ភ្នំពេញ ៖ សមិទ្ធផលឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន សម្រេចបាននូវកំណើនដ៏រឹងមាំ ដោយសមតុល្យឥណទាន និងចំនួនគណនីឥណទានមានការកើនឡើងស្ទើរគ្រប់តំបន់ ហើយចំនួននៃការស្នើសុំឥណទានបុគ្គលសម្រាប់ប្រើប្រាស់ផ្ទាល់ខ្លួនមានការកើនឡើងក្នុងត្រីមាសទី២ បើប្រៀបធៀបនឹងត្រីមាសមុន។

យោងតាមរបាយការណ៍របស់ក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី (CBC) បានឱ្យដឹងថា ចំនួននៃពាក្យស្នើសុំឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនធ្លាក់ចុះជារួម -១%។ ចំនួននៃពាក្យស្នើសុំកម្ចីប្រើប្រាស់ផ្ទាល់ខ្លួនធ្លាក់ចុះចំនួន ២% ប្រៀបធៀបនឹងត្រីមាសមុន។ ការស្នើសុំប័ណ្ណ ឥណទានមានការកើនឡើង ធៀបនឹងត្រីមាសមុនចំនួន +១៥% និងពាក្យស្នើសុំកម្ចីអចលនទ្រព្យកើនឡើង ចំនួន +១៧%។

ចំនួនគណនីឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនសរុបមានការកើនឡើងគួរសម ចំនួន +៤,៧៥% ដែលនាំឱ្យចំនួនគណនីសរុបមានចំនួន ១,៩២ លានគណនី។ សមតុល្យសរុបកើនឡើង +០,៦៧% ឈានដល់ ១៥,៣១ ប៊ីលានដុល្លារអាមេរិកនៅត្រីមាសទី២នេះ។

គុណភាពឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន អនុបាតនៃឥណទានសំណងយឺតលើសពី ៣០ថ្ងៃ (30+DPD) មានការកើនឡើងដល់ +៦,២២%។ អតិថិជនភាគច្រើននៅតែមានការប្រើប្រាស់កម្ចីតែមួយស្ថាប័ន (៧០,០១%) ហើយមានគណនីឥណទាន តែមួយគណនី (៥៩,១៩%)។

នៅត្រឹមត្រីមាសទី២ នៃឆ្នាំ២០២៤នេះ ចំនួនអតិថិជនដែលព្យាយាមស្នើសុំឥណទានក្នុងទម្រង់៣ផ្សេងៗគ្នាដូចជា ឥណទានសម្រាប់ប្រើប្រាស់ផ្ទាល់ខ្លួន (Personal Finance) ប័ណ្ណឥណទាន (Credit Cards) និងកម្ចីអចលនទ្រព្យ (Mortgage)។ ពាក្យស្នើសុំឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន បានធ្លាក់ចុះជារួម -១%។ ការធ្លាក់ចុះនៃពាក្យស្នើសុំកម្ចីប្រើប្រាស់ផ្ទាល់ខ្លួនមានចំនួន ២% ក្នុងនេះមានការធ្លាក់ចុះខ្លាំងនៅ តំបន់ទំនាប -៧% នៅតំបន់ខ្ពង់រាប។ ការស្នើសុំប័ណ្ណឥណទាន មានការកើនឡើង +១៥% ក្នុងនេះ មានការកើនឡើងខ្លាំងនៅតំបន់ខ្ពង់រាប +៤៦%។ ការស្នើសុំកម្ចីអចលនទ្រព្យកើនឡើងចំនួន +១៧% ក្នុងនេះមានការកើនឡើងខ្លាំងនៅតំបន់ឆ្នេរ +២៩%។

បម្រែបម្រួលជាភាគរយទំហំទឹកប្រាក់នៃការស្នើសុំឥណទាន ក៏មានការធ្លាក់ចុះចំនួន ៥% ដែលចំនួននេះធ្លាក់ចុះពីត្រីមាសមុនដែលមានចំនួន +២%។ បម្រែបម្រួលនេះបណ្តាលមកពីការធ្លាក់ចុះនៃទំហំទឹកប្រាក់នៃកម្ចីផ្ទាល់ខ្លួន -៩% ខណៈដែលការស្នើសុំប័ណ្ណឥណទានកើនឡើង +១១% និងកម្ចីអចលនទ្រព្យ +១៩% ។ ដំណើរការឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន បង្ហាញអំពីទំហំឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួននៅចុងត្រីមាសទីមួយ នេះឆ្លុះបញ្ចាំងពីទីផ្សារឥណទានសកម្ម។

គិតត្រឹមខែកក្កដា ឆ្នាំ២០២៤ ចំនួនគណនីឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានការកើនឡើង ចំនួន +៤,៧៥% ប្រៀបពីត្រីមាសមុនដែលធ្វើឱ្យចំនួនគណនី នៅទូទាំងប្រទេសសរុបមានចំនួន ១,៩២ លានគណនី។ ក្នុងចំណោមចំនួននេះ ៨១,៤៤% ជាឥណទានសម្រាប់ប្រើប្រាស់ផ្ទាល់ខ្លួន ខណៈចំណែកតូចជាងគេគឺកម្ចីប័ណ្ណ ឥណទាន ៧,៩៧% និងកម្ចីអចលនទ្រព្យមាន ១០,៥៩%។ កំណើននេះត្រូវបានគេមើលឃើញនៅក្នុងគ្រប់តំបន់នៃព្រះរាជាណាចក្រកម្ពុជា (+៧,៣% នៅតំបន់ខ្ពង់រាប +៥,១% នៅតំបន់ឆ្នេរ +៤,៦% នៅតំបន់ទំនាបនិង +៤,៨% នៅតំបន់ទន្លេសាប)។

សមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន ក៏បានបន្តកើនឡើងជាលំដាប់ក្នុងកម្រិត +០,៦៧% គិតត្រឹមពីខែកក្កដា ឆ្នាំ២០២៤។ នៅចុងត្រីមាសនេះ សមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានចំនួន ១៥,៣១ ប៊ីលានដុល្លារអាមេរិក។

បើទោះបីជាចំនួនគណនីនៃកម្ចីអចលនទ្រព្យមានត្រឹមតែ ១០,៥៩% នៃចំនួនគណនីសរុប ក៏ដោយ កម្ចីអចលនទ្រព្យនៅតែមានលើសពីពាក់កណ្តាលនៃសមតុល្យឥណទានលក្ខណៈ បុគ្គលសម្រាប់ប្រើប្រាស់ផ្ទាល់ខ្លួនសរុប ៥២,៩២% ចំណែកឯសមតុល្យឥណទានប្រើប្រាស់ផ្ទាល់ខ្លួនមានចំណែក ៨១,៤៤% និងសមតុល្យឥណទានប្រើប្រាស់ផ្ទាល់ខ្លួនមានចំណែក ៤៥,៩០%។ សមតុល្យប័ណ្ណឥណទានមានចំណែកតូចគឺត្រឹមតែ ១,១៨% តែ ប៉ុណ្ណោះ។ និយាយជារួម សមតុល្យឥណទានមានការកើនឡើងជាវិជ្ជមាននៅតំបន់ដូចជា +១,៩% នៅតំបន់ខ្ពង់រាប +០,២% នៅតំបន់ទំនាប +២,១% នៅតំបន់ឆ្នេរ និង +២,៥% នៅតំបន់ទន្លេសាប។

គុណភាពឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន បានមកពីអនុបាតនៃគណនីឥណទានជាមួយនឹងការសងយឺត ៣០ ថ្ងៃហួសកាលបរិច្ឆេទ កំណត់ ដែលជា30+ DPD។ វាបង្ហាញពីលទ្ធភាពនៃការបង់សង និង ហានិភ័យនៃការ ខកខាននៅក្នុងត្រីមាស។ អនុបាត 30+DPD កើនឡើងពី ៦,២២% នៅក្នុងត្រីមាសនេះ ពី ៦,០៣% ក្នុងត្រីមាស ទីមួយ ឆ្នាំ២០២៤។ ក្នុងចំណោមផលិតផលទាំងបីនោះ ផលិតផលដែលមាន អនុបាត ៣០+DPD ខ្ពស់បំផុតគឺ ឥណទានប្រើប្រាស់ផ្ទាល់ខ្លួនជាមួយនឹង អនុបាតចំនួន ៧,៤៤%។

ចំនួនសមតុល្យឥណទានមិនដំណើរការលើសពី៣០ថ្ងៃ មានការកើនឡើងជារួម +៣,៩% នៅទូទាំងតំបន់។ ការកើនឡើងដែលច្រើនជាងគេនៃចំនួនទឹកប្រាក់ឥណទាន សំណងយឺតលើសពី៣០ថ្ងៃគឺនៅ តំបន់ទំនាប កើនឡើងចំនួន +៣% តំបន់ទន្លេសាប កើនឡើងចំនួន +៦%, តំបន់ខ្ពង់រាបកើនឡើង +១៤%, ចំនែកឯតំបន់ឆ្នេរមានការកើន ឡើងចំនួន +៥%។

ចំនួនអតិថិជនដែលមានកម្ចីតែមួយស្ថាប័ននៅតែមានកម្រិតខ្ពស់គឺ ៧០,០១%នៃចំនួនអតិថិជនទាំងអស់។ ចំណែកឯអតិថិជនដែលមានកម្ចីច្រើនស្ថាប័ននៅតែមានកម្រិតទាប ដដែលត្រឹម ២៩,៩៩%។ អតិថិជនប្រើប្រាស់ឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនដែលមានគណនី ចំនួន ១ មាន ៥៩,១៩%, អ្នកមានគណនីឥណទានចំនួន ២ មានចំនួន ២៧,៩៥% អ្នកដែលមានគណនីឥណទានចំនួន ៣ មានចំនួន ៩,៤៥% ហើយអ្នកដែលមានគណនីឥណទានច្រើនជាង៣ មានចំនួន ៣,៤១% នៃចំនួនអតិថិជនទាំងអស់។

លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី បានមានប្រសាសន៍ថា តម្រូវការពាក្យស្នើសុំឥណទានបុគ្គលសម្រាប់ប្រើប្រាស់ផ្ទាល់ខ្លួន មានការថយចុះ ប៉ុន្តែសមិទ្ធផលឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួននៅតែវិជ្ជាមាន ជាមួយនឹងចំនួនគណនី និងសមតុល្យកម្ចីក្នុងត្រីមាសទី២ នេះ បើប្រៀបធៀបនឹងត្រីមាសមុន។ លោកបានបន្ថែមទៀតថា គុណភាពឥណទានមានការធ្លាក់ចុះ ជាមួយនឹង ការកើនឡើងនៃអនុបាតនៃគណនីប្រាក់កម្ចីជាមួយនឹងការសងយឺត ៣០ថ្ងៃហួសកាល បរិច្ឆេទកំណត់ពី ៦,០៣% ក្នុងត្រីមាសទីមួយក្នុងឆ្នាំ២០២៤ មក ៦.២២% ក្នុងត្រីមាសនេះ៕