សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ លុយដុល្លារអាម៉េរិកបានគ្រប់គ្រងលើអំណាចទីផ្សារ និងពាណិជ្ជកម្មអន្តរជាតិជាយូរមកហើយ ប៉ុន្តែបច្ចុប្បន្នកំពុងកើតក្តីបារម្ភថា ឥទ្ធិពលរបស់ខ្លួនអាចនឹងបាត់បង់បន្តិចម្តងៗ ដោយសារតែកំណើនសេដ្ឋកិច្ចដ៏ខ្លាំងក្លារបស់ប្រទេសចិន ជាពិសេសរូបិយវត្ថុរបស់ចិន គឺលុយយ័ន។ ដោយឡែក មួយរយៈចុងក្រោយនេះ នៅក្នុងទីផ្សារថាមពលសកល ប្រទេសចិន បាន និងកំពុងពង្រឹងភាពជឿជាក់នៅលើទីផ្សារអន្តរជាតិកាន់តែខ្លាំងឡើងជាមួយនឹងអំណាចរបស់ប្រាក់យ័ន ។ ក្នុងនោះរដ្ឋាភិបាលក្រុងប៉េកាំងបានផ្តល់ឱ្យអារ៉ាប៊ីសាអូឌីតនូវយន្តការដ៏វ៉ៃឆ្លាតមួយ ដើម្បីផ្លាស់ប្តូរប្រាក់ចំណេញពីការលក់ប្រេងជាមួយនឹងដុំមាសដោយផ្ទាល់តែម្តង។ មធ្យោបាយថ្មីដ៏សាមញ្ញ “oil for gold” នេះត្រូវបានបង្កើតឡើងដើម្បីបង្កើតទំនុកចិត្តរយៈពេលវែងលើរូបិយប័ណ្ណចិន ដែលវានឹងក្លាយទៅជាជម្រើសអាចទុកចិត្តបានជំនួសប្រាក់ដុល្លារអាម៉េរិកសម្រាប់ការទូទាត់ទំនិញសំខាន់ៗផ្សេងទៀតនៅក្នុងទីផ្សារសកល។ រូបមន្តទូទាត់ថ្លៃប្រេងថ្មីរបស់ចិន Petroyuan នេះ ត្រូវបានយកមកពិភាក្សាលើកដំបូងតាំងតែពីឆ្នាំ២០២២ នៅក្នុងកិច្ចខិតខំរបស់រដ្ឋបាលក្រុងប៉េកាំងដើម្បីប្រជែងលុយដុល្លារអាម៉េរិក ប៉ុន្តែទើបតែយកមកអនុវត្តក្នុងឆ្នាំ២០២៥កន្លងមកនេះប៉ុណ្ណោះ។
យោងតាមការផ្សព្វផ្សាយរបស់សារព័ត៌មានបរទេសជាច្រើនបានបង្ហាញថា អារ៉ាប៊ីសាអូឌីត ចាំបាច់ត្រូវទូទាត់ និងទទួលយកលុយយ័នពីការនាំចេញប្រេងរបស់ខ្លួន។ អារ៉ាប៊ីសាអូឌីត ក៏នឹងមានសិទ្ធិក្នុងការទូទាត់ភ្លាមៗដើម្បីយកលុយយ័នទាំងនោះទៅទិញជាដុំមាសចេញពី Shanghai Gold Exchange International (SGEI) ដែលជាទីផ្សារជូញដូរមាសដ៏ធំរបស់រដ្ឋចិន។
ការប្តូរលុយយ័នទៅជាដុំមាសតាមរយៈ SGEI មានសុវត្ថិភាពខ្ពស់អាចជៀសវាងពីការរឹតត្បិត និងទណ្ឌកម្មនានាដោយអាម៉េរិក ក៏ដូចជាលោកខាងលិច។ ការប្រើប្រាស់រូបវន្តថ្មីនេះនឹងធ្វើការទូទាត់តាមរយៈប្រព័ន្ធទូទាត់អន្តរធនាគារឆ្លងដែនរបស់ចិន (CIPS(Cross-Border Interbank Payment System) ដែលជាមធ្យោបាយហិរញ្ញវត្ថុអន្តរជាតិថ្មីអាចដើរតួជំនួសឲ្យប្រព័ន្ធហិរញ្ញវត្ថុដែលគ្រប់គ្រងដោយលោកខាងលិច ដូចជា SWIFT នោះជាដើម។
គួរឲ្យដឹងដែរថា ចិន គឺជាអតិថិជនទិញប្រេងធំជាងគេបំផុតរបស់អារ៉ាប៊ីសាអូឌីតជាយូរមកហើយ។ ដូច្នេះ នៅពេលខាងមុខ ប្រសិនបើអាចដំណើរការទូទាត់ oil for gold បានរលូននោះ គេជឿជាក់ថា ទំនុកចិត្តលើលុយយ័ននឹងកាន់តែមានកម្រិតខ្ពស់ ខណៈដែលសង្គ្រាមពាណិជ្ជកម្មរវាងមហាអំណាចចិន និងអាម៉េរិក ក៏អាចមើលឃើញថា អ្នកដែលទទួលជ័យជំនះបានច្រើនជាងគេគឺចិន៕
Account
Security
Favourite Content