ភ្នំពេញ ៖ យោងតាមការចេញផ្សាយរបស់សហគ្រិនខ្មែរ (KE)កាលពីពេលកន្លងទៅនេះបានលើកឡើងថា បើទោះបីជាសហគ្រិនភាពនៅកម្ពុជាស្ថិតនៅដំណាក់កាលក្មេងខ្ចីនៅឡើយក្តី ប៉ុន្តែការយល់ដឹង និងការចាប់អារម្មណ៍ទៅលើភាពជាសហគ្រិនក្នុងចំណោមប្រជាជនកម្ពុជាបានកើនឡើងក្នុងរយៈពេលប៉ុន្មានឆ្នាំចុងក្រោយនេះ។ សូមថ្លែងអំណរគុណដល់គំនិតផ្តួចផ្តើមរបស់រដ្ឋាភិបាល និងកម្មវិធីបណ្តុះបណ្តាលធុរកិច្ច(បង្កើត)ថ្មី ជាច្រើនដែលត្រូវបានផ្សព្វផ្សាយនៅក្នុងប្រព័ន្ធអេកូឡូស៊ីនេះ ។

ការវិភាគប្រៀបធៀបទៅលើសសរស្តម្ភនៃប្រព័ន្ធអេកូឡូស៊ីបានបង្ហាញថា កាលពីឆ្នាំ២០១៨ ប្រព័ន្ធអេកូឡូស៊ីរបស់កម្ពុជាត្រូវការមូលធានមនុស្ស និង ជំនាញបន្ថែម ព្រមទាំងការលើកកម្ពស់វប្បធម៌សហគ្រិនភាពផងដែរ ។ សហគ្រិនខ្មែរ បាន និងកំពុងធ្វើការជាមួយដៃគូនានា ដើម្បីលើកកម្ពស់ ការយល់ដឹងអំពីវប្បធម៌សហគ្រិននៅកម្ពុជា ដែលនឹងបង្ហាញនៅផ្នែកខាងក្រោយនៃរបាយការណ៍នេះ ។ ស្នូលនៃសហគ្រិនភាពកម្ពុជា គឺសហគ្រាសធុនតូច និងមធ្យម (SMEs)។ សហគ្រាសធុនតូច និងមធ្យម បានបង្កើតការងារមួយភាគធំ ដែលរួមចំណែកមួយផ្នែកធំនៃផលិតកម្មក្នុងស្រុក និងវិស័យនាំចេញដែលកំពុងរីកចម្រើន។

យោងតាមក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ គិតត្រឹមឆ្នាំ២០២១ កម្ពុជាមានសហគ្រាសធុនតូច និងមធ្យម ប្រមាណ ៥២ម៉ឺន។ សហគ្រាសធុនតូច និងមធ្យម នៅកម្ពុជាត្រូវបានបែងចែកជាវិស័យសំខាន់ៗចំនួន ៣ គឺ ផលិតកម្ម (កែច្នៃកសិកម្ម, កម្មន្តសាល និងរ៉ែ) សេវាកម្ម និងពាណិជ្ជកម្ម (លក់ដុំ និងលក់រាយ) ។

បរិយាកាសសហគ្រាសធុនតូច និងមធ្យម នៅកម្ពុជា មានការផ្លាស់ប្តូរក្នុងរយៈពេលប៉ុន្មានឆ្នាំចុងក្រោយនេះ ហើយរាជរដ្ឋាភិបាលកម្ពុជាបានអនុវត្តគំនិតផ្តួចផ្តើមជាច្រើនដើម្បីធ្វើពិពិធកម្មសេដ្ឋកិច្ច និងជំរុញសហគ្រាសធុនតូច និងមធ្យម ជាសសរស្ដម្ភសំខាន់នៃកំណើនសេដ្ឋកិច្ច។ គំនិតផ្តួចផ្តើមជាច្រើនដើម្បីជំរុញប្រព័ន្ធអេកូឡូស៊ីសហគ្រាសធុនតូច និងមធ្យម នៅកម្ពុជាត្រូវបានដាក់ចេញ និងអនុវត្តនៅឆ្នាំ២០១៩ ៖ ការលើកទឹកចិត្តផ្នែកពន្ធ និងគយសម្រាបសហគ្រាសធុនតូច និងមធ្យម ត្រូវបានអនុម័ត ហើយអង្គភាពឬកម្មវិធីជាច្រើនត្រូវបានបង្កើតឡើងនៅក្រោមការដឹកនាំរបស់ក្រសួងសេដ្ឋកិច្ច និងហិរញ្ញវត្ថុ (ឧទាហរណ៍ដូចជា សហគ្រិនខ្មែរ, ធនាគារសហគ្រាសធុនតូច និងមធ្យម មជ្ឈមណ្ឌលធុរកិច្ចថ្មីតេជោ និងមូលនិធិអភិវឌ្ឍន៍មុខជំនាញ) ។

ប្រព័ន្ធអេកូឡូស៊ីសហគ្រិនភាពរបស់កម្ពុជា ពិតជាកំពុងដើរក្នុងទិសដៅដ៏ត្រឹមត្រូវ និងកំពុងប្រើប្រាស់ជាប្រយោជន៍នូវសមត្ថភាពរបស់ធនធាន មនុស្ស ដែលមានទេពកោសល្យពីក្នុងចំណោមប្រជាជនវ័យក្មេងដែលមានចំនួនកាន់តែកើនឡើង។ នៅក្នុងការសិក្សាថ្មីមួយដោយវិទ្យាស្ថាន បណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) គេបានគូសបញ្ជាក់ថា ១នាក់ក្នុងចំណោមនិស្សិតសាកលវិទ្យាល័យ ៤នាក់ បានត្រៀមខ្លួន និងត្រៀមលក្ខណៈដើម្បីបង្កើតអាជីវកម្មផ្ទាល់ខ្លួនរបស់ពួកគេ៕