បរទេស៖ យោងតាមប្រភពពី Inclusivebusiness.net បានលើកឡើងថា ចលនាឆ្ពោះទៅរកសេដ្ឋកិច្ចដែលមាននិរន្តរភាពជាងមុន គឺត្រូវទាមទារឱ្យមានសកម្មភាពចូលរួមរបស់ឧស្សាហកម្មដែលមានភាពកច្នៃប្រឌិត និងការអនុវត្តដំណោះស្រាយឆ្លាតវៃ។

ក្រោមគំរូអាជីវកម្មបរិយាបន្នរបស់ខ្លួន Covestro បានធ្វើការជាមួយនឹងភ្នាក់ងាររដ្ឋាភិបាល ដើម្បីផ្សារភ្ជាប់ទៅនឹងកសិករ ស្ត្រី និងគ្រួសារក្នុងតំបន់នៃសហគមន៍ដែលខ្វះខាត សម្រាប់ការដាក់ពង្រាយបច្ចេកវិទ្យាដែលអាចឱ្យពួកគេបង្កើនសមត្ថភាពរកប្រាក់ចំណូល។ ក្រុមហ៊ុន Covestro គឺជាក្រុមហ៊ុនផលិតវត្ថុធាតុ polymer ដែលមានគុណភាពខ្ពស់ និងឈានមុខគេមួយរបស់ពិភពលោក។ Polymer ត្រូវបានប្រើប្រាស់ក្នុងការផលិតសម្ភារៈសំណង់ ការផលិតកាវ និងប្លាសិ្ទក ដើម្បីឪ្យមានភាពជាប់ស្អិត ធន់សំណឹក និងអាចបត់បែនបាន។ ជាមួយនឹងផលិតផល ដំណើរការ និងវិធីសាស្រ្តប្រកបដោយភាពច្នៃប្រឌិត Covestro បានជួយលើកកំពស់គុណភាពជីវិតប្រកបដោយនិរន្តរភាពនៅក្នុងវិស័យជាច្រើន។ Covestro ផ្គត់ផ្គង់ជុំវិញពិភពលោកក្នុងឧស្សាហកម្មសំខាន់ៗដូចជា ការសាងសង់អគារ វិស័យអគ្គិសនី និងអេឡិចត្រូនិច។

Covestro ត្រូវបានបង្កើតឡើងក្នុងខែកញ្ញា ឆ្នាំ ២០១៥ ដែលមានទីស្នាក់ការកណ្តាលរបស់ខ្លួននៅក្នុងប្រទេសអាល្លឺម៉ង់ និងកន្លែងផលិតចំនួន ៥០ នៅទូទាំងពិភពលោក។ លើសពីនេះ វាមានរោងចក្រផលិតសារធាតុ polycarbonate លំដាប់ពិភពលោកនៅក្នុងប្រទេសថៃ។ Covestro ប្រកាន់ខ្ជាប់នូវសសរស្តម្ភនៃនិរន្តរភាពចំនួនបីគឺ មនុស្ស ភពផែនដី និងប្រាក់ចំណេញ។ បន្ថែមពីនេះ ក្រុមហ៊ុនលើកកម្ពស់ឱ្យមានសារាចរណ៍ចាប់ផ្តើមពីការទិញ ការផលិត ការអនុវត្តន៍ ការបោះចោល និងការកែច្នៃវត្ថុធាតុដើមឡើងវិញ។ ជាមួយនឹងគោលដៅនៃការឈានដល់មនុស្ស ១០ លាននាក់នៅឆ្នាំ ២០២៥ ក្រុមហ៊ុនបានដាក់ចេញនូវដំណោះស្រាយតាមគំរូអាជីវកម្មបរិយាបន្នចំនួនបីនៅក្នុងបណ្តាប្រទេសអាស៊ាន៖ ម៉ាស៊ីនសម្ងួតប្រើថាមពលពន្លឺព្រះអាទិត្យ ប្រព័ន្ធចម្រោះទឹកប្រើថាមពលពន្លឺព្រះអាទិត្យ និងសម្ភារៈលំនៅដ្ឋានក្នុងតម្លៃសមរម្យ។ នៅត្រឹមឆ្នាំ ២០២១ មនុស្ស ៣,២ លាននាក់នៅទូទាំងតំបន់បានទទួលអត្ថប្រយោជន៍ពីបច្ចេកវិទ្យារបស់ Covestro។

ទន្ទឹមនឹងនេះ Covestro ផលិតបានលើសពី ២០០ ០០ ផលិតផលដែលមានផ្ទុកសារធាតុ polyurethanes និង polycarbonates ។ លើសពីនេះ ក្រុមហ៊ុនបានផ្គត់ផ្គង់រោងសម្ងួតដោយប្រើថាមពលពន្លឺព្រះអាទិត្យដល់កសិករខ្នាតតូចនៅប្រទេសឥណ្ឌូនេស៊ី វៀតណាម មីយ៉ាន់ម៉ា និងថៃ ដោយពួកគេប្រើសម្រាប់ការសម្ងួតផលិតផលកសិកម្មដូចជា ចេក ប៉េងប៉ោះ ម្ទេស កាហ្វេ កាកាវ គ្រឿងទេស និងឱសថជាដើម។ ដំណោះស្រាយនេះធ្វើឲ្យកសិផលរក្សាបាននូវពណ៌ និងសាររធាតុចិញ្ចឹមនៅពេលដែលពួកវាត្រូវបានការពារពីកាំរស្មីយូវី ដែលជាលទ្ធផលផ្តល់ទិន្នផលទំនិញមានគុណភាពខ្ពស់។ មិនត្រឹមតែប៉ុណ្ណោះ រោងសម្ងួតមានភាពងាយស្រួលក្នុងការដឹកជញ្ជូន និងដំឡើង ហើយកាត់បន្ថយហានិភ័យនៃការខូចគុណភាព និងបញ្ហាអនាម័យថែមទៀតផង។ ជាមួយនឹងប្រព័ន្ធសម្ងួតប្រើថាមពលពន្លឺព្រះអាទិត្យ កសិករកាហ្វេអាចកាត់បន្ថយការបាត់បង់ទិន្នផលកាហ្វេ និងកាត់បន្ថយពេលវេលាស្ងួតបានយ៉ាងច្រើន។  

ក្នុងកិច្ចសហប្រតិបត្តិការជិតស្និទ្ធជាមួយដៃគូឧស្សាហកម្ម Covestro ក៏បានបង្កើតដំណោះស្រាយកន្លែងស្តុកទុកត្រជាក់ដើរដោយថាមពលពន្លឺព្រះអាទិត្យ ដើម្បីកាត់បន្ថយការខាតបង់ក្រោយការប្រមូលផល (បង្កើនគុណភាពគ្រាប់ពូជផ្លែឈើ និងបន្លែលើសពី ២១ ថ្ងៃ) នៅក្នុងប្រទេសឥណ្ឌូនេស៊ី គ្រាប់ពូជខ្ទឹមក្រហមត្រូវបានរក្សាទុកនៅក្នុងកន្លែងស្តុកទុកត្រជាក់ដើរដោយថាមពលពន្លឺព្រះអាទិត្យ  ដើម្បីឲ្យលទ្ធភាពនៃការដាំដុះកាន់តែប្រសើរឡើង។ មិនត្រឹមតែប៉ុណ្ណោះ រោងសម្ងួតប្រើថាមពលពន្លឺព្រះអាទិត្យ និងកន្លែងស្តុកទុកត្រជាក់ក៏ត្រូវបានប្រើប្រាស់ដោយកសិករនៅអាហ្វ្រិក ឥណ្ឌា បង់ក្លាដែស នេប៉ាល់ និងស្រីលង្កាផងដែរ។

ដើម្បីបង្កើនប្រសិទ្ធភាពថាមពលនៅក្នុងផ្ទះ Covestro បានផលិតបន្ទះដែលមានវត្ថុធាតុ polyisocyanurate (PIR) ដែលមានអ៊ីសូឡង់កម្ដៅល្អ ធន់នឹងសំណើម និងផ្សិត។ ​បើ​ធៀប​នឹង​បច្ចេក​វិទ្យាប្រពៃណី​សាមញ្ញ បច្ចេកវិទ្យានេះ​មាន​លក្ខណៈ​ប្រកួត​ប្រជែង​ដែលអាចត្រូវបានប្រើប្រាស់នៅក្នុងសំណង់មណ្ឌលថែទាំសុខភាព សាលារៀន មណ្ឌលថែទាំកុមារ និងហេដ្ឋារចនាសម្ព័ន្ធសហគមន៍ផ្សេងទៀត។ បន្ថែមពីនេះ ប្រព័ន្ធចម្រោះទឹកដើរដោយពន្លឺព្រះអាទិត្យជួយក្នុងការបន្សុទ្ធទឹកគ្រប់ប្រភេទដោយប្រើថាមពលពន្លឺព្រះអាទិត្យ។ Covestro រួមជាមួយនឹងដៃគូរបស់ខ្លួនក៏មានបច្ចេកវិទ្យាបំប្លែងដីល្បាប់ និងលាមកទៅជាជីជីវសាស្រ្តផងដែរ ខណៈដែល Covestro កំពុងមានបំណងដាក់គំនិតផ្តួចផ្តើមចូលទៅក្នុងសកម្មភាពដែលបំប្លែងលាមកទៅជាជីសរីរាង្គដោយសុវត្ថិភាព។

ការច្នៃប្រឌិតថ្មីៗ និងបច្ចេកវិទ្យារបស់ Covestro ភាគច្រើនត្រូវបានប្រើប្រាស់ដោយកិច្ចសហប្រតិបត្តិការជាមួយរដ្ឋាភិបាល និងដៃគូអាជីវកម្ម ដោយផ្តល់ឱ្យសហគមន៍ក្រីក្រទទួលបានសិទ្ធិប្រើប្រាស់ និងបង្កើនសមត្ថភាពរបស់ពួកគេដើម្បីទទួលបានប្រាក់ចំណេញ។ មិនត្រឹមតែប៉ុណ្ណោះ បច្ចេកវិទ្យាដែលបានអនុវត្តគឺមាននិរន្តរភាព និងកំណត់ការប្រើប្រាស់ហ្វូស៊ីលឥន្ធនៈក្នុងវិស័យកសិកម្ម សំណង់ និងទឹកស្អាត។ បន្ថែមពីនេះ ភាពជាដៃគូជាមួយរដ្ឋាភិបាលបានជួយបង្កើតហិរញ្ញប្បទានសម្រាប់កសិករក្នុងទម្រង់នៃការឧបត្ថម្ភធន (ឧទា៖ ការឧបត្ថម្ភធន ៥០ ភាគរយដោយរដ្ឋាភិបាលថៃក្រោមថាមពលកកើតឡើងវិញ ខណៈដែលរដ្ឋាភិបាលឥណ្ឌាក៏បានផ្តល់ការឧបត្ថម្ភធន ៥០ ភាគរយផងដែក្រោមដំណោះស្រាយទាំងនេះ)។ រយៈពេលក្រោយមកទៀត ដោយសារការចាប់អារម្មណ៍លើបច្ចេកវិទ្យាបានកើនឡើងជាបន្តបន្ទាប់ក្នុងចំណោមក្រុមកសិករជាច្រើន រដ្ឋាភិបាលអាចកាត់បន្ថយការឧបត្ថម្ភធនបាន (រដ្ឋាភិបាលកាត់បន្ថយនៅត្រឹម ៣០ ភាគរយ និង ៣៥ ភាគរយនៅឥណ្ឌា)។ តាមរយៈករណីរបស់ Covestro បានបង្ហាញយ៉ាងច្បាស់ពីរបៀបដែលរដ្ឋាភិបាលអាចធ្វើបានក្នុងការគាំទ្រដល់ការបង្កើនគុណភាព និងបច្ចេកវិទ្យាប្រកបដោយនិរន្តរភាពដល់សហគមន៍ក្រីក្រ៕