ភ្នំពេញ៖ កិច្ចពិភាក្សាតុមូលស្តីពី «ស្ថានភាពបំណុលនៅកម្ពុជា» បានបង្ហាញឱ្យដឹងថា គិត​ត្រឹម​ដំណាច់​ត្រីមាសទី​៣ ​ឆ្នាំ២០២៤​ បំណុលឯកជននៅក្នុងប្រទេសកម្ពុជា មានប្រជាពលរដ្ឋ​សរុប​ប្រមាណ​៥លាននាក់ បាន​ និង​កំពុង​ប្រើប្រាស់ឥណទាន ដោយ​មានទឹកប្រាក់រហូតដល់ជាង ៥៧ពាន់លានដុល្លារ ដែលចំនួននេះអ្នកសេដ្ឋកិច្ចបានលើកឡើងថា ធៀបនឹង GDP នៅកម្ពុជា​ ហាក់ដូចជាមិនទាន់មានបញ្ហានៅឡើយទេ។

ឯកឧត្តមបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានបង្ហាញឱ្យដឹងពីតួលេខនេះ​នៅក្នុងកិច្ចពិភាក្សាតុមូល ស្តីពី «ស្ថានភាពបំណុលនៅកម្ពុជា» ដែលរៀបចំដោយ រាជបណ្ឌិត្យសភាកម្ពុជា កាលពីរសៀលថ្ងៃទី០៤ ខែធ្នូ ឆ្នាំ២០២៤។

ឯកឧត្តមបណ្ឌិត​បានឱ្យដឹងថា​ បំណុល​ដែល​ពលរដ្ឋ​កម្ពុជា​ទូទាំង​ប្រទេស​ បាន និងកំពុងជំពាក់​ធនាគារ និងមី​ក្រូ​ហិរ​ញ្ញ​វត្ថុ​​ សរុប​ចំនួន៥៧​ពាន់លានដុល្លារអាមេរិក ដែលពីមុនប្រៀបធៀបជាមួយនឹង GDP ឡើងទៅដល់១៨០% តែបច្ចុប្បន្ននៅសល់តែ១២០% ទៅ១៣៥% ​។​

ឯកឧត្តមបណ្ឌិត គី សេរីវឌ្ឍន៍ ​បានបញ្ជាក់ថា ៖

«បំណុលឯកជននៅកម្ពុជា ចំនួនជាង៥៧ពាន់លានដុល្លារនេះ បើធៀបនឹង GDP វាមិនទាន់​ជាមានបញ្ហា​នោះទេ ។ បើសិនជា​ធ្វើកា​រប្រៀប​ធៀ​ប​នឹង​បំណុ​ល​​លើ​​សកលលោក មានរហូតដល់​ ១៤៦​ភាគរយនៃ GDP របស់​សាកលលោក ។ ដូច្នេះបំណុល​របស់កម្ពុជា​នៅមាន​កម្រិត​​ទាប​​នៅឡើយ» ។​

ឯកឧត្តមបណ្ឌិត បន្តថា​ តាមរបាយការណ៍របស់​ការិយាល័យ​ឥណទាន​កម្ពុជា (CBC) បានបង្ហាញថា ​បច្ចុ​ប្ប​ន្ន​មានអ្នកជំពាក់​បំណុល​ចំនួន​៥​លាន​​នាក់​​ ប៉ុន្តែ​បើ​រាប់មែនទែន វាមិនដល់​៥លាននាក់ទេ ពីព្រោះ​ពេល​ទៅខ្ចីលុយ ខាងធនាគារ ​និង​មី​ក្រូ​ហិរញ្ញវត្ថុតម្រូវ​ឱ្យ​មាន​​មនុស្សពីរនាក់ចូល​រួម ដូច្នេះខាងរបាយការណ៍កត់ត្រាទាំងប្ដី-ប្រពន្ធ​ ខណៈបំណុល​ដែលយកមក​ប្រើ​តែ​មួយ​កញ្ចប់ ។

បណ្ឌិតសេដ្ឋកិច្ច គី សេរីវឌ្ឍន៍ បាន​​បន្ថែមថា ៖

«បំណុល​ដែល​ខ្ចីមក​ប្រើ​ប្រាស់​ភាគច្រើន​ជា​លក្ខណៈបុគ្គល មិនមែនជា​កម្ចី​សម្រាប់​សហ​គ្រា​ស ឬនីតិ​បុគ្គល​នោះ​ទេ​ ដែលមានន័យថា​ពលរដ្ឋ​ខ្ចី​បំណុលមក​ប្រើប្រាស់ផ្ទាល់ខ្លួន ។ កម្ចី​ដែល​យកមក​ប្រើ​ប្រាស់សម្រាប់ផ្ទាល់​មានចំនួន​រហូតដល់៥០ពាន់លានដុល្លារអាមេរិក ខណៈកម្ចី​សម្រាប់​ប្រើ​ប្រាស់​ជា​អាជីវកម្ម​មានចំនួនតែ៧​ពាន់​លានដុល្លារ​អាមេ​រិកប៉ុណ្ណោះ»។

បណ្ឌិតសេដ្ឋកិច្ចរូបនេះ បានបញ្ជាក់ថា ទាក់ទង​នឹង​ស្ថានភាពបំណុល​នេះដែរ អ្នកដែល​បានសងត្រឡប់ទៅវិញ​យឺត ៣០​ថ្ងៃ​មាន​ចំនួន​ ៧,៥ភាគរយ ហើយ​សម្រាប់អ្នកសង​យឺត​លើសពី៩០​ថ្ងៃ​មានដល់​ទៅ​ជិត​៦ភាគរយ ទាំង​វិស័យ​ធនាគារ និង​មីក្រូហិរ​ញ្ញ​វត្ថុ ។ សម្រាប់អ្នក​ជំពាក់បំណុលសង​យឺត​ចាប់ពី៩០​ថ្ងៃ ត្រូវ​បានគេចាត់ទុកថា​ជា​អ្នក​ខ្វះលទ្ធភាពសង ឬក៏ឥណ​ទាន​មិន​ដំណើរ​ការ​ ដូច្នេះឥណទាន​មិនដំណើរការ​នៅក្នុងប្រទេស​កម្ពុជា​មានតែ​៦ភាគរយប៉ុណ្ណោះ ខណៈប្រទេស​ផ្សេង​ៗ​មានរហូតដល់​ជាង​១០ភាគរយ ដូចជានៅប្រទេស​ថៃ ឥណ​ទាន​មិន​ដំណើ​រការ​រហូតដល់ ១៧ ​ឬ ១៨​ភាគរយ​ឯណោះ ​។​

នៅក្នុងឱកាសនេះផងដែរ លោក សុខ វឿន អនប្រធានក្រុមប្រឹក្សាភិបាលសមាគមមីក្រូហិរញ្ញវត្ថុនៅកម្ពុជា បានថ្លែងឱ្យដឹងថា កម្ចីអនឡាញ ឬកម្ចីក្រៅប្រព័ន្ធ អតិថិជនទាំងអស់មិនត្រូវទៅប៉ះពាល់នោះឡើយ ដោយសារតែកម្ចីទាំងនេះបានប៉ះពាល់ដល់អតិថិជនជាខ្លាំង ពិសេសកម្ចីក្រៅប្រព័ន្ធ បើអតិថិជនមិនមានលទ្ធភាពសង នឹងឈានដល់ការរឹបអូសទ្រព្យសម្បត្តិ ព្រោះជាកម្ចីមិនមានក្រមសីលធម៌ ប៉ះពាល់ដល់អតិថិជន ធ្វើឱ្យអតិថិជនជាប់បំណុលលើសលុប និងរងគ្រោះកាន់តែធ្ងន់ធ្ងរ៕