បរទេស ៖ យោងតាមប្រភពព័ត៌មានពី ​Investing បានរាយការណ៍ថា ក្រសួងពាណិជ្ជកម្មអាមេរិកបានប្រកាសថា ខ្លួននឹងមិនចាត់ថ្នាក់ប្រទេសវៀតណាមជាប្រទេសសេដ្ឋកិច្ចទីផ្សារនោះទេ ដែលធ្វើឲ្យរដ្ឋាភិបាលទីក្រុងហាណូយខកចិត្តចំពោះការសម្រេចចិត្តមួយនេះ។

ក្នុងរយៈពេលប៉ុន្មានឆ្នាំកន្លងមកនេះ វៀតណាម តែងមានបំណងចង់ឡើងឋានៈពីសេដ្ឋកិច្ចមិនមែនទីផ្សារទៅជាសេដ្ឋកិច្ចទីផ្សារ ឬ Market Economy ដើម្បីចៀសផុតពីការជាប់ពន្ធប្រឆាំងការលក់បង្ខូចថ្លៃ ដែលមានឥទ្ធិពលលើប្រទេសយ៉ាងធ្ងន់ធ្ងរ។ ទន្ទឹមនឹងនេះ ទីក្រុងវ៉ាស៊ីនតោនបានដាក់ប្រទេសសេដ្ឋកិច្ចចំនួន ១២ ផ្សេងទៀតជាសេដ្ឋកិច្ចមិនមែនទីផ្សាររួមមាន ចិន រុស្ស៊ី កូរ៉េខាងជើង អាស៊ែបៃហ្សង់ អាម៉េនី បេឡារុស ហ្ស៊កហ្ស៊ី កៀគីស្ថាន តាហ្ស៊ីគីស្ថាន តួកមេនីស្ថាន អ៊ូសបេគីស្ថាន និងម៉ុលដូវ៉ា។ យ៉ាងណាមិញ ការរក្សាឋានៈវៀតណាមជាសេដ្ឋកិច្ចមិនមែនទីផ្សារត្រូវបានជំទាស់ដោយក្រុមហ៊ុនផលិតដែកថែបរបស់សហរដ្ឋអាមេរិក អ្នកចិញ្ចឹមបង្គាតំបន់សមុទ្រ និងកសិករចិញ្ចឹមឃ្មុំ ដែលមានសមាជិកសភាតំណាងឱ្យពួកគេ ប៉ុន្តែត្រូវបានគាំទ្រដោយអ្នកលក់រាយ និងក្រុមអាជីវកម្មមួយចំនួនផ្សេងទៀត។

ក្រសួងពាណិជ្ជកម្មសហរដ្ឋអាមេរិកបានប្រកាសថា វៀតណាម នឹងត្រូវបានបន្តចាត់ថ្នាក់ជាប្រទេសសេដ្ឋកិច្ចមិនមែនទីផ្សារក្នុងគោលបំណងនៃការគណនាពន្ធអាករលើការនាំចូលពីប្រទេសវៀតណាម ដែលមានន័យថា ភាគីអាម៉េរិកនឹងបន្តយកពន្ធអាករសម្រាប់ការនាំទំនិញចូលពីប្រទេសវៀតណាម។ ទន្ទឹមនឹងនេះ ក្រសួងឧស្សាហកម្ម និងពាណិជ្ជកម្មវៀតណាមបាននិយាយក្នុងសេចក្តីថ្លែងការណ៍មួយថា វៀតណាមមានការសោកស្តាយចំពោះការសម្រេចចិត្តមួយនេះ ខណៈដែលខ្លួនបានកែលម្អជាវិជ្ជមានជាច្រើននៅក្នុងសេដ្ឋកិច្ចវៀតណាមនាពេលថ្មីៗនេះ ប៉ុន្តែក្រសួងពាណិជ្ជកម្មសហរដ្ឋអាមេរិកនៅតែមិនទទួលស្គាល់វៀតណាមជាប្រទេសសេដ្ឋកិច្ចទីផ្សារ។ មិនត្រឹមតែប៉ុណ្ណោះ វៀតណាមបានស្នើជាច្រើនដងហើយថា ខ្លួនគួរតែត្រូវបានដូរឋានៈពីសេដ្ឋកិច្ចមិនមែនទីផ្សារ ដោយសារខ្លួនបានកែទម្រង់សេដ្ឋកិច្ចជាច្រើនរួចមកហើយ។

គួរឲ្យបញ្ជាក់ដែរថា សេដ្ឋកិច្ច​ទីផ្សារ ឬ Market Economy​ ជា​ប្រព័ន្ធ​សេដ្ឋកិច្ច​មួយដែលរាល់ការសម្រេចចិត្តលើផ្នែកសេដ្ឋកិច្ច និងការកំណត់តម្លៃលើទំនិញ រួមទាំងសេវាកម្មស្ថិត​ក្នុងរង្វង់​នៃការគ្រប់គ្រង​​របស់​ផ្នែកឯកជន​ ដែលត្រូវបានធ្វើឡើងដោយការព្រមព្រៀងគ្នារវាងអ្នកលក់ និង អ្នកទិញដោយសេរី ហើយរដ្ឋាភិបាលអាចធ្វើអន្តរាគមន៍តិចតួចប៉ុណ្ណោះ ឬ គ្មាន។

រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី Janet Yellen បានផ្សព្វផ្សាយពីប្រទេសវៀតណាមក្នុងទិសដៅជាមិត្តរួមការងារ ខណៈដែលមានគោលបំណងផ្លាស់ប្តូរខ្សែសង្វាក់ផ្គត់ផ្គង់របស់សហរដ្ឋអាមេរិកឱ្យឆ្ងាយពីប្រទេសចិន។ រដ្ឋាភិបាលក្រុងវ៉ាស៊ីនតោនបានខិតខំពង្រឹងទំនាក់ទំនងកាន់តែជិតស្និទ្ធជាមួយវៀតណាមចំពោះមុខការប្រកួតប្រជែងជាយុទ្ធសាស្ត្រជាមួយប្រទេសចិន ប៉ុន្តែការសម្រេចចិត្តក្នុងការដំឡើងឋានៈប្រទេសវៀតណាមអាចមានបញ្ហាដោយសារការបោះឆ្នោតនៅខែវិច្ឆិកាខាងមុខរបស់សហរដ្ឋអាមេរិក។

អ្នកវិភាគមួយចំនួនបាននិយាយថា ភាពបរាជ័យក្នុងការដំឡើងឋានៈវៀតណាមអាចជាសញ្ញាអវិជ្ជមានសម្រាប់ទំនាក់ទំនងរវាងសហរដ្ឋអាមេរិក និងវៀតណាម។