ភ្នំពេញ ៖ ACE គឺជាឈ្មោះចង្ក្រានបរិស្ថានមួយប្រភេទដែលបង្កើតឡើងដោយកូនខ្មែរ ខណៈដែលបច្ចុប្បន្នមានទីតាំងនៅក្នុងខេត្តសៀមរាប។ ចង្ក្រាននេះត្រូវបានបង្កើតឡើងជាមួយមុខងារទំនើបដែលអាចសន្សំសំចៃថវិកា ចូលរួមថែរក្សាបរិស្ថាន និងអាចធានាសុវត្ថិភាពអ្ដល់នកប្រើប្រាស់បានទៀតផង។

តាមរយៈចង្ក្រាននេះ គេអាចប្រើអុសតិចជាងមុន អាចតម្លើង ឬបន្ថយកម្ដៅបាន និងអាចកាត់បន្ថយផ្សែងរហូតទៅដល់ ៩៥% ដែលនេះជាការគិតគូរពីសុខមាលភាពរបស់អ្នកប្រើប្រាស់។

អ្នកស្រី រ៉ែន រីម រស់នៅស្រុកថ្មពួក ខេត្តសៀមរាប ដែលជាអតិថិជនប្រើប្រាស់ចង្ក្រានបរិស្ថាននេះបានរៀបរាប់ឱ្យដឹងថា អ្នកស្រីចម្អិនម្ហូបរាល់ថ្ងៃ ដូច្នេះក៏មានន័យថាត្រូវប្រឈមជាមួយផ្សែងភ្លើងជាប្រចាំផងដែរ។

អ្នកស្រីបន្តរៀបរាប់ថា៖

«ពីមុនធ្វើម្ហូបម្ដងៗ ខ្ញុំប្រើតែចង្ក្រានឡូវដុតអុសធម្មតា អីចឹងទៅត្រូវ​ផ្សែងផ្សារភ្នែក ជួនកាលឈ្លក់ជាមួយផ្សែងទៀត តែពេលប្រើចង្ក្រានបរិស្ថាននេះគឺខ្ញុំងាយស្រួលច្រើនមែនទែន។ មិនត្រឹមតែងាយស្រួលប៉ុណ្ណោះទេ ការប្រើប្រាស់ចង្ក្រានបរិស្ថាននេះ ក៏បានជួយឱ្យអ្នកស្រីសន្សំ​ សំចៃថវិកាបានមួយផ្នែកទៅលើការទិញអុស និងធ្យូងផងដែរ។»

អតិថិជនមួយរូបទៀត គឺលោក ឌន់ ស៊ីណា ដែលជាអាជីវករលក់ម្ហូបកម្មង់នៅខេត្តសៀមរាបបានឱ្យដឹងថា កាលពីមុនលោកធ្លាប់តែប្រើចង្ក្រានធម្មតា ដែលជាមធ្យមប្រើធ្យូងអស់៣ការ៉ុងក្នុងមួយខែដើម្បីចម្អិនអាហារសម្រាប់លក់។ ប៉ុន្តែពេលលោកបានប្រើប្រាស់ចង្ក្រានបរិស្ថាន គឺលោកអាចកាត់បន្ថយការចំណាយបានរហូតទៅដល់ពាក់កណ្ដាល ពោលគឺមួយខែលោកទិញធ្យូងអស់ត្រឹមតែ ១ការ៉ុងកន្លះតែប៉ុណ្ណោះ។

លោកបន្តឱ្យដឹងទៀតថា៖

«ចង្ក្រាននេះមិនខុសពីចង្ក្រានប្រើហ្គាសនោះទេ ព្រោះយើងអាចតម្លើង ឬបន្ថយភ្លើងបាន ដែលត្រូវសម្រាប់អ្នកលក់ដូរដូចជាខ្ញុំ រីឯអុសវិញមិនមែនតែធ្យូងទេ សូម្បី​តែគ្រាប់ត្នោត ស្នូលពោត និងផ្កាត្នោតក៏អាចប្រើដើម្បីចម្អិនអាហារផងដែរ។»

ដោយឡែក អ្នកស្រី ម៉ារ៉ាឌី ជាអាជីវករលក់នំនៅក្នុងផ្សារ ដោយត្រូវចៀននំភ្លាមៗសម្រាប់លក់ និងត្រូវប្រើប្រាស់ចង្ក្រានចំនួន៤ទើបអាចធ្វើទាន់ ប៉ុន្តែអ្នកស្រីថា ខ្លួន និងបុគ្គលិកត្រូវប្រឈមនឹងកម្ដៅភ្លើង និងផ្សែងជារៀងរាល់ថ្ងៃ។

មានបទពិសោធន៍ប្រើប្រាស់ចង្ក្រានបរិស្ថានចំនួន៣ឆ្នាំ អ្នកស្រី ម៉ារ៉ាឌី បានឱ្យដឹងថា អ្នកស្រី និងបុគ្គលិកមានភាពងាយស្រួលជាងមុនក្នុងការប្រកបអាជីវកម្ម ហើយថែមទាំងអាចចំណេញ ប្រាក់សម្រាប់ទិញអុស និងធ្យូងរហូតដល់ទៅពាក់កណ្ដាល។

ជាការកត់សម្គាល់ តាមរយៈការរួមចំណែកជួយទៅដល់សុខមាលភាពរបស់ប្រជាពលរដ្ឋបែបនេះ​ អាជីវកម្មចង្ក្រានបរិស្ថាន ACE Energy បានជាប់ជាអាជីវកម្មបរិយាបន្នកាលពីពេលកន្លងទៅនេះ។ ក្លាយជាអាជីវកម្មគំរូ បច្ចុប្បន្ន ACE Energy កំពុងបន្តពង្រីកសក្កានុពលរបស់ខ្លួនបន្ថែមទៀត សំដៅផ្ដល់ភាពងាយស្រួលដល់ស្ត្រីមេផ្ទះ និងអាជីវករនៅទូទាំងប្រទេសតែម្ដង។

គួរបញ្ជាក់ថា អាជីវកម្មបរិយាប័ន្ន (Inclusive Business – IB)  គឺជាអាជីវកម្មឈរលើ​គោលការណ៍​ធុរកិច្ច ដែលបង្កើត ដំណោះស្រាយជាប្រព័ន្ធ មានភាពច្នៃប្រតិដ្ឋ​ និងមានទ្រង់ទ្រាយ​ធំ ដែលឆ្លើយតប​ទៅនឹងបញ្ហាប្រឈមពាក់ព័ន្ធ របស់ប្រជាជនក្រីក្រ និងប្រជាជនមានចំណូលទាប (BoP និង B40)។ 

បច្ចុប្បន្ន ក្រសួងឧស្សាហកម្ម ដែលជាសេនាធិការរបស់រាជរដ្ឋាភិបាលកំពុងតែជំរុញអាជីវកម្មក្នុង​ស្រុក ឱ្យប្រែក្លាយខ្លួនទៅជាអាជីវកម្មបរិយាបន្ន ដើម្បីជាគោលដៅយុទ្ធសាស្ត្រជំរុញសេដ្ឋកិច្ចជាតិ៕