សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ ការវិនិយោគលើវិស័យនានាក្នុងប្រទេសកម្ពុជា ជាពិសេសវិស័យដីធ្លី ត្រូវបានកត់សម្គាល់ឃើញថា ហាក់ងាកចេញពីរាជធានីភ្នំពេញ ទៅកាន់តំបន់តាមបណ្ដាខេត្តមួយចំនួន ។ ជាក់ស្ដែង ដូចជាខេត្តមណ្ឌលគីរី រតនគីរី គេឃើញថាមានការចាប់អារម្មណ៍លើការវិនិយោគជាច្រើនក្នុងរយៈពេលប៉ុន្មានឆ្នាំចុងក្រោយនេះ ។
យោងតាមរបាយការណ៍របស់ក្រសួងផែនការបានបង្ហាញឱ្យដឹងថា ខេត្តរតនគីរី និងមណ្ឌលគីរី មានគម្រោងវិនិយោគសរុបចំនួន ៤៧គម្រោង ក្នុងនោះ មណ្ឌលគីរី មានចំនួន១៩គម្រោង និងរតនគីរី មានចំនួន២៨គម្រោង ។ ការវិនិយោគនៅខេត្តទាំងពីរនេះ ភាគច្រើនផ្ដោតលើវិស័យកសិកម្ម ដោយសារតែខេត្តទាំង២នេះ មានអំណោយផលលើវិស័យដាំដុះ។ ក្រៅពីនេះនៅមានគម្រោងសាងសង់លំនៅដ្ឋានលំហែរកាយ និងទេសចរណ៍ ។
ដោយឡែកខេត្តក្រចេះ ដែលជាខេត្តមួយធ្លាប់តែត្រូវបានគេចាត់ទុកជាខេត្តដែលមានវិសាលភាពផ្ទដីទំនេរច្រើន មានតំបន់ទីប្រជុំជនតិច តំបន់ដាច់ស្រយាលច្រើននោះ ក៏មានការវិនិយោគច្រើនគួរឱ្យកត់សម្គាល់ដែរ ដោយគិតត្រឹមឆ្នាំ២០២៤នេះ មានគម្រោងវិនិយោគចំនួន៤២គម្រោងកំពុងធ្វើសកម្មភាពវិនិយោគនៅក្នុងខេត្តមួយនេះ ដោយផ្ដោតលើវិស័យកសិកម្ម ឧស្សាហកម្ម និងវិស័យហេដ្ឋារចនាសម្ព័ន្ធ ហើយបានផ្ដល់ឱកាសការងារជូនពលរដ្ឋប្រមាណ៦ម៉ឺន៦ពាន់នាក់ ។
យោងតាមរបាយការណ៍ដដែលនេះ បានបង្ហាញថា ក្នុងចំណោមគម្រោងវិនិយោគទាំងអស់ ឃើញថាគម្រោងវិនិយោគដែលមានប្រភពទុនពីបរទេសច្រើនជាងប្រភពទុនក្នុងស្រុក ដូចជាមកពីចិន វៀតណាម អាមេរិក កូរ៉េ ជប៉ុន ម៉ាឡេស៊ី ថៃជាដើម ។
ក្រៅពីបណ្ដាខេត្តទាំងនេះ គេក៏សង្កេតឃើញថាបណ្ដាខេត្តមួយចំនួនទៀតរួមមាន ពោធិ៍សាត់ កំពង់ឆ្នាំង កំពង់ធំ និងបណ្ដាខេត្តជាច្រើនទៀតក្នុងប្រទេសកម្ពុជាក៏កំពុងតែទទួលបានការវិនិយោគជាបន្តបន្ទាប់ ធ្វើឱ្យពលរដ្ឋរស់នៅក្នុងតំបន់នោះមានឱកាសទទួលការងារធ្វើ និងទទួលបានប្រាក់ចំណូលបន្ថែមផងដែរ ។
បើតាមឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជាបានលើកឡើងថា ការអភិវឌ្ឍហេដ្ឋារចនាសម្ព័ន្ធ ខ្វាត់ខ្វែងតភ្ជាប់ពីភ្នំពេញទៅបណ្ដាខេត្ត និងពីបណ្ដាខេត្តមួយទៅបណ្ដាខេត្តមួយទៀត ធ្វើឱ្យកម្ពុជាទទួលបានការវិនិយោគ និងទេសចរកាន់តែច្រើន ជាក់ស្ដែងនៅពេលដែលរដ្ឋាភិបាលសាងសង់ផ្លូវតភ្ជាប់ពីភ្នំពេញទៅបណ្ដាខេត្តមួយចំនួន ឃើញថាមានវិនិយោគិន និងទេសចរជាច្រើនទៅកាន់តំបន់នោះ ដើម្បីវិនិយោគ និងកម្សាន្តតាមរមណីយដ្ឋាននានា ។
ឯកឧត្តមបានលើកឡើងថា បច្ចុប្បន្ននេះ កម្ពុជាបាន និងកំពុងបន្តអភិវឌ្ឍន៍ហេដ្ឋារចនាសម្ព័ន្ធជាច្រើនទៀតនៅតាមបណ្ដាខេត្ត ដើម្បីបន្តទាក់ទាញការវិនិយោគទាំងក្នុង និងក្រៅប្រទេស។ ជាក់ស្ដែងផ្លូវជាតិលេខ៥ ក្រោយពេលដាក់ឱ្យប្រើប្រាស់ក៏ឃើញថាមានវិនិយោគិនបរទេសជាច្រើនចាប់ផ្ដើមចាប់អារម្មណ៍បណ្ដាក់ទុនវិនិយោគនៅតំបន់ជាប់ផ្លូវជាតិដ៏សំខាន់មួយនេះ ។
គួររំលឹកដែរថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានណែនាំឱ្យអភិបាលខេត្តនានា ផ្សព្វផ្សាយពីសក្ដានុពលនៅក្នុងខេត្តរបស់ខ្លួន ដើម្បីកៀរគរ ទាក់ទាញការវិនិយោគ និងស្រូបទាញវិនិយោគិនក្នុង និងក្រៅប្រទេសចូលបណ្ដាក់ទុន ដោយសម្ដេចក៏គ្រោងនឹងរៀបចំលើកទឹកចិត្តដល់អភិបាលខេត្តណាដែលមានសមត្ថភាពទាក់ទាញអ្នកវិនិយោគបានច្រើនជាងគេផងដែរ ៕
Account
Security
Favourite Content