សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឆ្នាំ២០២៥កន្លងទៅនេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន ៦៣០គម្រោង ដែលមានដើមទុនចុះបញ្ជីសរុបបាន ១០ពាន់លានដុល្លារ ដោយក្នុងនោះ តំបន់ជាប់មាត់សមុទ្រកម្ពុជាទទួលបានគម្រោងវិនិយោគពេញលេញចំនួន ១១០គម្រោង ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) ចេញផ្សាយនៅចុងសប្ដាហ៍មុននេះ ។
បើតាមរបាយការណ៍បានឱ្យដឹងថា ក្នុងចំណោមខេត្តទាំង៤ ដែលជាប់មាត់សមុទ្រកម្ពុជា មានតែខេត្តកែបមួយប៉ុណ្ណោះដែលមិនទទួលបានគម្រោងវិនិយោគក្នុងឆ្នាំ២០២៥ ចំណែកខេត្ត ៣ទៀត ទទួលបានគម្រោងសរុប១១០គម្រោង ដោយនោះខេត្តកោះកុង ទទួលបានគម្រោងវិនិយោគច្រើនជាងគេ មានចំនួន ៥២គម្រោង ខណៈខេត្តព្រះសីហនុ មានចំនួន ៥១គម្រោង និងខេត្តកំពតក៏ទទួលបានចំនួន៧គម្រោងផងដែរ។
គួររម្លឹកថា រាជរដ្ឋាភិបាលបានកំណត់យកតំបន់ឆ្នេរជាគោលដៅអភិវឌ្ឍន៍មួយក្នុងចំណោមតំបន់ដែលមានសក្ដានុពលនៅក្នុងប្រទេសកម្ពុជា ជាពិសេសក្នុងខេត្តព្រះសីហនុ ជាក់ស្ដែងរាជរដ្ឋាភិបាលបានដាក់ចេញនូវកម្មវិធីពិសេស ជំរុញការវិនិយោគខេត្តព្រះសីហនុ តាំងពីឆ្នាំ២០២៤ និងបានបន្តរហូតដល់ដំណាច់ឆ្នាំ២០២៦នេះ ដើម្បីលើកទឹកចិត្ត និងទាក់ទាញការវិនិយោគនានាចូលទៅកាន់ខេត្តព្រះសីហនុ ។
យោងតាមលេខាធិការដ្ឋាននៃក្រុមការងារជំរុញការវិនិយោគខេត្តព្រះសីហនុ បានបង្ហាញថា រយៈពេល២ឆ្នាំនៃការអនុវត្តកម្មវិធីជំរុញការវិនិយោគខេត្តព្រះសីហនុ រាជរដ្ឋាភិបាលបានលើកទឹកចិត្តពិសេស សម្រាប់គម្រោងវិនិយោគចំនួន៤១២គម្រោង ជាមួយដើមទុនវិនិយោគប្រមាណ ៧,៩ពាន់លានដុល្លារអាម៉េរិក ។ ក្នុងគម្រោងនោះមានទាំងគម្រោងថ្មី គម្រោងជាប់គាំង និងគម្រោងពង្រីកការវិនិយោគ ។
យោងទៅលើផែនការមេសម្រាប់ការអភិវឌ្ឍខេត្តជាប់តំបន់ឆ្នេរសមុទ្រកម្ពុជា រាជរដ្ឋាភិបាលមានគម្រោងវិនិយោគដ៏ធំមួយដើម្បីអភិវឌ្ឍខេត្តជាប់ឆ្នេរសមុទ្រកម្ពុជាទាំង៤ រួមមានខេត្តព្រះសីហនុ ខេត្តកោះកុង ខេត្តកំពត និងខេត្តកែប ឱ្យក្លាយទៅជាតំបន់សេដ្ឋកិច្ចពិសេសពហុបំណង និងប្រទាក់ក្រឡា ដែលជាប៉ូលសេដ្ឋកិច្ចដ៏សំខាន់មួយរបស់កម្ពុជាក្នុងរយៈពេល១៥ឆ្នាំ ។
លោក លឹម រដ្ឋា ភ្នាក់ងារអចលនទ្រព្យមួយរូបប្រចាំខេត្តកំពត និងកែប បានឱ្យដឹងថា មួយរយៈចុងក្រោយនេះ ការវិនិយោគនៅក្នុងខេត្តទាំងពីរមិនមានសន្ទុះខ្លាំងទេ ប៉ុន្តែការទិញលក់ដីធ្លីនៅតែបន្ត ដោយអ្នកទិញភាគច្រើនរកទីតាំងដីណាដែលមានតម្លៃទាបជាងទីផ្សារ និងទិញទុកយូរ ដោយមិនរំពឹងថានឹងលក់ចេញវិញ ឬធ្វើអាជីវកម្មលើដីនោះក្នុងពេលឆាប់ៗទេ ។
លោកបន្តថា ទីតាំងសក្ដានុពលមួយចំនួននៅក្នុងខេត្តជាប់មាត់សមុទ្ររំពឺងថានឹងមានការវិនិយោគបន្ថែម ហើយធ្វើឱ្យសន្ទុះតម្លៃ និងការទិញលក់ដីធ្លីនឹងមានសកម្មភាពជាងនេះ។ ជាការកត់សម្គាល់ក្នុងរយៈពេលជិត១ទសវត្សរ៍ចុងក្រោយនេះ រាជរដ្ឋាភិបាលបានចំណាយថវិកាលើការវិនិយោគយ៉ាងច្រើនទៅកាន់តំបន់ឆ្នេរ ក្នុងនោះរួមមានផ្លូវតភ្ជាប់ពីតំបន់នានាទៅកាន់ខេត្តជាប់ឆ្នេរសមុទ្រ ដូចជា ផ្លូវល្បឿនលឿន ផ្លូវជាតិលេខ៤ ទៅកាន់ខេត្តព្រះសីហនុ ផ្លូវជាតិលេខ៣ លេខ៣៣ លេខ៤១ ទៅកាន់ខេត្តកំពត កែប លេខ៤៨ និងផ្លូវលេខ១០ ទៅកាន់ខេត្តកោះកុងជាដើម ៕
Account
Security
Favourite Content