សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
របាយការណ៍ដោយ The World Population Review បានបង្ហាញថា ពិភពលោកបច្ចុប្បន្នកំពុងបន្តរស់នៅក្រោមការគំរាមកំហែងដោយក្បាលគ្រាប់ប្រល័យលោក ឬគ្រាប់នុយក្លេអ៊ែរសរុបប្រមាណជា ១៣ ០៨០គ្រាប់ ។
ទោះបីជាចំនួននៃប្រទេសកាន់តែច្រើនដែលអាចមានសមត្ថភាពផលិតគ្រាប់នុយក្លេអ៊ែរដោយខ្លួនឯងធៀបទៅនឹងសម័យសង្គ្រាមលោកទី២ និងសង្គ្រាមត្រជាក់ក៏ពិតមែន ប៉ុន្តែបើយើងក្រឡេកទៅមើលចំនួនគ្រាប់នុយក្លេអ៊ែរដែលអាចប្រើប្រាស់មានចំនួនតិចជាងខ្លាំងណាស់បើប្រៀបធៀបទៅនឹងកាលពីប៉ុន្មានទសវត្សរ៍មុន ហើយកម្រិតនៃគ្រោះថ្នាក់ក្នុងការប្រើប្រាស់ក៏នៅទាបនៅឡើយពីព្រោះថាកាលពីចុងបញ្ចប់នៃសង្គ្រាមលោកទី២ អាវុធប្រល័យលោកត្រូវបានប្រើប្រាស់ដល់ទៅ២ដងនៅក្នុងប្រទេសជប៉ុន ប៉ុន្តែវាមិនបានធ្វើឲ្យផ្ទុះចេញជាសង្គ្រាមនុយក្លេអ៊ែរកើតឡើងនោះទេ។
ព្រឹត្តិការណ៍គួរឲ្យចង់ចាំជាប្រវត្តិសាស្ត្រមនុស្សជាតិ គ្រាប់បែកនុយក្លេអ៊ែរដល់ទៅ២ដងផ្ទួនៗត្រូវបានទម្លាក់ក្នុងកំឡុងសង្គ្រាមលោកលើកទី២។ នៅចុងបញ្ចប់នៃសង្គ្រាមលោកលើកទី២ សហរដ្ឋអាមេរិកបានទម្លាក់គ្រាប់បែកនុយក្លេអ៊ែរដែលមានឈ្មោះថា Little Boy លើទីក្រុងហ៊ីរ៉ូស៊ីម៉ាប្រទេសជប៉ុននៅថ្ងៃទី៦ ខែសីហា ឆ្នាំ១៩៤៥ និងប៉ុន្មានថ្ងៃក្រោយមកគ្រាប់បែកទី២ ដែលមានឈ្មោះថា Fat Man ត្រូវបានទម្លាក់លើទីក្រុងណាហ្គាសាគីប្រទេសជប៉ុននៅថ្ងៃទី៩ ខែសីហា ឆ្នាំ១៩៤៥។
យ៉ាងណាក៏ដោយ ទោះបញ្ចប់សង្គ្រាមលោកទី២ក្តី ប៉ុន្តែសង្គ្រាមត្រជាក់បានផ្ទុះឡើងរវាងមហាអំណាចសេរី និងកុម្មុយនីស ដោយក្នុងនោះមានតួអង្គអាមេរិក និងសហភាពសូវៀត គឺជាអ្នកឈរឈ្មោះ។
អាវុធប្រល័យលោកបានក្លាយទៅជាការរត់ប្រណាំងប្រជែងគ្នារវាងមហាអំណាចទាំង២ ហើយវាបានទាញពិភពលោកឲ្យធ្លាក់ចូលទៅក្នុងមាត់ជ្រោះមរណៈមួយដែលកាលពីអំឡូងឆ្នាំ១៩៦៨ អាវុធនុយក្លេអ៊ែរសរុបរវាងមហាយក្សទាំងពីរមានចំនួនរហូតទៅដល់ជាង ៦០ ០០០ គ្រាប់ ពោលគឺច្រើនជាងបច្ចុប្បន្នដល់ទៅ ៦ដង ដែលសមល្មមនឹងបំផ្លាញពិភពលោកនេះទាំងមូលបាន។
បច្ចុប្បន្ននេះ រុស្ស៊ី រក្សាចំនួនអាវុធនុយក្លេអ៊ែរខ្ពស់បំផុត ដោយមានក្បាលគ្រាប់សរុបប្រមាណ ៦ ២៥៧គ្រាប់ ហើយមានតែ ១ ៤៥៨គ្រាប់ប៉ុណ្ណោះដែលអាចប្រើប្រាស់បាន និងកំពុងដាក់ពង្រាយរួចជាស្រេច ខណៈដែលអាមេរិកដែលមានសរុប ៥ ៥៥០គ្រាប់មានប្រមាណតែជា ១ ៣៨៩គ្រាប់ប៉ុណ្ណោះដែលដាក់ពង្រាយ។
ក្រៅពីនោះគេក៏សង្កេតឃើញមានមហាអំណាចនុយក្លេអ៊ែរថ្មីៗក្រោយសង្គ្រាមត្រជាក់ផងដែរ ដែលមានដូចជា ប្រទេសចិន មានប្រមាណជា ៣៥០គ្រាប់, ប្រទេសបារាំង មាន ២៩០គ្រាប់, អង់គ្លេសមាន ២២៥គ្រាប់, ប៉ាគីស្ថានមាន ១៦៥គ្រាប់, ឥណ្ឌាមាន ១៥៦គ្រាប់, អ៊ីស្រាអែល មាន ៩០គ្រាប់ និងកូរ៉េខាងជើងមានពី ៤០ ទៅ ៥០គ្រាប់ សុទ្ធតែអាចប្រើប្រាស់បានគ្រប់ពេលដូចគ្នាទាំងអស់៕
Account
Security
Favourite Content