បរទេស៖ កាសែតដ៏ល្បីឈ្មោះរបស់អាម៉េរិក The Wall Street Journal (WSJ) សរសេរថា កូរ៉េខាងជើងមានភាពជោគជ័យសេដ្ឋកិច្ចដ៏គួរឱ្យភ្ញាក់ផ្អើលបំផុតនៅលើពិភពលោក។ ​កាលពីថ្ងៃទី ៨ ខែមិថុនាកន្លងទៅនេះ WSJ បោះពុម្ពផ្សាយអំពីភាពប្រសើរឡើងនៃសេដ្ឋកិច្ចរបស់កូរ៉េខាងជើង​មិន​ធ្លាប់​មាន​ពី​មុន​មក ដែលភាគច្រើនទទួលបានការគាំទ្រ​ពី​រុស្ស៊ី និង​ចិន ដែល​អាចជួយ​ឲ្យប្រទេសមួយនេះគេច​ផុត​ពី​ទណ្ឌកម្ម​អន្តរជាតិ ប៉ុន្តែពលរដ្ឋក្នុងប្រទេសកំពុងជួបប្រទះបញ្ហាកង្វះអាហារូបត្ថម្ភ និងការរំលោភសិទ្ធិមនុស្សនៅឡើយ។

កាលពីខែសីហាកន្លងទៅនេះ ធនាគារកណ្តាលកូរ៉េខាងត្បូង វិភាគថា ផលិតផលក្នុងស្រុកសរុបពិតប្រាកដ (GDP) របស់កូរ៉េខាងជើងកើនឡើងដល់ ៣៦,៩៦ ទ្រីលានវ៉ុន (២៤,២ ពាន់លានដុល្លារ) ក្នុងឆ្នាំ ២០២៤ ដែលកើនឡើង ៣,៧ ភាគរយ ពីឆ្នាំ ២០២៣។ ថ្វីត្បិតតែតួរលេខនេះមិនល្អខ្លាំង បើធៀបនឹងកូរ៉េខាងត្បូង ប៉ុន្តែសម្រាប់កូរ៉េខាងជើង វាគឺជាកំណើនដ៏ធំបំផុតក្នុងរយៈពេលជាច្រើនឆ្នាំ។

លោក Stephan Haggard សាស្ត្រាចារ្យនៅសកលវិទ្យាល័យ California វិភាគថា សេដ្ឋកិច្ចរបស់កូរ៉េខាងជើងឈានដល់កម្រិតកំពូលក្នុងរយៈពេលប្រហែល ១៥ ឆ្នាំ ក្រោមការដឹកនាំរបស់មេដឹកនាំកូរ៉េខាងជើងលោក គីម ជុងអ៊ុន។

លើសពីនេះ​ គេកត់សម្គាល់ឃើញថា បរទេសជាច្រើនកំពុងចាប់អារម្មណ៍ពីការផ្លាស់ប្តូរនៅក្នុងកូរ៉េខាងជើង ជាពិសេស ការលេចរូបរាងនៃសេវាកម្មតាក់ស៊ី Samhung ស្រដៀងទៅនឹង Uber ឬ Kakao Taxi, ការទូទាត់លុយតាមកូដ QR, រថយន្តអគ្គិសនីរបស់ចិននៅតាមដងផ្លូវ, ហាងលក់សត្វចិញ្ចឹម, ហាងកាហ្វេ gaming, និងហាងលក់រថយន្តមានលក់ម៉ាក BMW ។

WSJ បានពន្យល់ថា នៅពេលដែលកូរ៉េខាងជើងធ្លាក់ចូលទៅក្នុងស្ថានភាពលំបាកក្នុង អំឡុងពេលរាតត្បាត COVID-19 រដ្ឋាភិបាលកែប្រែក្លាយវិបត្តិនេះទៅជាឱកាសមួយដើម្បីពង្រឹងអំណាចរបស់គណបក្សលើសេដ្ឋកិច្ចក្នុងស្រុក។ បក្សកាន់អំណាចបែរជាប្រើប្រាស់វិធានការបិទខ្ទប់ និងវិធានការសុខាភិបាលដ៏តឹងរ៉ឹង ជំនួសឱ្យការបន្ធូរបន្ថយ ឬបើកចំហរប្រទេសដើម្បីស្រោចស្រង់សេដ្ឋកិច្ច។

រដ្ឋាភិបាលក្តោបក្តាប់ការបែងចែកស្បៀងអាហារ និងទំនិញឡើងវិញ ដែលធ្វើឱ្យពលរដ្ឋត្រូវពឹងផ្អែកលើរដ្ឋទាំងស្រុង ជំនួសឱ្យការពឹងផ្អែកលើផ្សារងងឹតខុសច្បាប់ ឬផ្សារឯកជនដូចមុន។ ឱកាសនេះបានអនុញ្ញាតឱ្យបក្សកាន់អំណាចរឹតបន្តឹងការគ្រប់គ្រងលើរាល់សកម្មភាពអាជីវកម្ម រូបិយប័ណ្ណបរទេស និងការចរាចរណ៍ទំនិញនៅក្នុងប្រទេសឱ្យស្ថិតនៅក្រោមបញ្ជារបស់មជ្ឈិមបក្សវិញទាំងស្រុង។

មិនត្រឹមតែប៉ុណ្ណោះ ពាណិជ្ជកម្ម​ជាមួយ​ចិន​ និង​រុស្ស៊ី ​បាន​ក្លាយជា​ខ្សែជីវិត​សេដ្ឋកិច្ច​ថ្មី​សម្រាប់​កូរ៉េខាងជើង។ ចាប់តាំងពីឆ្នាំ ២០២២ មក​ កូរ៉េខាងជើងបានការផ្គត់ផ្គង់គ្រាប់រំសេវ និងបញ្ជូនកងទ័ពជាង ១ ៥០០០ នាក់ទៅគាំទ្ររុស្ស៊ីក្នុងសង្គ្រាមប្រឆាំងនឹងអ៊ុយក្រែន។

វិទ្យាស្ថានយុទ្ធសាស្ត្រសន្តិសុខជាតិរបស់កូរ៉េខាងត្បូង (INSS) ប៉ាន់ប្រមាណថា បើគិតចាប់ពីឆ្នាំ ២០២៣ ដលឆ្នាំ ២០២៥ កូរ៉េខាងជើងអាចរកចំណូលបាន ១០ ពាន់លានដុល្លារតាមរយៈការផ្គត់ផ្គង់អាវុធដល់រុស្ស៊ី ខណៈពេលដែលចំណូលពាណិជ្ជកម្មប្រចាំខែជាមួយចិនបានឈានដល់កម្រិតខ្ពស់បំផុតក្នុងរយៈពេល ៨ ឆ្នាំ។

ទោះជាយ៉ាងណាក្ដី WSJ រិះគន់ដែរថា មានតែក្រុមអភិជនក្នុងទីក្រុងព្យុងយ៉ាងប៉ុណ្ណោះដែលទទួលបានផលផ្លែផ្កានៃកំណើននេះ ខណៈដែលតំបន់ភាគច្រើនកំពុងរស់នៅក្នុងភាពក្រីក្រ និងរងគ្រោះពីកង្វះអាហារូបត្ថម្ភនៅឡើយ។

មិនត្រឹមតែប៉ុណ្ណោះ កូរ៉េខាងជើងនៅតែជាប្រទេសមួយក្នុងចំណោមអ្នករំលោភសិទ្ធិមនុស្សដ៏អាក្រក់បំផុត ដោយសារពលរដ្ឋអាចត្រូវបានប្រហារជីវិតដោយសារបទល្មើសដូចជា ការមើលរឿងភាគកូរ៉េខាងត្បូងដោយសម្ងាត់៕