បរទេស ៖ ក្នុងដំណើរឆ្ពោះទៅផែនការសម្រេចឲ្យបានដែលពិភពលោកបញ្ចេញឧស្ម័នស្មើសូន្យ ឬ Net Zero កិច្ចការងារអភិវឌ្ឍ និងវិនិយោគទៅលើវិស័យហេដ្ឋារចនាសម្ព័ន្ធប្រកបដោយនិរន្តរភាព (Sustainable infrastructure) ត្រូវបានចាត់ទុកថាជាផ្នែកដ៏សំខាន់ក្នុងបេសកកម្មដ៏មានអាទិភាពបំផុត។

អ្វីទៅជា Sustainable Infrastructure?

គោលគំនិតនៃហេដ្ឋារចនាសម្ព័ន្ធប្រកបដោយនិរន្តរភាព (Sustainable infrastructure) សំដៅទៅលើឧបករណ៍ បណ្តាញ និងប្រព័ន្ធ ដែលត្រូវបានរចនាឡើងដើម្បីបំពេញតម្រូវការសេវាកម្មសំខាន់ៗរបស់ប្រជាជន រួមមាន ផ្លូវថ្នល់ ស្ពាន បង្គោលភ្លើង ទូរស័ព្ទ ស្ថានីយ៍ វារីអគ្គិសនី ជាដើម ហើយចាំបាច់បំផុតនោះគឺដោយមានការគិតគូរពីផលប៉ះពាល់សេដ្ឋកិច្ច សង្គម និងបរិស្ថានមិនអាចខានបានឡើយ។

ជាមួយគ្នានេះ ដើម្បីអាចបញ្ជាក់អំពីទំហំនៃភាពចាំបាច់របស់ Sustainable Infrastructure ក្នុងការឈានទៅសម្រេចឲ្យបាននូវពិភពលោក Net Zero ត្រឹមឆ្នាំ២០៥០នោះ អ្នកជំនាញជាច្រើនបានចូលរួមធ្វើការគណនាវាទៅជាតួលេខ និងដាក់បង្ហាញជាសាធារណៈនូវរបាយការណ៍ស្រាវជ្រាវជាច្រើនរួចមកហើយ។

យោងតាមរបាយការណ៍កាលពីខែកញ្ញាដែលមានចំណងជើងថា “Closing the sustainable infrastructure gap to achieve net zero” មិនត្រឹមតែបានបង្ហាញអំពីទំហំនៃបញ្ហាក្នុងផែនការនោះទេ វាក៏បានបង្ហាញអំពីតម្រូវការវិនិយោគដែលពិភពលោកត្រូវការចាំបាច់សម្រាប់ត្រៀមក្នុងការអភិវឌ្ឍវិស័យហេដ្ឋារចនាសម្ព័ន្ធប្រកបដោយនិរន្តភាពផងដែរ។

ក្រុមការងារអ្នកជំនាញដោយ EY and FIDIC ដែលជាអង្គការអ្នកជំនាញប្រឹក្សាដ៏ធំបំផុតមួយរបស់ពិភពលោកលើកិច្ចការងារអភិវឌ្ឍសំណង់ និងអគារបានបញ្ចេញការព្យាករណ៍ថ្មីនៅក្នុងវេទិកា Global Leadership Forum ប្រព្រឹត្តទៅកាលពីខែសីហាកន្លងមកដោយបានព្រមានថាពិភពលោកចាំបាច់ត្រូវការប្រាក់វិនិយោគដល់ទៅជាង ៦៤ទ្រីលានដុល្លារបន្ថែមទៀតដើម្បីអាចសម្រេចបាននូវការអភិវឌ្ឍវិស័យហេដ្ឋារចនាសម្ព័ន្ធប្រកបដោយនិរន្តភាពស្របតាមផែនការ Net Zero ត្រឹមឆ្នាំ២០៥០។

លោក Chris Lewis ប្រធានផ្នែកហេដ្ឋារចនាសម្ព័ន្ធសកលនៅ EY ដែលជាសហការីនិពន្ធរបស់របាយការណ៍នេះបានពន្យល់ថា ពិភពលោកត្រូវការចំណាយទៅលើវិស័យហេដ្ឋារចនាសម្ព័ន្ធប្រកបដោយនិរន្តរភាពសរុបចំនួន១៣៩ទ្រីលានដុល្លារត្រឹមឆ្នាំ២០៥០ ដើម្បីសម្រេចបានផែនការ Net Zero។ ការវិភាគបានបង្ហាញថា គោលនយោបាយបច្ចុប្បន្នបានដោះស្រាយកិច្ចការងារនេះមានទំហំត្រឹមតែ៧៥ទ្រីលានដុល្លារនៅឡើយទេដែលមានន័យថា ចាំបាច់ត្រូវការយ៉ាងហោចណាស់ ៦៤ទ្រីលានដុល្លារបន្ថែមទៀត។

វេជ្ជបណ្ឌិត Nelson Ogunshakin OBE ដែលជានាយកប្រតិបត្តិនៃសហព័ន្ធវិស្វកម្មអន្តរជាតិ FIDIC បានអត្ថាធិប្បាយថា ការប្រែប្រួលអាកាសធាតុគឺជាការគំរាមកំហែងដែលមានស្រាប់ចំពោះមនុស្សជាតិទាំងអស់ ហើយការជួសជុលគម្លាត និរន្តរភាពមិនត្រូវចាត់ទុកជាបញ្ហារបស់នរណាម្នាក់ឡើយ។ ពិភពលោកត្រូវការអ្នកវិនិយោគ វិស្វករ អ្នកសាងសង់ អ្នកបច្ចេកទេស អ្នកជំនាញផ្នែកច្បាប់ និងហានិភ័យ អតិថិជន និងអ្នកបង្កើតគោលនយោបាយ ដើម្បីរួមគ្នាស្វែងរកដំណោះស្រាយប្រកបដោយនិរន្តរភាព និងអាចធានាបាន និងបង្កើតឧបករណ៍ដែលអាចឱ្យអ្នកទាំងអស់គ្នាទទួលបានជោគជ័យ។

គួរឲ្យដឹងដែរថា ខ្ទង់ដែលនឹងត្រូវចំណាយច្រើនជាងគេបំផុតនោះមានដូចជាការផ្លាស់ប្តូរនៃវិស័យថាមពលនៅជុំវិញពិភពលោក ការបង្វែរថាមពលអគ្គិសនីដែលមានប្រភពមកពីថាមពលកកើតឡើងវិញចូលទៅក្នុងវិស័យសំខាន់ៗ ដូចជា ការដឹកជញ្ជូនជំនួសឲ្យឥន្ធនៈហ្វូស៊ីល ក៏ដូចជាការផ្លាស់ប្តូរដែលត្រូវការនៅក្នុងវិស័យផ្សេងទៀត ដូចជាឧស្សាហកម្មធុនធ្ងន់ជាដើម៕