ដោយមានជំនាញក្នុងការធ្វើនំប៉ាវ រួមជាមួយការចងចាំនូវរូបមន្តក្នុងការផ្សំគ្រឿងបង្កើនរសជាតិបន្តតាំងពីជំនាន់ជីដូនជីតារបស់ខ្លួន ស្ត្រីមេផ្ទះម្នាក់ បានឆ្លៀតយកពេលទំនេរពីរបស់ខ្លួនមកផលិត និងចម្អិននំបា់វដាក់លក់នៅនឹងលំនៅដ្ឋានរបស់ខ្លួនដើម្បីអាចទទួលបានចំណូលបន្ថែមក្នុងគ្រួសារដោយទទួលបានការគាំទ្រពីបណ្តាញាតិមិត្ត ក៏ដូចជាអតិថិជនទូទៅយ៉ាងច្រើនគួរឱ្យកត់សម្គាល់។

អ្នកស្រី រឿន ចន្ទ័ប៊ុណ្ណារ៉ាវត្តី មានទីលំនៅម្ដុំបឹងស្នោ ខណ្ឌច្បារអំពៅ រាជធានីភ្នំពេញ ដែលជាអ្នកលក់នំប៉ាវ មានយីហោ «ប្រិមប្រិយ» បានប្រាប់ AMS ឱ្យដឹងថា ៖ ឆ្លៀតពេលទំនេរពីកិច្ចការងារផ្ទះជាប្រចាំ អ្នកស្រី តែងរៀបចំចម្អិននំប៉ាវសម្រាប់ដាក់លក់ ដើម្បីអាចទទួលបានចំណូលបន្ថែម ដែលជាទូទៅ ១ ឬ ២​ សប្ដាហ៍ ទើបអ្នកស្រីធ្វើម្ដង។

អ្នកស្រីបានបន្តថា ៖

«ជាទូទៅ ខ្ញុំធ្វើតែនៅពេលដែលខ្ញុំទំនេរពីការងារផ្ទះតែប៉ុណ្ណោះ ដោយការធ្វើនេះគឺមាន ២ រសជាតិ គឺរសជាតិផ្អែម ស្នូលពងមាន់ និងរសជាតិប្រៃ មានស្នូលសាច់ជ្រូកចិញ្ច្រាំលាយជាមួយពងទា។ ដោយឡែក ចំពោះការលក់វិញ គឺមានការកម្ម៉ង់ខ្លះតាមរយៈអ្នកស្គាល់គ្នា និងផុសលក់ក្នុងផេកខ្លះ ហើយធ្វើម្ដងៗមិនមានចំនួនដូចគ្នានោះទេ ភាគច្រើនធ្វើឡើងតាមការកុម្ម៉ង ប៉ុន្តែមានពេលខ្លះអាចឡើងដល់ ៣០០នំក៏មានដែរ»។

យ៉ាងណាក៏ដោយ ពាក់ព័ន្ធទៅនឹងតម្លៃនៃការលក់វិញ អ្នកស្រីបញ្ជាក់ថា អាចថ្លៃជាងនំប៉ាវដែលគេដាក់លក់ទូទៅបន្តិច ពោលគឺនំប៉ាវស្នូលផ្អែម មួយតម្លៃ ៤០០០រៀល ចំណែកនំប៉ាវស្នូលប្រៃវិញ មួយតម្លៃ ៥០០០រៀល ប៉ុន្តែចំពោះអ្នកដែលធ្លាប់ទិញយកទៅទទួលទានម្ដងហើយ ភាគច្រើននឹងមកកុម្ម៉ងទិញទៀត ត្បិតរសជាតិនំប៉ាវរបស់អ្នកស្រីឆ្ងាញ់ និងមានភាពទាក់ទាញខុសពីនំប៉ាវដទៃទៀត។

អ្នកស្រីបានរៀបរាប់ទៀតថា មុខរបរនេះ អ្នកស្រីចាប់ផ្តើមលក់នៅឆ្នាំ២០២០ ដោយសារតែអ្នកស្រីចូលចិត្ត និងស្រឡាញ់មុខជំនាញមួយនេះ។ ពោល គឺតាំងពីជំនាន់ជីដូន ជីតា របស់អ្នកស្រី គឺជាអ្នកជំនាញធ្វើនំប៉ាវលក។

ចំពោះវត្ថុធាតុដើមក្នុងការរៀបចំផលិត និងចម្អិន គឺមិនខុសពីនំប៉ាវដទៃទៀតនោះទេ ដែលមានដូចជា ម្សៅមី មេនំ ពងទា ពងមាន់ ខ្លាញ់ជ្រូក មើមត្រាវ ស្លឹកខ្ទឹម ខ្ទឹមក្រហម ផ្សិតក្រៀម និងគ្រឿងទេសផ្សំរសជាតិ ប៉ុន្តែអ្វីដែលជាចំណុចពិសេសដែលធ្វើឱ្យអតិថិជនតែងតែនិយមគាំទ្រនំប៉ាវប្រិមប្រិយ គឺផ្នែកសំបកនំមានសភាពទន់ ល្មួត មិនមានធុំក្លិនឈួល ហើយទាំងសំបក និងស្នូលគឺមានរសជាតិឈ្ងុយឆ្ងាញ់រមួតចូលជាតិគ្នា មិនទ្រលាន់ ដោយសារតែវត្ថុធាតុដើមត្រូវបានធ្វើឡើងប្រកបដោយអនាម័យ ផ្សំគ្រឿងតាមរូបមន្តដែលចេះបន្តពីគ្រួសាររាប់សិបឆ្នាំមកហើយ។

ក្រៅពីនំប៉ាវ អ្នកស្រី ចន្ទ័ ប៊ុណ្ណារ៉ាវត្តី ក៏មានលក់ជាប្រភេទអាហារសម្រន់ផ្សេងទៀតនៅមុខផ្ទះផងដែរ ដូចជា ការ៉េមចេក ផាសិន ចេកឆាប ដំឡូងឆាប ។ យ៉ាងណាមិញ សម្រាប់ថ្ងៃអនាគត ប្រសិនជាអាចមានលទ្ធភាព និងឱកាសល្អ អ្នកស្រីក៏ចង់ពង្រីកការផលិត និងបោះលក់ទៅបណ្តាតាមហាងផ្សេងៗ ក៏ដូចជានៅតាមកម្មវិធីនានាផងដែរ ដើម្បីឱ្យគេបានស្គាល់ពីរសជាតិនំប៉ាវប្រិមប្រិយបន្តរូបមន្តដូនតានេះ ជាពិសេស អាចឆ្លៀតពេលរកចំណូលបន្ថែមសម្រាប់ក្រុមគ្រួសារផងដែរ៕