សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការដាំដំណាំ មិនអាចខ្វះបាននោះទេនូវការមើលថែ ស្រោចទឹក និងការកម្ចាត់សត្វល្អិតតាមរយៈមធ្យោបាយផ្សេងៗ។ ក្នុងនោះ កសិករក៏ត្រូវយកចិត្តទុកដាក់លើការប្រើប្រាស់ថ្នាំបាញ់សម្លាប់សត្វល្អិត ដោយអាចកែច្នៃនូវធនធានដែលមានស្រាប់ដើម្បីផលិតនូវថ្នាំពុលធម្មជាតិដែលចំណាយតិច ងាយស្រួល និងមិនប៉ះពាល់ដល់សុខភាពអ្នកប្រើប្រាស់។
ក្នុងកែច្នៃថ្នាំពុលធម្មជាតិ គេត្រូវការធាតុផ្សំរួមមាន មើមប្រង់ ១០គីឡូក្រាម ស្លឹកគ្រៃ ២គីឡូក្រាម ឈើភ្លើង ៥គីឡូក្រាម គ្រាប់ស្លែងធំ ៥គីឡូក្រាម មើមក្រវ៉ាញជ្រូក ៥គីឡូក្រាម មើមរំដេង ៥គីឡូក្រាម ផ្លែស្លាក់ ៥គីឡូក្រាម វល្លិ៍ពេជ្រ ១០គីឡូក្រាម មើមក្ដួច ១០គីឡូក្រាម មើមក្បៀង ៥គីឡូក្រាម ម្ទេសទុំ ២គីឡូក្រាម និងថ្នាំខ្លាំង ២គីឡូក្រាម។ បន្ទាប់មក គេយកធាតុផ្សំទាំងអស់ចិញ្ច្រាំ ហើយបុកឱ្យម៉ត់ រួចយកដាក់ក្នុងពាង យកទឹកស្អាត ២០លីត្រចាក់ចូលពាងនេះ រួចបិទគម្រប និងគ្រប់គ្រងឱ្យបានល្អ។ ត្រូវបើកកូរមួយថ្ងៃម្ដងដើម្បីឱ្យធាតុផ្សំទាំងអស់ឆាប់កាច់ និងបន្តធ្វើបែបនេះ ១៥-២០ថ្ងៃទើបអាចប្រើបាន។
បន្ទាប់ពីផ្អាប់ទុកបានរយៈពេល ១៥-២០ថ្ងៃហើយ ក្នុងការប្រើប្រាស់ យើងយកស្បៃត្រងយកកាកចេញពីថ្នាំពុល ហើយថ្នាំ ១លីត្រអាចលាយជាមួយទឹកបាន ៨-១០លីត្រ ដើម្បីបាញ់ទៅលើដំណាំ។ ក្នុងការប្រើនេះដែរ កសិករគួរបាញ់នៅពេលល្ងាចមេឃត្រជាក់ ព្រោះថ្នាំអាចជាប់លើដំណាំបានយូរ ហើយសត្វល្អិតភាគច្រើនចេញស៊ីដំណាំនៅពេលល្ងាច និងយប់ត្រជាក់។
ការបាញ់នេះផងដែរ កសិករត្រូវបាញ់ពីគល់បាចឡើងលើដើម្បីការពារសត្វល្អិត ពិសេសដង្កូវដែលភាគច្រើនវានៅក្នុងដី និងក្រោមស្លឹកដំណាំ។ សម្រាប់ថ្នាំពុលធម្មជាតិនេះ គេអាចបាញ់បានក្នុងរយៈពេល ៤-៥ថ្ងៃម្ដង។
តាមរយៈបទពិសោធរបស់កសិករគំរូ ប្រភេទដំណាំស្លឹក និងដំណាំស្រូវ ការផ្សំថ្នាំពុល យើងអាចរកធាតុផ្សំតាមតែអាចរកទៅបាន ដោយឡែកចំពោះដំណាំប្រភេទ វារ មានទង យើងមិនអាចផ្សំថ្នាំពុលមានជាតិហឹរ និងក្ដៅបានទេ ព្រោះវាអាចធ្វើឱ្យក្ដៅ និងស្លោកត្រួយ។
គួរបញ្ជាក់ដែរថា ការកែច្នៃថ្នាំពុលធម្មជាតិមានអត្ថប្រយោជន៍ច្រើន ព្រោះវាចំណាយតិច ងាយស្រួលរកវត្ថុធាតុដើម ពិសេសគឺមិនប៉ះពាល់ដល់សុខភាពនៅពេលប្រើប្រាស់ដូចជាថ្នាំពុលគីមីដែលអាចបង្កឱ្យមានបញ្ហាឈឺក្បាល ក្អួតចង្អោរ នោះទេ៕
Account
Security
Favourite Content