ភ្នំពេញ ៖ និយ័តករមូលបត្រកម្ពុជា (ន.ម.ក.) និងធនាគារអភិវឌ្ឍន៍អាស៊ី (ADB) បានសហការរៀបចំសិក្ខាសាលាស្តីពី “ការអភិវឌ្ឍ និងការវាយតម្លៃឥទ្ធិពលអាកាសធាតុសម្រាប់សញ្ញាបណ្ណនិរន្តរភាព” ដើម្បីបញ្ជ្រាបការយល់ដឹងសម្រាប់ភាគីពាក់ព័ន្ធ ជាពិសេសជំរុញកំណើន និងទំនុកចិត្តសម្រាប់ការវិវត្តឆាប់រហ័សនៃទីផ្សារសញ្ញាបណ្ណនិរន្តរភាពនៅកម្ពុជា។

និយ័តករមូលបត្រកម្ពុជា (ន.ម.ក.) និងធនាគារអភិវឌ្ឍន៍អាស៊ី (ADB) បានសហការគ្នារៀបចំសិក្ខាសាលា ស្តីពី “ការអភិវឌ្ឍ និងការវាយតម្លៃឥទ្ធិពលអាកាសធាតុសម្រាប់សញ្ញាបណ្ណនិរន្តរភាព” ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ូ សុជាតិ រដ្ឋមន្ត្រីប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ន.ម.ក. និងលោក Kosintr Puongsophol អ្នកឯកទេសជាន់ខ្ពស់ផ្នែកហិរញ្ញវត្ថុ នៃនាយកដ្ឋានស្រាវជ្រាវសេដ្ឋកិច្ច និងឥទ្ធិពលនៃការអភិវឌ្ឍ នៃ ADB កាលថ្ងៃចុងសប្ដាហ៍កន្លងទៅនេះ។

សិក្ខាសាលានេះ រៀបចំឡើងក្នុងគោលបំណងដើម្បីបញ្ជ្រាបការយល់ដឹងសម្រាប់ភាគីពាក់ព័ន្ធរួមមាន៖ ផ្សារមូលបត្រកម្ពុជា (ផមក) និងសមាគមក្រុមហ៊ុនមូលបត្រកម្ពុជា (CASF) អំពីការអភិវឌ្ឍទីផ្សារមូលបត្រប្រកបដោយនិរន្តរភាពតាមរយៈការបោះផ្សាយសញ្ញាបណ្ណនិរន្តរភាព, របាយការណ៍អំពីឥទ្ធិពលពាក់ព័ន្ធនឹងសញ្ញាបណ្ណបៃតង សង្គម និងចីរភាព ព្រមទាំងវិធីសាស្រ្ត និងធនធានដែលមាន សម្រាប់គាំទ្រ និងជំរុញការបោះផ្សាយសញ្ញាបណ្ណនិរន្តរភាពនៅកម្ពុជា។

ឯកឧត្តម ស៊ូ សុជាតិ បានកត់សម្គាល់ឃើញថា ចំណុចសំខាន់ពីរដែលត្រូវយកចិត្តទុកដាក់គឺការបន្តផ្តល់ការតម្រង់ទិស និងការបណ្តុះបណ្តាលដល់ទីផ្សារ ដែលជួយពង្រឹងសមត្ថភាពតួអង្គក្នុងទីផ្សារ និងវិនិយោគិន ក៏ដូចជាការធ្វើការជិតស្និទ្ធជាមួយផ្សារមូលបត្រកម្ពុជា និងដៃគូអភិវឌ្ឍន៍ ដើម្បីផ្តល់ភាពងាយស្រួលសម្រាប់ក្រុមហ៊ុនបោះផ្សាយ និងវិនិយោគិន តាមរយៈបទប្បញ្ញត្តិទីផ្សារ និងវេទិកាឌីជីថល។

ឯកឧត្តមរដ្ឋមន្ត្រីប្រតិភូ បានថ្លែងបន្តថា ៖

“ខណៈពេលដែលប្រទេសកម្ពុជាស្ថិតនៅក្នុងយុគសម័យទំនើបកម្មហិរញ្ញវត្ថុនេះ ខ្ញុំក៏ចង់សង្កត់ធ្ងន់លើតម្រូវការសម្រាប់ការកសាងវិជ្ជាជីវៈ និងតម្លាភាពនៅក្នុងទីផ្សារមូលបត្រ ដើម្បីជំរុញកំណើន និងទំនុកចិត្តសម្រាប់ការវិវត្តឆាប់រហ័សនៃទីផ្សារសញ្ញាបណ្ណនិរន្តរភាពនៅកម្ពុជា។”

គួរបញ្ជាក់ថា សិក្ខាសាលាខាងលើនេះ មានសមាសភាពចូលរួមពីថ្នាក់ដឹកនាំជាន់ខ្ពស់ និងមន្រ្តីនៃ ន.ម.ក., ផមក, CASF និងវាគ្មិនកិត្តិយសមកពី ADB, Bureau Veritas Group និងទីប្រឹក្សានៃវិទ្យាស្ថានអភិវឌ្ឍន៍បៃតងសកលនៅកម្ពុជា (GGGI) និងគណៈកម្មការសេដ្ឋកិច្ច និងសង្គមរបស់អង្គការសហប្រជាជាតិសម្រាប់អាស៊ី និងប៉ាស៊ីហ្វិក (UNESCAP) ដែលជាអ្នកជំនាញក្នុងវិស័យសញ្ញាបណ្ណនិរន្តរភាព និងមានអ្នកចូលរួមសរុបចំនួន ៤៧ រូប។ សិក្ខាសាលានេះ បានប្រព្រឹត្ដទៅដោយរលូនប្រកបទៅដោយប្រតិសកម្ម និងផ្លែផ្កាខ្ពស់។

សូមរំលឹកដែរថា សញ្ញា​បណ្ណ​និរន្តរភាព សំដៅ​ដល់​មូល​ប​ត្រ​បំណុល​ដែល​ត្រូវបាន​បោះ​ផ្សាយ​ដោយ​ក្រុមហ៊ុន​បោះផ្សាយ​មូល​ប​ត្រ ហើយ​សាច់ប្រាក់​ដែល​បានមកពី​ការបោះ​ផ្សាយ ត្រូវបាន​ប្រើប្រាស់ ដើម្បី​ធ្វើ​ហិរញ្ញប្បទាន ឬ​ហិរញ្ញប្បទាន​ឡើងវិញដល់​គម្រោង​ទាំងឡាយណា​ដែលមាន​បញ្ចូល​គ្នា​នូវ​លក្ខណៈ​បៃតង និង​សង្គម ដែល​ជះឥទ្ធិពល​វិជ្ជមាន​ដល់​សង្គម និង​បរិស្ថាន​។​

ការបោះ​ផ្សាយ​លក់ស​ញ្ញាប​ណ្ណ​បៃតង សញ្ញា​បណ្ណ​សង្គម និង​សញ្ញា​បណ្ណ​និរន្តរភាព​ ដំណើរការ​នៃ​ការបោះ​ផ្សាយ​លក់​សញ្ញា​បណ្ណ​បៃតង សញ្ញា​បណ្ណ​សង្គម ឬ​សញ្ញា​បណ្ណ​និរន្តរភាព គឺមាន​លក្ខណៈ​ដូចគ្នា​នឹង​ដំណើរការ​នៃ​ការបោះ​ផ្សាយ​លក់​មូល​ប​ត្រ​បំណុល​ធម្មតា​ដែរ​។ ក្រុមហ៊ុន​ដែលមាន​បំណង​ធ្វើ​ការបោះ​ផ្សាយ​លក់​សញ្ញា​បណ្ណ​បៃតង សញ្ញា​​បណ្ណ​សង្គម ឬ​សញ្ញា​បណ្ណ​និរន្តរភាព ត្រូវបំពេញ​តាម​លក្ខខណ្ឌ និង​នីតិវិធី​ស្របតាម​ប្រកាស​ស្ដីពី «​ការបោះ​ផ្សាយ​លក់​មូល​ប​ត្រ​បំណុល​ជា​សាធារណៈ​» ឬ​ប្រកាស​ស្ដីពី «​ការបោះ​ផ្សាយ​លក់​មូល​ប​ត្រ​បំណុល​សម្រាប់​វិនិយោគិន​គុណវុឌ្ឍិ​» និង​បំពេញ​តាម​លក្ខខណ្ឌ​បន្ថែម ដែល​មានចែង​ក្នុង​គោលការណ៍​ណែនាំ​ស្ដីពី «​ការបោះ​ផ្សាយ​លក់​សញ្ញា​បណ្ណ​បៃតង សញ្ញា​បណ្ណ​សង្គម និង​សញ្ញា​បណ្ណ​និរន្តរភាព​» និង​គោល​ការណ៍​ណែនាំ​លម្អិត សម្រាប់​ការបោះ​ផ្សាយ​លក់​សញ្ញា​បណ្ណ​បៃតង​នៅក្នុង​ព្រះរាជាណាចក្រ​កម្ពុជា​។​

ការបោះ​ផ្សាយ​លក់ស​ញ្ញាប​ណ្ណ​បៃតង សញ្ញា​បណ្ណ​សង្គម ឬ​សញ្ញា​បណ្ណ​និរន្តរភាព ចាំបាច់​តម្រូវឱ្យ​ក្រុមហ៊ុន​បោះផ្សាយ​បំពេញបន្ថែម​នូវ​ក្របខ័ណ្ឌ​សញ្ញា​បណ្ណ​បៃតង ឬ​ក្របខ័ណ្ឌ​ហិរញ្ញ​ប្ប​ទាន​និរន្តរភាព ដែលជា​ចំណុច​សំខាន់​នៅក្នុង​ដំណើរការ​នៃ​ការបោះ​ផ្សាយ និង​អនុញ្ញាតឱ្យ​ក្រុមហ៊ុន​ធ្វើការ​ផ្ដល់​ព័​ត៌​មាន​ចាំបាច់​សម្រាប់​ការបង្ហាញ​អំពី​សុចរិត​ភាព​នៃ​ការកំណត់​ប្រភេទ​បៃតង សង្គម ឬ​និរន្តរភាព របស់​សញ្ញា​បណ្ណ​ទៅកាន់​វិនិយោគិន​៕