សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា តម្លៃមាសបានបន្តឡើងថ្លៃដល់កម្រិតខ្ពស់ជាប្រវត្តិសាស្ត្រ ដោយសារអ្នកវិនិយោគស្វែងរកទ្រព្យសម្បត្តិដែលមានសុវត្ថិភាពចំពេលដែលមានភាពតានតឹងពាណិជ្ជកម្មរវាងសហរដ្ឋអាមេរិក និងចិន។
ថ្មីៗនេះ តម្លៃមាសឡើងថ្លៃ ១ ភាគរយ ឬ ២ ៨៥៨ ដុល្លារអាម៉េរិកក្នុងមួយអោន (នៅលើទីផ្សារកម្ពុជា មាសមួយតម្លឹងមានតម្លៃ ៣ ៤៤១ ដុល្លារអាម៉េរិក និងមួយជីមានតម្លៃ ៣៤៤ ដុល្លារអាម៉េរិក)។
អ្នកវិភាគបានព្យាករណ៍ថា តម្លៃអាចបន្តឡើងថ្លៃទៀតដែលការកើនឡើងនេះគឺបណ្តាលមកពីភាពមិនប្រាកដប្រជានៃភាពតានតឹងពាណិជ្ជកម្មរវាងសហរដ្ឋអាមេរិក និងចិនកើនឡើង។ ជាក់ស្ដែង កាលពីថ្ងៃអង្គារ សប្ដាហ៍នេះ ប្រធានាធិបតីសហរដ្ឋអាម៉េរិក លោក Donald Trump បានដាក់ពន្ធបន្ថែម ១០ ភាគរយលើការនាំចូលរបស់ចិនទាំងអស់ចូលជាធរមាន។ ជាការឆ្លើយតប ទីក្រុងប៉េកាំងនឹងការរឹតបន្តឹងលើការនាំចូលមួយចំនួនរបស់សហរដ្ឋអាមេរិក ដូចជា ពន្ធ ១៥ ភាគរយលើធ្យូងថ្ម និងឧស្ម័នធម្មជាតិរាវ (LNG) របស់សហរដ្ឋអាម៉េរិក និងពន្ធ ១០ ភាគរយលើប្រេងឆៅ គ្រឿងចក្រកសិកម្ម រថយន្តដឹកជញ្ជូនធំ និងរថយន្តភីកអាប់ ដែលមានប្រសិទ្ធភាពចាប់ពីថ្ងៃទី ១០ ខែកុម្ភៈតទៅ។ កាលពីថ្ងៃពុធ ចិនបានដាក់ពាក្យបណ្តឹងទៅអង្គការពាណិជ្ជកម្មពិភពលោក (WTO) ប្រឆាំងនឹងការដាក់ពន្ធថ្មី ១០ ភាគរយរបស់អាម៉េរិកលើការនាំចូលរបស់ចិន និងប្រឆាំងទៅនឹងការលុបចោលរបស់អាម៉េរិកលើការលើកលែងពន្ធសម្រាប់ទំនិញតម្លៃទាប ‘de minimis’ ។
លោក Dominik Sperzel ប្រធានផ្នែកពាណិជ្ជកម្មនៅក្រុមហ៊ុន Heraeus Metals Germany បានលើកឡើងថា ផលវិបាកសេដ្ឋកិច្ចដែលអាចកើតមានពីសង្គ្រាមពាណិជ្ជកម្មរវាងសហរដ្ឋអាមេរិក និងចិនកំពុងធ្វើឱ្យអ្នកវិនិយោគភ័យខ្លាចវិបត្តិសេដ្ឋកិច្ចសកល និងការកើនឡើងនៃអតិផរណា។ គិតត្រឹមដើមឆ្នាំ ២០២៥ នេះ តម្លៃមាសបានកើនឡើងច្រើនជាង ៨ ភាគរយ ដោយសារការភ័យខ្លាចនៃសង្គ្រាមពាណិជ្ជកម្មពិភពលោកបានជំរុញតម្លៃមាសឡើងថ្លៃដល់កម្រិតខ្ពស់បំផុត។ ពាណិជ្ជករ និងអ្នកតាមដានទីផ្សារជាច្រើនសម្រុកទិញមាស ដែលជាទ្រព្យសម្បត្តិមានសុវត្ថិភាព ដោយសារពួកគេព្រួយបារម្ភថាពន្ធរបស់ Trump អាចប៉ះពាល់ដល់សេដ្ឋកិច្ចបន្ថែមទៀត និងជំរុញអតិផរណាកើនឡើង។
កាលពីថ្ងៃពុធ កន្លងទៅនេះ ក្រុមប្រឹក្សាមាសពិភពលោកបានលើកឡើងថា តម្រូវការមាសសកលបានកើនឡើងដល់កំណត់ត្រា ៤ ៩៧៤,៥ តោនក្នុងឆ្នាំ២០២៤ ជំរុញដោយការវិនិយោគខ្ពស់ និងការកើនឡើងការទិញរបស់បណ្តាធនាគារកណ្តាលនៅក្នុងត្រីមាសទី ៤។ ទន្ទឹមនឹងនេះ ទាំងធនាគារស្វីស UBS និងធនាគារអាម៉េរិក Citi បានព្យាករណ៍ថា តម្លៃមាសអាចនឹងឡើងថ្លៃដល់ ៣ ០០០ ដុល្លារក្នុងមួយអោនក្នុងរយៈពេល ៣ ខែខាងមុខទៀត ដោយសារភាពតានតឹងផ្នែកភូមិសាស្ត្រនយោបាយ និងសង្រ្គាមពាណិជ្ជកម្មជំរុញឱ្យមានតម្រូវការទ្រព្យសម្បត្តិមានសុវត្ថិភាព៕
Account
Security
Favourite Content