បរទេស៖ សេដ្ឋកិច្ចរបស់ប្រទេសវេណេហ្ស៊ុយអេឡាកំពុងធ្លាក់ចូលទៅក្នុងភាពមិនច្បាស់លាស់បន្ទាប់ពីប្រធានាធិបតីលោក Nicolas Maduro ត្រូវបានចាប់ខ្លួនដោយសហរដ្ឋអាម៉េរិក នេះបើយោងតាមការាយការណ៍ពី Al Jazeera។

ចាប់តាំងពីលោក Maduro ត្រូវបានចាប់ខ្លួនកាលពីថ្ងៃសៅរ៍ អាម៉េរិកបានចេញសេចក្តីប្រកាសជាបន្តបន្ទាប់អំពីប្រភពប្រេងរបស់ប្រទេសវេណេហ្ស៊ុយអេឡា ដែលជាទុនបម្រុងច្រើនជាងគេបំផុតរបស់ពិភពលោក។​ កាលពីថ្ងៃពុធ រដ្ឋបាលរបស់ប្រធានាធិបតីអាម៉េរិក លោក Donald Trump បានគំរាមកំហែងបន្ថែមទៀតលើរដ្ឋាភិបាលបណ្តោះអាសន្នរបស់វេណេហ្ស៊ុយអេឡា ប្រសិនបើពួកគេមិនសហការជាមួយនឹងការទាមទាររបស់ខ្លួន ហើយទីក្រុងវ៉ាស៊ីនតោននឹងគ្រប់គ្រងការលក់ប្រេងរបស់វេណេហ្ស៊ុយអេឡាដោយគ្មានកំណត់។

រដ្ឋមន្ត្រីថាមពលរបស់អាម៉េរិក លោក Chris Wright បានលើកឡើងថា អាម៉េរិក បានចាប់ផ្តើមធ្វើទីផ្សារលើប្រេងដែលខ្លួនធ្លាប់ដាក់ទណ្ឌកម្ម និងរក្សាទុកក្នុងស្តុករហូតមកដល់ពេលនេះ ហើយខ្លួននឹងមានគម្រោងគ្រប់គ្រងការលក់ទាំងអស់ថែមទៀតផង។ បន្ថែមពីនេះ ប្រាក់ចំណូលដែលបានមកពីការលក់ទាំងនោះនឹងត្រូវរក្សាទុកនៅក្នុងគណនីរតនាគាររបស់អាម៉េរិក បើទោះបីជាត្រូវចែករំលែករវាងអាម៉េរិក និងវេណេស៊ុយអេឡាក៏ដោយ។ ការអត្ថាធិប្បាយរបស់លោក Wright បានកើតឡើងមួយថ្ងៃបន្ទាប់ពីរដ្ឋបាល Trump ប្រកាសថា ពួកគេបានធ្វើកិច្ចព្រមព្រៀងជាមួយទីក្រុងការ៉ាកាសលើការនាំចេញប្រេងឆៅពីវេណេហ្ស៊ុយអេឡាដែលមានតម្លៃដល់ទៅ ២ ពាន់លានដុល្លារអាម៉េរិក ដោយសារប្រេងជាប់ទណ្ឌកម្មមានចន្លោះពី ៣០ និង ៥០ លានបារ៉ែល។

លោក Rachel Ziemba ជំនួយការជាន់ខ្ពស់នៅក្នុងមជ្ឈមណ្ឌលសន្តិសុខអាម៉េរិក បានវិភាគថា ក្នុងរយៈពេលវែង រដ្ឋបាល Trump ទំនងជានឹងបន្ធូរបន្ថយទណ្ឌកម្មលើប្រេងរបស់វេណេហ្ស៊ុយអេឡា។ លោក Trump អះអាងថា ក្រុមហ៊ុនប្រេងរបស់អាម៉េរិកនឹងវិនិយោគរាប់ពាន់លាននៅក្នុងវិស័យប្រេងរបស់វេណេហ្ស៊ុយអេឡាដែលនឹងសម្រួលដល់លំហូរនៃវិនិយោគិនបរទេសដែលអាចផ្តល់ដើមទុន ឧបករណ៍ និងជំនាញមកកាន់ប្រទេសមួយនេះ។ បច្ចុប្បន្ន​នេះ វេណេហ្ស៊ុយអេឡាមានទិន្នផល​ប្រេង​​ជិត ១ លាន​បារ៉ែល​ក្នុង​មួយ​ថ្ងៃ ប៉ុន្តែស្ថិត​នៅ​ក្រោម​កម្រិត​ខ្ពស់​បំផុត ៣,៥ លាន​បារ៉ែល​ក្នុង​មួយ​ថ្ងៃ​ក្នុង​ទសវត្សរ៍​ឆ្នាំ១៩៩០។

លោកស្រី​ Cynthia Arnson សាស្ត្រាចារ្យរងនៅសាលាសិក្សាអន្តរជាតិ Johns Hopkins បានលើកឡើងថា ទោះបីជាក្រុមហ៊ុនប្រេងបង្កើនការវិនិយោគថ្លៃបំផុតប៉ុណ្ណាក៏ដោយ ប៉ុន្តែបរិយាកាសសេដ្ឋកិច្ចនៅតែពិបាកស្មាន ជាពិសេស ថាតើវាមានស្ថិរភាពប៉ុណ្ណា? មិនត្រឹមតែប៉ុណ្ណោះ វាអាចនឹងធ្វើឲ្យសេដ្ឋកិច្ចវ៉េណេស៊ុយអេឡាកាន់តែអាក្រក់ឡើង។

យោងតាមលោក Tim Hunter សេដ្ឋវិទូជាន់ខ្ពស់នៅ Oxford Economics បានលើកឡើងថា ៧៨% នៃថវិការបស់រដ្ឋាភិបាលវេណេស៊ុយអេឡាត្រូវបានបែងចែកទៅជាការចំណាយសង្គម។ ប្រសិនបើហិរញ្ញវត្ថុរបស់រដ្ឋទាំងនោះជួបបញ្ហា ការចំណាយសង្គមនឹងកាន់តែពិបាកដែលនាំមកជាមួយនឹងហានិភ័យនៃភាពចលាចលក្នុងសង្គម ខណៈដែលពលរដ្ឋកំពុងជួបប្រទះការឡើងថ្លៃនៃតម្លៃរស់នៅស្រាប់ទៅហើយ។

Benjamin Radd បុគ្គលិកជាន់ខ្ពស់នៅមជ្ឈមណ្ឌលទំនាក់ទំនងអន្តរជាតិ UCLA Burkle បានលើកឡើងថា ប្រាក់ចំណូលពីប្រេងអាចនឹងក្លាយជាគន្លឹះក្នុងការស្តារសេដ្ឋកិច្ចរបស់វេណេស៊ុយអេឡា ប៉ុន្តែវាប្រើរយៈពេលយូរសម្រាប់បណ្តាប្រទេសអាម៉េរិកឡាទីនក្នុងការត្រៀមខ្លួនក្នុងការទទួលយកការវិនិយោគទំហំដ៏ធំសម្រាប់ហេដ្ឋារចនាសម្ព័ន្ធប្រេង។ ជាមួយគ្នានេះ ស្របពេលដែលប្រធានាធិបតី Trump បានសន្យាថានឹងដំណើរការវិស័យប្រេងរបស់វេណេស៊ុយអេឡា និងគ្រប់គ្រងការលក់ថាមពល ប៉ុន្តែដំណើរការទាំងមូលនៅតែមិនមានភាពច្បាស់លាស់។ កត្តាសំខាន់មួយទៀតគឺ រចនាសម្ព័ន្ធនៅក្នុងរដ្ឋាភិបាលវេណេហ្ស៊ុយអេឡាមានភាពខ្សោយខ្លាំង ដែលធ្វើឲ្យភាពមិនច្បាស់លាស់ទាំងខាងច្បាប់ និងសេដ្ឋកិច្ចនៅតែស្រពិចស្រពិល និងផុយស្រួយ៕