សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជា គឺជាប្រទេសមួយដែលមានសណ្ឋានដីល្អ និងអំណោយផលដល់វិស័យកសិកម្ម ពិសេសការដាំដំណាំ បន្លែ ផ្លែឈើ ក៏កាន់តែងាយស្រួលសម្រាប់កសិករ។ ក្នុងនោះ មានដំណាំបីប្រភេទដែលកសិករគួរដាំ ដោយសារតែវាជាប្រភេទដំណាំដែលងាយស្រួលដាំ ដាំរយៈពេលខ្លី និងទទួលបានទិន្នផលលើសលប់។
តួយ៉ាងដំណាំ ត្រចៀកក្រាញ់គឺជាប្រភេទរុក្ខជាតិវល្លិ៍ ដែលមានអត្ថប្រយោជន៍ច្រើនចំពោះសុខភាព ពិសេសគេអាចកិនធ្វើជាភេសជ្ជៈសុខភាពជំនួយសម្រួលដល់បញ្ហាក្រពះពោះវៀន ហើយជាដំណាំដែលប្រជាជនគួរតែដាំតាមផ្ទះ ដោយសារវាងាយស្រួលដាំ និងទទួលបានផលលឿន។
អ្នកស្រី ញ៉ែម គុន្ធា អ្នកដាំ និងលក់ពូជត្រចៀកក្រាញ់នៅខេត្តបាត់ដំបង បានថ្លែងប្រាប់ AMS ថា ៖
“ដើមត្រចៀកក្រាញ់នេះងាយស្រួលដាំ ងាយថែទាំ ហើយបច្ចុប្បន្ន យើងអាចលក់បានទាំងពូជ និងស្លឹក ដោយសារវាមានអត្ថប្រយោជន៍ច្រើន ពិសេសសម្រាប់ជំងឺក្រពះពោះវៀន”
អ្នកស្រី បានបន្ថែមថា ស្លឹកត្រចៀកក្រាញ់មានទីផ្សារណាស់ យើងបេះលក់ស្ទើរមិនទាន់ ដែលយើងអាចលក់បានក្នុងតម្លៃ ២ ម៉ឺនរៀល ក្នុងមួយគីឡូក្រាម ចំណែកកូនវិញ យើងអាចលក់បានក្នុងតម្លៃ ៨០០០ រៀល ក្នុងមួយផើង។ ក្រៅពីលក់ហើយ គេក៏អាចបេះស្លឹកត្រចៀកក្រាញ់ទុកកិនលាយស្ករធ្វើជាភេសជ្ជៈ ដោយសារវាមានអត្ថប្រយោជន៍ច្រើនចំពោះសុខភាពផងដែរ។
ដំណាំដែលកសិករគួរដាំមួយប្រភេទទៀតនោះគឺ ស្ដៅខុសរដូវ ដែលជាពូជស្ដៅប្រភេទថ្មី អាចចេញផ្កាក្នុងមួយឆ្នាំដល់ទៅ ៣ ដង ច្រើនជាងប្រភេទស្ដៅធម្មតា។ ជាក់ស្ដែង អ្នកស្រី ឆាយ ស្រីពេជ្រ ជាម្ចាស់ហាងលក់កូនឈើមួយកន្លែង បានមានប្រសាសន៍ឱ្យដឹងថា ៖
“ពូជស្ដៅ ៣ រដូវ ឬគេហៅថាស្ដៅខុសរដូវ ជាពូជស្ដៅថ្មី ងាយស្រួលដាំ ហើយវាជាប្រភេទស្ដៅតឿ ដែលយើងដាំហើយទទួលបានផលលឿន ងាយស្រួលក្នុងការបេះ ឬកាច់ត្រួយមកទទួលទាន ដែលភាគច្រើនគេទិញយកទៅដាំច្រើនទាំងតាមផ្ទះ និងតាមចំការនានា”
អ្នកស្រីបន្ថែមថា ពូជស្ដៅខុសរដូវនេះមានតម្លៃ ១៥ ០០០ រៀលក្នុងមួយដើម ហើយគេអាចយកទៅដាំ ដោយចំណាយពេលប្រមាណ ១០ ខែ ទៅ ១ ឆ្នាំ គឺអាចទទួលបានផលបណ្ដើរៗ ហើយអាចចេញផ្កាដល់ទៅ ៣ ឬ ៤ ដងច្រើនជាង និងមុនពេលស្ដៅធម្មតាចេញផ្កាផងដែរ។
ចុងក្រោយគឺ ខាត់ណាខុសរដូវ ដែលអាចផ្ដល់ទិន្នផលជាមធ្យមពី ៣២-៣៦ តោនក្នុងហិកតា ដែលកសិករអាចជ្រើសរើសពូជដើម្បីដាំទៅតាមសណ្ឋានដី និងលក្ខខណ្ឌអាកាសធាតុតាមតំបន់ផងដែរ។ សម្រាប់ការដាំដំណាំខាត់ណានេះទៀតសោត ត្រូវការមើលថែ ដូចជាការស្រោចទឹកឱ្យបានគ្រប់គ្រាន់ សម្អាតស្មៅ ជ្រុំដី និងបំប៉នជី មិនខុសពីដំណាំផ្សេងទៀតនោះទេ។
សម្រាប់រយៈពេលដាំវិញ ដំណាំប្រភេទនេះអាចឱ្យផលត្រឹម ៤០-៤៥ ថ្ងៃ ក្រោយពីការស្ទូង ដែលខាត់ណាមានដើមរីក ស្លឹកធំ ហើយចុងទ្រួយមានចេញផ្កាតូចៗ។ មុននឹងប្រមូលផល កសិករត្រូវបញ្ឈប់ការស្រោចជីប្រមាណ ១០ ថ្ងៃសិន ចៀសវាងការសល់សំណល់គីមីប៉ះពាល់ដល់អ្នកបរិភោគ។ ជារួមមក ដំណាំទាំងបីប្រភេទដូចដែលបានរៀបរាប់នេះ សុទ្ធសឹងជាប្រភេទដំណាំដែលបងប្អូនកសិករអាចសាកល្បងដាំបាន ដោយចំណាយទុនតិច ទទួលបានផលច្រើន ពិសេសចូលរួមជាផ្នែកមួយជួយដល់សេដ្ឋកិច្ចក្នុងគ្រួសារ ជាជាងទុកដីឱ្យទំនេរចោល៕
Account
Security
Favourite Content