សៀមរាប ៖ ថ្ងៃទី ៤ ខែវិច្ឆិកា ឆ្នាំ២០២៤នេះ សមាគមមីក្រូហិរញ្ញវត្ថុកម្ពុជា (CMA) បាន និងកំពុងរៀបចំសន្និសីទមីក្រូហិរញ្ញវត្ថុ ប្រចាំ​ឆ្នាំ (AMC) ដោយទទួលបានការចូលរួមពីមនុស្សប្រមាណ ៤០០នាក់។ ព្រឹត្តិការណ៍នេះ គឺជាកម្មវិធីដ៏សំខាន់មួយដែលថ្នាក់ដឹកនាំមីក្រូហិរញ្ញវត្ថុ និងធនាគារ​ មកជួបជុំ និងពិភាក្សា ផ្លាស់ប្តូរភាព​ជោគជ័យ ក៏ដូចជាចន្លោះខ្វះខាតនៃវិស័យ ព្រមទាំងសិក្សា​ និងតាមដានឱកាសតាមរយៈនិន្នាការនៃការអភិវឌ្ឍថ្មីៗ ក៏ដូចជាការធ្វើបច្ចុប្បន្នភាព​នៃការប្រែ​ប្រួល​បទប្បញ្ញត្តិថ្មីៗថែមទៀត។

ប្រធានបទសម្រាប់ឆ្នាំ២០២៤ នេះ គឺនិរន្តរភាព និងបរិយាបន្នមីក្រូហិរញ្ញវត្ថុ «បច្ចុប្បន្នភាព និងដំណើរវិវឌ្ឍន៍នៃវិស័យ» ដែលនឹងស្វែងយល់អំពីរបៀបដែលគ្រឹះស្ថានមីក្រូហិរញ្ញវត្ថុ អាចបន្តជំរុញការអនុវត្ត ប្រកបដោយបរិយាបន្ន និងទំនួលខុសត្រូវរបស់មីក្រូហិរញ្ញវត្ថុក្នុងការរក្សានិរន្តរភាពសម្រាប់វិស័យ និងភាពធន់នៃសេដ្ឋកិច្ចតាមរយៈការទទួលយកនូវបច្ចេកវិទ្យាហិរញ្ញវត្ថុ ដំណោះស្រាយប្រកបដោយភាពច្នៃប្រតិដ្ឋ លើកកម្ពស់សិទ្ធិ និងកិច្ចការពារអតិថិជន ការទទួលខុសត្រូវផ្នែកបរិស្ថាន និងការចូលរួមក្នុងគំនិតផ្តួចផ្តើមហិរញ្ញវត្ថុអាកាសធាតុ។

សន្និសីទនេះនឹងផ្តល់ជូននូវវេទិកាមួយដើម្បីភ្ជាប់ទំនាក់ទំនង ចូលរួម ផ្លាស់ប្តូរ និងស្វែងយល់​អំពី​បញ្ហាប្រឈម និងឱកាសក្នុងការអនុវត្តបរិយាប័ន្នហិរញ្ញវត្ថុ ការអនុវត្តល្អបំផុតនៃហិរញ្ញប្បទាន​បៃតង ការអភិវឌ្ឍផលិតផលទឹកស្អាត និងអនាម័យ ការរក្សាកំណើនប្រកបដោយទំនួលខុសត្រូវ និង​និរន្តរភាព និងការចាប់យកឱកាសថ្មីៗ ការទទួលយក និងសម្របទៅនឹងបច្ចេកវិទ្យាប្រកបដោយនវា​នុវត្តន៍ ដើម្បីផ្សារភ្ជាប់ទៅនឹងការវិឌ្ឍន៍នៃបទប្បញ្ញត្តិរបស់និយ័តករពាក់ព័ន្ធ។

យ៉ាងណាមិញ សន្និសីទមីក្រូហិរញ្ញវត្ថុប្រចាំឆ្នាំ២០២៤ នឹងផ្តោតលើប្រធានបទសំខាន់ៗចំនួន ៧ ​រួមមាន៖ ១. ទទួលបានព័ត៌មានជាមួយនឹងទស្សនទានពីនិយ័តករនូវបទប្បញ្ញត្តិ ប្រកាស និងសារាចរណ៍ ណែនាំថ្មីៗ។ ២. បង្ហាញពីបច្ចុប្បន្នភាពនៃវិស័យមីក្រូហិរញ្ញវត្ថុនៅក្នុង​ប្រទេស​កម្ពុជា​ ព្រម​ទាំងពិនិត្យមើលនិន្នាការសំខាន់ៗ បញ្ហាប្រឈម និងឱកាស។ ៣. សម្របសម្រួលក្នុងការចែករំលែកនូវចំណេះដឹងក្នុងចំណោមអ្នកអនុវត្ត អ្នកបង្កើតគោលនយោបាយ វិនិយោគិន និងអ្នកពាក់ព័ន្ធផ្សេងទៀត។ ៤. បង្ហាញដំណោះស្រាយប្រកបដោយភាពច្នៃប្រតិដ្ឋ និងឧត្តមានុវត្តន៍នៃផលិតផលហិរញ្ញវត្ថុ និងការផ្តល់សេវាកម្មជាគំរូ។ ៥. ស្វែងយល់ពីសក្តានុពលនៃបច្ចេក​វិទ្យាដើម្បីលើកកម្ពស់បរិយាបន្នហិរញ្ញវត្ថុ និងបង្កើនប្រសិទ្ធភាពប្រតិបត្តិការ។ ៦. ជំរុញកិច្ចពិភាក្សាស្តីពីហិរញ្ញវត្ថុប្រកបដោយការទទួលខុសត្រូវ កិច្ចការពារអតិថិជន និងសង្គម។ ៧. បង្កើតដំណោះស្រាយប្រកបដោយនវានុវត្តន៍ ផ្តល់អនុសាសន៍សម្រាប់​វិស័យហិរញ្ញវត្ថុនាពេលអនាគតនៅកម្ពុជា។

គួររំលឹកថា ចាប់តាំងពីឆ្នាំ២០០៨ មក សមាគមមីក្រូហិរញ្ញវត្ថុកម្ពុជា (CMA) បានរៀបចំព្រឹត្តិការណ៍​ប្រចាំឆ្នាំដែលបានប្រមូលផ្តុំអ្នកបង្កើតគោលនយោបាយ ថ្នាក់ដឹកនាំអាជីវកម្មលេចធ្លោ ថ្នាក់ដឹកនាំ​ធនាគារ​ និងមីក្រូហិរញ្ញវត្ថុ ព្រមទាំងអ្នកតំណាងភាគីពាក់ព័ន្ធសំខាន់ៗ ដើម្បីពិភាក្សាអំពីនិន្នាការ និងបញ្ហា​សំខាន់ៗពាក់ព័ន្ធនឹងការអភិវឌ្ឍ និងកំណើនមីក្រូហិរញ្ញវត្ថុនៅកម្ពុជា៕