បរទេស ៖ យោងតាមប្រភពព័ត៌មានពី CNBC បានរាយការណ៍ថា ចិនបានចំណាយលុយជាង ២៣០,៨ ពាន់លានដុល្លារក្នុងរយៈពេលជាងមួយទសវត្សរ៍ ដើម្បីកសាងឧស្សាហកម្មរថយន្តអគ្គិសនីរបស់ខ្លួន​ ហើយវាអាចជាមូលហេតុមួយដែលចិនមិនអាចនៅស្ងៀមចំពោះការដាក់ពន្ធបន្ថែមពីលោកខាងលិចនាពេលថ្មីៗនេះ។

កាលពីខែឧសភា សហរដ្ឋអាមេរិកបានប្រកាសថា ខ្លួនកំពុងដំឡើងពន្ធលើការនាំចូលរថយន្តអគ្គិសនីរបស់ចិនដល់ ១០០ ភាគរយ។ ក្រោយមក សហភាពអឺរ៉ុបមានផែនការដាក់ពន្ធបន្ថែមលើរថយន្តអគ្គិសនីដែលនាំចូលពីចិនចន្លោះពី ១៧,៤ ភាគរយទៅ ៣៨,‌១ ភាគរយ ខណៈដែលអត្រាពន្ធបច្ចុប្បន្នមាន ១០ ភាគរយ។ លើសពីនេះ ប្រទេសតួគីក៏បានប្រកាសផងដែរថា ខ្លួននឹងដាក់ពន្ធបន្ថែម ៤០ ភាគរយលើការនាំចូលយានយន្តពីប្រទេសចិន ដើម្បីការពារហានិភ័យដែលអាចកើតឡើងនៅក្នុងសមតុល្យគណនីចរន្តរបស់ខ្លួន និងការពារក្រុមហ៊ុនផលិតរថយន្តក្នុងស្រុក។

លោក Scott Kennedy ប្រធានគ្រប់គ្រងផ្នែកធុរកិច្ច និងសេដ្ឋកិច្ចចិននៅ CSIS បានលើកឡើងថា ទំហំនៃការគាំទ្ររបស់រដ្ឋាភិបាលមានចំណែកប្រហែល ១៨,៨ ភាគរយនៃការលក់រថយន្តអគ្គិសនីសរុបចន្លោះឆ្នាំ២០០៩ និង ឆ្នាំ២០២៣ ។ លោកបានកត់សម្គាល់ថា សមាមាត្រនៃការចំណាយនេះចំពោះការលក់ EV បានធ្លាក់ចុះពី ៤០ ភាគរយមុនឆ្នាំ២០១៧ មកនៅត្រឹមតែ ១១ ភាគរយប៉ុណ្ណោះក្នុងឆ្នាំ២០២៣ ។ ទិន្នន័យនេះត្រូវបានរកឃើញនៅពេលដែលសហភាពអឺរ៉ុបគ្រោងនឹងដាក់ពន្ធលើការនាំចូលរថយន្តអគ្គិសនីរបស់ចិនជុំវិញការប្រើប្រាស់ប្រាក់ឧបត្ថម្ភក្នុងផលិតកម្មរបស់ពួកគេ។

លោក Kennedy បានចង្អុលបង្ហាញថា ការគាំទ្ររបស់ទីក្រុងប៉េកាំងសម្រាប់វិស័យរថយន្តអគ្គិសនីបានរួមបញ្ចូលគោលនយោបាយមិនមែនរូបិយវត្ថុ ដែលមានភាពលម្អៀងចំពោះក្រុមហ៊ុនផលិតរថយន្តក្នុងស្រុកជាងរថយន្តបរទេស។ នេះជាមូលហេតុដែលលោកខាងលិចមានភាពមិនពេញចិត្ត និងចោទប្រកាន់រដ្ឋាភិបាលចិនថា អនុវត្តពាណិជ្ជកម្មមិនយុត្តិធម៌ក្នុងការប្រើប្រាស់ប្រាក់ឧបត្ថម្ភជួយក្រុមហ៊ុនរថយន្តអគ្គិសនីក្នុងស្រុក។

យោងតាមប្រភពដដែលបានលើកឡើងថា ការឧបត្ថម្ភធនរបស់រដ្ឋាភិបាលមិនចូលទៅក្នុងការអភិវឌ្ឍន៍រថយន្តដោយផ្ទាល់នោះទេ។ កំឡុងពេលនៃការអភិវឌ្ឍន៍វិស័យ EV ដំបូងៗរបស់ប្រទេសចិន ក្រសួងហិរញ្ញវត្ថុបាននិយាយថា ខ្លួនបានរកឃើញយ៉ាងហោចណាស់ក្រុមហ៊ុនចំនួន ៥ បានបោកប្រាស់រដ្ឋាភិបាលជាង ១ ពាន់លានយ័ន (១៤០ លានដុល្លារ)។ យ៉ាងណាមិញ យានជំនិះដែលផលិតនៅប្រទេសចិនក៏ទទួលបានអត្ថប្រយោជន៍ផងដែរពីការកើនឡើងនៃរថយន្តអគ្គិសនីនៅក្នុងប្រទេសនេះ ខណៈដែលចិនធ្លាប់ពឹងផ្អែកខ្លាំងលើទីផ្សាររថយន្តប្រើប្រាស់ប្រេងពីបរទេស។ ទោះជាយ៉ាងណាក្តី វាគឺជាការប្រកួតប្រជែងខ្លាំងក្លា​មួយដោយអ្នកវិភាគរបស់ធនាគារកណ្តាលអាមេរិកបាននិយាយថា ក្រុមហ៊ុនផលិតរថយន្តធំៗរបស់សហរដ្ឋអាមេរិកគួរតែចាកចេញពីប្រទេសចិន ហើយផ្តោតលើផលិតកម្មរបស់ពួកគេទៅកន្លែងផ្សេងទៀត។

លោក Kennedy បាននិយាយថា អ្នកវិភាគខាងវិស័យរថយន្ត និងក្រុមហ៊ុនផលិតរថយន្តលោកខាងលិចសុទ្ធតែយល់ស្របថា ក្រុមហ៊ុនផលិតរថយន្ត EV និងអ្នកផលិតថ្មថាមពលរបស់ចិនមានការរីកចម្រើនយ៉ាងខ្លាំង ដែលគួរតែត្រូវបានយកចិត្តទុកដាក់ខ្លាំង។ យ៉ាងណាមិញ ​លោក​បាន​ចង្អុល​បង្ហាញ​ថា ការ​គាំទ្រ​របស់​រដ្ឋាភិបាល​ចិនយ៉ាង​ទូលំទូលាយ និង​កំណើន​ទីផ្សារ​សម្រាប់​ក្រុមហ៊ុន EV ​នៅ​មិន​ទាន់​ជំរុញ​ប្រាក់​ចំណេញ​​ខ្លាំង​នៅ​ឡើយ​។ នៅក្នុងសេដ្ឋកិច្ចទីផ្សារកំពុងដំណើរការល្អ ក្រុមហ៊ុននឹងធ្វើការវាស់វែងដោយប្រុងប្រយ័ត្ននូវការវិនិយោគរបស់ពួកគេក្នុងសមត្ថភាពថ្មី ហើយការលេចឡើងនៃគម្លាតយ៉ាងខ្លាំងរវាងការផ្គត់ផ្គង់ និងតម្រូវការទំនងនឹងនាំឱ្យមានការបង្រួបបង្រួមឧស្សាហកម្ម។ ក្នុងរយៈពេល ១២ ខែកន្លងមកនេះ ប្រាក់ចំណេញសុទ្ធរបស់ BYD បានធ្លាក់ចុះមកត្រឹម ៧៣៩ ដុល្លារក្នុងរថយន្តមួយគ្រឿង ខណៈដែល Tesla ធ្លាក់ចុះមកត្រឹម ២ ៩១៩ ដុល្លារក្នុងរថយន្តមួយគ្រឿង។ ក្រុមហ៊ុនផលិតរថយន្តអគ្គិសនីរបស់ចិន Nio រំពឹងថានឹងសល់ក្រុមហ៊ុនផលិតរថយន្តពី ២០ ទៅ ៣០ នៅក្នុងទីផ្សារប្រទេសចិនបន្ទាប់ពីក្រុមហ៊ុនផលិតរថយន្តប្រហែល ១០ ឈប់ដំណើរការនៅក្នុងទីផ្សារប្រទេសចិន។ ចាប់តាំងពីឆ្នាំមុន ឧស្សាហកម្ម EV បានប្រឈមមុខនឹងសង្គ្រាមតម្លៃដ៏ខ្លាំងក្លា ដោយសារក្រុមហ៊ុនរថយន្តបានទម្លាក់តម្លៃ ឬដាក់លក់ផលិតផលក្នុងតម្លៃទាប។

ទន្ទឹមនឹងនេះ សហរដ្ឋអាមេរិកកំពុងបង្កើនកិច្ចខិតខំប្រឹងប្រែងរបស់ខ្លួនដើម្បីគាំទ្ររថយន្តអគ្គិសនី ដោយច្បាប់កាត់បន្ថយអតិផរណាដែលបានចុះហត្ថលេខានៅក្នុងខែសីហាឆ្នាំ ២០២២ បានបែងចែក ៣៧០ ពាន់លានដុល្លារសម្រាប់ការលើកកម្ពស់បច្ចេកវិទ្យាស្អាត។ Kennedy បានចង្អុលបង្ហាញថា ច្បាប់នេះផ្តល់នូវឥណទាន ៧ ៥០០ ដុល្លារសម្រាប់ការទិញរថយន្តអគ្គិសនីមួយគ្រឿង ដែលផ្ទុយពីការគាំទ្ររបស់រដ្ឋាភិបាលចិនក្នុងការទិញរថយន្តអគ្គិសនីមួយគ្រឿងជាមធ្យម ៤ ៦០០ ដុល្លារក្នុងឆ្នាំ២០២៣ ដែលធ្លាក់ចុះពី ១៣ ៨៦០ ដុល្លារក្នុងឆ្នាំ២០១៨៕