សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា ក្រុមហ៊ុនផលិតរថយន្តអគ្គិសនីរបស់វៀតណាម VinFast បានចាប់ផ្តើមផលិតកម្មរោងចក្រក្នុងស្រុកទីពីររបស់ខ្លួនហើយកាលពីថ្ងៃអាទិត្យកន្លងទៅនេះ ក្នុងគោលបំណងបង្កើនទិន្នផលរថយន្តខ្នាតតូចដែលមានតម្លៃសមរម្យ។
ក្រុមហ៊ុន VinFast បាននិយាយនៅក្នុងសេចក្តីថ្លែងការណ៍មួយថា រោងចក្រថ្មីនេះមានទីតាំងនៅខេត្ត Ha Tinh លើផ្ទៃដីទំហំ ៣៦ ហិកតា និងមានសមត្ថភាពផលិតប្រចាំឆ្នាំ២០០ ០០០ គ្រឿង។ ទន្ទឹមនឹងនេះ គេរំពឹងថា រោងចក្រទីមួយរបស់ VinFast នៅភាគខាងជើង Haiphong នឹងឈានដល់សមត្ថភាពផលិតបាន ៩៥០ ០០០ គ្រឿងនៅឆ្នាំក្រោយ។ VinFast ត្រូវបានគាំទ្រដោយក្រុមហ៊ុនមេ Vingroup ដែលជាក្រុមហ៊ុនធំជាងគេរបស់វៀតណាម។ លើសពីនេះ VinFast បានកំណត់គោលដៅប្រកបដោយមហិច្ឆតាក្នុងការបង្កើតរោងចក្រផលិតនៅក្នុងទីផ្សារអន្តរជាតិរួមមាន សហរដ្ឋអាម៉េរិក ឥណ្ឌា និងឥណ្ឌូនេស៊ី ប៉ុន្តែការពង្រីកខ្លួនជាសកលគឺជាឧបសគ្គធំមួយដោយសារ ការធ្លាក់ចុះនៃតម្រូវការ និងការប្រកួតប្រជែងដ៏តឹងតែង។ កាលពីឆ្នាំមុន Vinfast បានប្រកាសថា ប្រតិបត្តិការរោងចក្រអាម៉េរិករបស់ខ្លួននឹងត្រូវពន្យារពេលរហូតដល់ឆ្នាំ ២០២៨ ប៉ុន្តែរោងចក្រដំឡើងនៅឥណ្ឌាត្រូវបានរំពឹងថានឹងដំណើរការនៅខែកក្កដាខាងមុខនេះ។
លោក Nguyen Viet Quang នាយកប្រតិបត្តិក្រុមហ៊ុន Vingroup លើកឡើងថា “នៅពេលដែលរោងចក្រនៅខេត្ត Ha Tinh បើកដំណើរការ នោះវានឹងរួមចំណែកដល់គោលដៅរបស់ VinFast ក្នុងការផលិតរថយន្តសរុបចំនួន ១ លានគ្រឿងក្នុងមួយឆ្នាំ ដើម្បីបំពេញតម្រូវការទីផ្សារក្នុងស្រុក និងការកើនឡើងតម្រូវការពីបរទេស”។
គួរឲ្យបញ្ជាក់ដែរថា ក្រុមហ៊ុនផលិតរថយន្ត EV បានកំណត់គោលដៅចែកចាយរថយន្តចំនួន ២០០ ០០០ គ្រឿងសម្រាប់ឆ្នាំ ២០២៥ ខណៈដែលលក់បានប្រហែល ៥៦ ០០០ គ្រឿងក្នុងរយៈពេលប្រាំខែដំបូង។ Vinfast រាយការណ៍ថា ប្រាក់ចំណូលសម្រាប់ត្រីមាសទីមួយបានកើនឡើង ១៥០% ឬ ៦៥៦,៥ លានដុល្លារ បើធៀបនឹងរយៈពេលដូចគ្នាកាលពីឆ្នាំមុន៕
Account
Security
Favourite Content