាំងក៏កំពុងត្រូវបានគ្រោងទុកផងដែរ ហើយមានគម្រោងពង្រីកវាទៅប្រទេសអាល្លឺម៉ង់ថែមទៀតផង។

គំនិតផ្តួចផ្តើម European Backbone Hydrogen បានធ្វើឱ្យអឺរ៉ុបនាំមុខតំបន់ផ្សេងទៀតនៅក្នុងចំណាត់ថ្នាក់ការធ្វើផែនការបំពង់បង្ហូរអ៊ីដ្រូសែន។ បំពង់បង្ហូរប្រេង Holstebro-Hamburg នៅប្រទេសដាណឺម៉ាក និងអាឡឺម៉ង់ ត្រូវបានរំពឹងថានឹងមានចម្ងាយ ៤៥០ គីឡូម៉ែត្រ ជា​មូលហេតុ​ដែល​ដាណឺម៉ាក​កំពុង​ស្ថិត​នៅ​លើ​ផ្លូវ​ដើម្បី​ឈាន​មុខ​គេ​នៅ​អឺរ៉ុប។
ជាមួយគ្នានេះ គេរំពឹងថា វានឹងមានចំណែក ៣៥ ភាគរយនៃបំពង់បង្ហូរអ៊ីដ្រូសែនថ្មីសរុបរបស់ពិភពលោកនៅចន្លោះឆ្នាំ២០២២ និង ២០២៦ ឬ អាចមានចម្ងាយរហូតដល់ ៨០០ គីឡូម៉ែត្រ។ ការផលិតថាមពលខ្យល់ដ៏ធំទូលាយរបស់ដាណឺម៉ាក បានធ្វើឱ្យប្រទេសនេះស្ថិតក្នុងទីតាំងរឹងមាំដើម្បីក្លាយជាអ្នកផលិតអ៊ីដ្រូសែនពណ៌បៃតងកំពូលនៅអឺរ៉ុប។ លើសពីនេះ ថាមពលខ្យល់មានចំណេកក្នុងការផលិតអគ្គិសនីបាន ៥៥ ភាគរយ ដែលខ្ពស់ជាងប្រទេសដទៃទៀត។ បំពង់បង្ហូរអ៊ីដ្រូសែនផ្សេងទៀតត្រូវបានគ្រោងទុករួមមានផ្លូវ Snam Hydrogen របស់ប្រទេសអ៊ីតាលីដែលមានចម្ងាយដល់ទៅ ៤៤០ គីឡូម៉ែត្រ។

ដោយឡែក នៅខាងអាស៊ីវិញ បំពង់បង្ហូរអ៊ីដ្រូសែននៅអាស៊ីទាំងអស់កំពុងត្រូវបានសាងសង់នៅក្នុងប្រទេសចិន ដោយវាមានគម្រោងសម្រាប់ខ្សែចំនួន ៣ ដែលមានឈ្មោះថា Ulanqab Beijing, Shandong Hydrogen និង Ningxia Hui Hydrogen ។ លើសពីនេះ ច្រករបៀងសេដ្ឋកិច្ចឥណ្ឌា-មជ្ឈិមបូព៌ា-អឺរ៉ុបដែលបានគ្រោងទុក ត្រូវបានគេរំពឹងថាអាចនឹងរួមបញ្ចូលបំពង់បង្ហូរអ៊ីដ្រូសែនផងដែរ ដោយមានគោលបំណងនាំចេញទៅកាន់សហភាពអឺរ៉ុប។

នៅខាងមជ្ឈិមបូព៌ាវិញ ពួកគេបានបង្កើនសមត្ថភាពអ៊ីដ្រូសែនស្អាតដែលបានគ្រោងទុកច្រើនជាងពីរដងកាលពីឆ្នាំមុន ហើយមានគោលបំណងចង់ក្លាយជាអ្នកនាំចេញដ៏សំខាន់ទៅកាន់ប្រទេសផ្សេងទៀតនៅឆ្នាំ២០៣០។ ប្រទេសអូម៉ង់ បាននាំមុខគេដោយខ្លួនកំពុងរៀបចំខ្សែបង្ហូរ ១ ០០០ គីឡូម៉ែត្រពីខាងត្បូងទៅខាងជើងប្រទេស ខណៈដែលអារ៉ាប៊ីសាអូឌីតចង់ក្លាយជាអ្នកផ្គត់ផ្គង់អ៊ីដ្រូសែនដ៏ធំបំផុតរបស់ពិភពលោក៊។ អារ៉ាប់រួម និង កាតា ក៏កំពុងធ្វើការដើម្បីបង្កើនសមត្ថភាពដើម្បីបំពេញតម្រូវការពិភពលោកដែលកំពុងកើនឡើងផងដែរ។

នៅអាមេរិកខាងជើងវិញ ទាំងសហរដ្ឋអាមេរិក និងកាណាដា កំពុងសម្លឹងមើលគម្រោងបំពង់បង្ហូរអ៊ីដ្រូសែនផងដែរ។ សហរដ្ឋអាមេរិកមានបំពង់បង្ហូរអ៊ីដ្រូសែនប្រវែង ១ ៦០០ គីឡូម៉ែត្រ ហើយគំនិតផ្តួចផ្តើម HyBlend របស់ខ្លួនកំពុងស្វែងរកវិធីប្រើប្រាស់បំពង់បង្ហូរឧស្ម័នធម្មជាតិដែលមានស្រាប់ដើម្បីដឹកជញ្ជូនអ៊ីដ្រូសែន។ គម្រោងមួយក្នុងទីក្រុងកេបិចរំពឹងថានឹងជួយកាត់បន្ថយការបំភាយកាបូនក្នុងតំបន់ ៣ ភាគរយក្នុងទសវត្សរ៍នេះ។ ទន្ទឹមនឹងនេះ IEA និយាយ​ថា សក្ដានុពល​ដ៏ច្រើន​របស់​អាមេរិកឡាទីន​ក្នុង​ការ​ផលិត​ថាមពល​កកើត​ឡើង​វិញ​មាន​ន័យ​ថា​ វា​អាច​ជា​ប្រភព​ឈាន​មុខ​គេ​នៃការផលិត​កាបូនអ៊ីដ្រូសែន​ទាប និង​តម្លៃ​ទាប។ នៅអាមេរិកខាងត្បូង ឈីលីជឿថា ខ្លួនអាចផលិតអ៊ីដ្រូសែនតម្លៃទាបបំផុតរបស់ពិភពលោកនៅឆ្នាំ ២០៣០ ហើយចង់ក្លាយជាប្រទេសនាំចេញអ៊ីដ្រូសែនកំពូលទាំងបីនៅឆ្នាំ ២០៤០។ ឈីលីកំពុងសម្លឹងមើលពីរបៀបដែលបំពង់បង្ហូរឧស្ម័នធម្មជាតិអាចប្រើដើម្បីផ្លាស់ទីដោយសុវត្ថិភាព ដែលអនុញ្ញាតឱ្យអ៊ីដ្រូសែនបញ្ចូលគ្នាជាមួយឧស្ម័នធម្មជាតិផ្សេងទៀតបាន៕