ភ្នំពេញ ៖ ជាការពិត ការចូលរួមនៅក្នុងកម្មវិធីរៀបអាពា៍ពិពាហ៍ តម្រូវឱ្យមានការចំណាយថវិកាច្រើនគួរសម ជាពិសេស​សម្រាប់​នារីៗតែម្ដងទៅលើការទិញសម្លៀកបំពាក់ និងការតុបតែងខ្លួន បូករួមទាំងប្រាក់សម្រាប់ចំណង​ដៃទៀតផង ដែលកាន់តែធ្វើឱ្យខ្ទង់ចំណាយកើនឡើងខ្ពស់ ម្លោះហើយដើម្បីអាចកាត់បន្ថយខ្ទង់ចំណាយឱ្យបានច្រើនសម្រាប់រដូវកាលនេះ មិត្តនារីៗគួរសាកល្បងអនុវត្តនូវគន្លឹះ​មួយ​ចំនួនដូចខាងក្រោយ ៖

១. រៀនតុបតែងខ្លួន (Self Make-up)

អ្នកពិតជាអាចកាត់បន្ថយចំណាយបានច្រើន ប្រសិនបើអ្នកចេះតុបតែងខ្លួនដោយ​ខ្លួនឯង ដោយមិនចាំបាច់ចូលហាងសាឡននោះទេ។ សាកស្រម៉ៃថា ក្នុងមួយខែអ្នកត្រូវចូលរួមវិធីមង្គលការចំនួន ៤ដង ហើយក្នុងការតុបតែងខ្លួនម្ដងៗនឹងត្រូវចំណាយអស់ ៨ម៉ឺនរៀល (២០ដុល្លារ) ។ ដូច្នេះ គិតតែថ្លៃចំណាយលើការតុបតែងខ្លួន ក្នុងមួយខែក៏ត្រូវចំណាយអស់ ៣២ម៉ឺនរៀល (៨០ដុល្លារ) បាត់ទៅហើយ។ ប៉ុន្តែផ្ទុយទៅវិញ ប្រសិនបើអ្នកចេះធ្វើវាដោយខ្លួនឯង អ្នកនឹងចំណេញថវិកា ៨០ដុល្លារក្នុងមួយខែ។

២. ច្នៃសម្លៀកបំពាក់ចាស់ៗ

បន្ទាប់ពីកាត់បន្ថយចំណាយលើការតុបតែងខ្លួនហើយ ការស្លៀកពាក់គឺជាអ្វីដែលមិត្តនារីៗត្រូវគិតគូរផងដែរ។ ជាទូទៅ សម្លៀកបំពាក់មួយឈុត មិនអាចស្លៀកលើសពី ២ ទៅ ៣ ដងនោះឡើយ ម្លោះហើយបានជានារីៗ មានតម្រូវការទិញសម្លៀកបំពាក់ចូលរួមពិធីមង្គលការញឹកញាប់ជាងបុរសៗ។ ប៉ុន្តែអ្នកក៏អាចកាត់បន្ថយចំណាយលើការទិញសម្លៀកបំពាក់នេះបានដែរ តាមរយៈការច្នៃ​សម្លៀកបំពាក់ចាស់ៗមកប្រើវិញក្នុងរូបភាពផ្សេង។ ការច្នៃនេះអាចធ្វើបានតាមភាពជាក់ស្ដែង ដូចជា ច្នៃរ៉ូបឱ្យចេញជាម៉ូតផ្សេង ការបន្ថែមគ្រឿងតុបតែងលម្អលើសម្លៀកបំពាក់ដើម្បីឱ្យប្លែក ឬក៏អាចយកសម្លៀកបំពាក់ផ្សេងៗគ្នាមកដាក់បញ្ចូលគ្នាឱ្យចេញជាឈុតថ្មីមួយជាដើម។

៣.  កាបូប និងស្បែកជើង

សម្រាប់កាបូបដៃ និងស្បែកជើងវិញហាក់មិនសូវជាចាំបាច់ក្នុងការចំណាយប្រាក់ដើម្បីទិញថ្មីប៉ុន្មានទេ។ នារីៗ ច្រើនតែមានស្បែកជើង និងកាបូបយ៉ាងតិចក៏ ២ ដែរ ។ ដូច្នេះ អ្នកអាចប្រើវិធីផ្លាស់ប្ដូរគ្នាបានឱ្យស័ក្ដិសមទៅនឹង​សម្លៀកបំពាក់ដែលបានជ្រើសរើស។

៤. រៀនយល់ពីពណ៌

បើនិយាយពីការកាត់បន្ថយចំណាយ នរណាៗក៏ចង់កាត់បន្ថយដែរ ប៉ុន្តែក៏មិនមែនមានន័យថា អ្នកត្រូវកាត់បន្ថយរហូតដល់ពិបាកចូលចុះក្នុងចំណោមនឹងគេនោះទេ។ ដូច្នេះហើយ​ ដើម្បីឱ្យការតុបតែងខ្លួនរបស់អ្នកនៅតែលេចធ្លោ បើទោះជាអ្នកប្រើប្រាស់សម្លៀកបំពាក់ចាស់ៗក៏ដោយក៏អ្នកត្រូវតែស្វែងយល់ពីពណ៌ដែរ ដើម្បីកុំឱ្យពិបាកមើលពេក។

ការស្វែងយល់អំពីពណ៌នេះ វាពិតជាសំខាន់នៅពេលអ្នកច្នៃសម្លៀកបំពាក់ ផ្គុំសម្លៀកបំពាក់ចូលគ្នា ការរើសកាបូប និងស្បែកជើង ឬសូម្បីតែការផាត់មុខ។ ដូច្នេះ អ្នកត្រូវដឹងថាពណ៍ណាត្រូវគ្នាជាមួយពណ៍ណា ជាពិសេសត្រូវដឹងថា ស្បែករបស់អ្នកត្រូវជាមួយនឹងពណ៍ណាខ្លាំងបំផុតជាដើម។ ក្រៅពីនេះ អ្នកក៏អាចស្វែងយល់អំពីពណ៌ តាមរយៈការសង្កេតមើលការស្លៀកពាក់របស់អ្នកកន្លងមក មើលការស្លៀកពាក់របស់នរណាម្នាក់ដែលអ្នកពេញចិត្ត ឬស្វែងរកតាមអ៊ីនធឺណេត៕