ភ្នំពេញ ៖ ក្រុមហ៊ុន​ផលិត និងផ្គត់ផ្គង់​គ្រឿង​សំណង់ឈានមុខគេនៅក្នុងតំបន់អាស៊ាន បានបង្ហាញផលិតផល​សំណង់​ថ្មីមួយលើទីផ្សារ​ប្រទេស​កម្ពុជាស្របពេល​នឹង​វិស័យ​សំណង់​​ក្នុង​រយៈ​ពាក់កណ្ដាលឆ្នាំនេះ មានការកំណើន​ជាង​ឆ្នាំមុន​។​ ផលិត​ផលសំណង់ដែល​ក្រុមហ៊ុននេះ​បានបង្ហាញ​គឺក្បឿងសេរ៉ាមិច អ៊ិចសេឡា ក្រេស្ដា (Excella Cresta) ដែលត្រូវ​បាន​ផលិតឡើងជាមួយបច្ចេកវិទ្យាទំនើប រួមបញ្ចូលនូវសិល្បៈ​នវានុវត្តន៍​ដ៏ល្អទាក់ទង​នឹង​ផ្នែកដំបូលអគារ និងលំនៅដ្ឋាន។

លោក Ronnayut Manasatian អគ្គ​នាយ​កចែកចាយ​នៃ​ក្រុមហ៊ុន SCG Distribution And Retail Cambodia ​ បានថ្លែងថា​ ក្បឿង អេសស៊ីជី ប្រភេទអ៊ិចសេឡា ក្រេស្ដា (Excella Cresta) ជាក្បឿងសេរ៉ាមិច ដែល​ត្រូវ​បាន​​ផលិតឡើងតាមបច្ចេកវិទ្យា​ស្រោបពណ៌ពិសេស Advance Glazing Technique ដែលជា​បច្ចេកវិទ្យាផលិតផ្ដាច់មុខរបស់​ក្រុមហ៊ុន អេសស៊ីជី ហើយវាមិនត្រឹមតែមានសោភ័ណភាព និងជាប់បាន​យូរអង្វែងប៉ុណ្ណោះទេ ប៉ុន្ដែក៏ជាជម្រើសដ៏ល្អសម្រាប់​ម្ចាស់លំនៅដ្ឋានដែលចង់បាន​ប្រភេទក្បឿងមិនប៉ះពាល់​ដល់​បរិស្ថានផងដែរ។

ក្រៅពីផលិតផលក្បឿងសេរ៉ាមិចថ្មី ដែលមាន ៣ ពណ៌​សម្រាប់ជ្រើសរើស រួមមានពណ៌ខ្មៅ, ពណ៌ដីឥដ្ឋ និងពណ៌ស នេះ ក្រុមហ៊ុន អេសស៊ីជី ក៏មានបង្ហាញនូវផលិតផលសម្រាប់វិស័យសំណង់ផ្សេងៗជាច្រើន​​ទៀតដែរ ដូចជា  ក្បឿងស៊ីម៉ងត៍អេសស៊ីជីពណ៌ថ្មីៗ  អេសស៊ីជី ស្មាតបត (SCG SmartBoard), អេសស៊ីជី ស្មាតវូត (SCG Smartwood) ព្រមទាំងផលិតផលម៉ាក ឡាយរ៉ា (LYRA) ដែលរួមមាន សម្ភារៈបន្ទប់ទឹក រ៉ូប៊ីណេ ស៊ីងលាងចាន និង​ឥដ្ឋពន្លឺជាដើម ។

គួរជម្រាបថា ក្នុងរយៈពេលជាង ៣០ឆ្នាំកន្លងមកនេះ អេសស៊ីជី បានក្លាយជាក្រុមហ៊ុនដំបូងគេដែលបាននាំចូល និងបង្កើតទីផ្សារ​សម្រាប់​ក្បឿងសេរ៉ាមិច ជាមួយនឹង​ការ​កំណត់​ស្ដង់ដារខ្ពស់នៅក្នុងឧស្សា​ហ​កម្ម​សំណង់។ ក្រុមហ៊ុននេះ​បាន និងកំពុង​បង្កើន​ប្រតិបត្តិការ​របស់ខ្លួន ដោយការរួមបញ្ចូលនូវយុទ្ធសាស្ត្រអភិវឌ្ឍន៍ប្រកប​ដោយចីរភាព (SDGs) របស់​អង្គការ​​​សហប្រជាជាតិ តាមរយៈវិធីសាស្ត្រ “ESG 4 Plus” ដោយសង្កត់ធ្ងន់ទៅលើការកាត់បន្ថយ​ការ​បំភាយ​ឧស្ម័នផ្ទះកញ្ចក់ឱ្យដល់កម្រិតសូន្យ​ (Net Zero Emission) ដោយជំរុញបរិស្ថានបៃតង ការកាត់បន្ថយវិសមភាពសង្គម និងការ​ពង្រឹង​កិច្ច​សហការជាមួយនឹងភាពជឿទុកចិត្ត​តាមរយៈតម្លាភាព ។

​ឯកឧត្តម​ លាង មុនីរឹទ្ធ រដ្ឋលេខាធិការ​ក្រសួង​រៀបចំដែន​ដី នគរូប​នីយកម្ម​ និង​សំណង់​ បានលើ​កឡើងថា បើទោះជាស្ថានភាព​សេដ្ឋកិច្ច​ក្នុងតំបន់​ និងពិភពលោកនៅឆ្នាំ២០២៤​នេះ ហាក់មិនទាន់ប្រសើរ​ពិតមែន ប៉ុន្តែការ​វិនិយោគលើ​សំណង់អគារ​​នៅប្រទេស​កម្ពុជា​រយៈពេល៦ខែ​ ដើមឆ្នាំ២០២៤នេះ​ នៅតែមានភាពល្អប្រសើរ ដោយទទួលបានទុនវិនិយោគ​ប្រមាណ ​២,៤​​ពាន់លានដុល្លារ​អាមេរិក ។

ឯកឧត្តមបានបញ្ជាក់ថា តាមរយៈទុនវិនិយោគក្នុង​រយៈ​ពេល៦ខែ​ដើមឆ្នាំនេះ បានបង្ហាញថា​ វិស័យសំណង់​នៅកម្ពុជា​នៅតែមាន​សញ្ញាវិជ្ជាមាន ខណៈដែលរាជរដ្ឋាភិបាល បាន និងកំពុងអនុវត្តវិធានការលើកទឹកចិត្តដល់បណ្តាវិនិយោគិនជាតិ និងអន្តរជាតិ ដើម្បីជំរុញវិស័យមួយនេះឱ្យកាន់តែមានភាពល្អប្រសើរ។

យោងតាម​របាយការណ៍ស្ថិតិរបស់​អគ្គនាយកដ្ឋានគយ ​និងរដ្ឋាករ​កម្ពុជា បានឱ្យដឹងថា ​ក្នុងរយៈពេល​៨ខែ​ ដើមឆ្នាំ២០២៤​នេះ កម្ពុជាបាននាំចូលដែក និងដែក​ថែប​ មានទំហំទឹកប្រាក់​ប្រមាណជាង​៤០០លានដុល្លារ​អាមេរិក​ កើន​ឡើង​រហូតទៅដល់​ ៥៩,២ភាគរយ​ធៀបនឹង​រយៈពេលដូចគ្នា​កាលពីឆ្នាំ២០២៣ ដែលសបញ្ជាក់​ពីតម្រូវការ​នៃ​សម្ភារៈសំណង់​មាន​ការ​កើន​ឡើង​​វិញនាឆ្នាំ២០២៤នេះ ៕