សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ទិវារត់ប្រណាំងម៉ារ៉ាតុងអន្តរជាតិចក្រភពអង្គរលើកទី១១ ឆ្នាំ២០២៦ បានក្លាយជាចំណុចទាក់ទាញថ្មីសម្រាប់ទេសចរណ៍កម្ពុជា ដោយទាក់ទាញអ្នកចូលរួមសរុប ៦,៥០០នាក់ ពី ៥១ប្រទេស កើនឡើង ២៥ភាគរយ ធៀបនឹងឆ្នាំ២០២៥ និងបានបង្កើតសកម្មភាពសេដ្ឋកិច្ចជាច្រើននៅក្នុងតំបន់ទេសចរណ៍សៀមរាប។
ព្រឹត្តិការណ៍នេះធ្វើឡើងនៅតំបន់ប្រាសាទអង្គរវត្ត កាលពីថ្ងៃទី២ ខែសីហា ឆ្នាំ២០២៦ ដោយមានអត្តពលិកកម្ពុជាចំនួន ៥,៤៥០នាក់ និងអត្តពលិកអន្តរជាតិ ១,០៥០នាក់។ ក្រៅពីការប្រកួតកីឡា ព្រឹត្តិការណ៍នេះបានទាក់ទាញអ្នកចូលរួម និងអ្នកអមដំណើរឱ្យមកទស្សនាតំបន់បេតិកភណ្ឌពិភពលោក និងប្រើប្រាស់សេវាកម្មទេសចរណ៍ក្នុងស្រុក។
រដ្ឋមន្ត្រីក្រសួងទេសចរណ៍ ឯកឧត្តម ហួត ហាក់ បានឱ្យដឹងថា ប្រទេសដែលមានអត្តពលិកចូលរួមច្រើនជាងគេ រួមមានចិន ២០១នាក់ ជប៉ុន ១០០នាក់ និងចក្រភពអង់គ្លេស ១០០នាក់។
ឯកឧត្តម បានបញ្ជាក់ថា កំណើនអ្នកចូលរួម ជាពិសេសអត្តពលិកអន្តរជាតិ ឆ្លុះបញ្ចាំងពីភាពទាក់ទាញកាន់តែខ្លាំងនៃព្រឹត្តិការណ៍កីឡាអន្តរជាតិនៅតំបន់អង្គរ និងរួមចំណែកជំរុញទេសចរណ៍កីឡា ព្រមទាំងផ្សព្វផ្សាយសក្តានុពលទេសចរណ៍កម្ពុជា និងរូបភាព «កម្ពុជា៖ ព្រះរាជាណាចក្រអច្ឆរិយៈ» ទៅកាន់ពិភពលោក។
ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានប្រាប់បណ្តាញសារព័ត៌មាន AMS នៅរសៀលថ្ងៃទី៣ ខែសីហា ឆ្នាំ២០២៦ថា ព្រឹត្តិការណ៍កីឡាក៏ជាព្រឹត្តិការណ៍ទេសចរណ៍ដែរ ហើយទិវារត់ប្រណាំងម៉ារ៉ាតុងអន្តរជាតិជាផ្នែកមួយនៃព្រឹត្តិការណ៍សំខាន់ៗក្នុងការទាក់ទាញទេសចរជាតិ និងអន្តរជាតិឱ្យមកទស្សនា និងកម្សាន្តនៅកម្ពុជា។
ឯកឧត្តម បានលើកឡើងថា ការចូលរួមរបស់ទេសចរជាតិ និងអន្តរជាតិបង្ហាញថា កម្ពុជាជាគោលដៅទេសចរណ៍ដែលមានសុវត្ថិភាព និងទំនុកចិត្ត ដែលអាចបង្កើនភាពទាក់ទាញសម្រាប់ភ្ញៀវទេសចរ ក៏ដូចជាអ្នកវិនិយោគ។
ឯកឧត្តម កបានបន្តថា អ្នកចូលរួមក្នុងព្រឹត្តិការណ៍មិនមែនមានតែអត្តពលិកនោះទេ ប៉ុន្តែអាចមកជាមួយក្រុមគ្រួសារ មិត្តភក្តិ ឬអ្នកគាំទ្រ ដែលធ្វើឱ្យការចំណាយផ្នែកទេសចរណ៍កើនឡើង។ អ្នកចូលរួមមួយចំនួនអាចមកដល់មុនពេលព្រឹត្តិការណ៍ និងបន្តស្នាក់នៅក្រោយកម្មវិធី ដើម្បីពង្រីកការទស្សនា និងប្រើប្រាស់សេវាកម្មទេសចរណ៍ផ្សេងៗ។
ការចំណាយទាំងនេះរួមមានការស្នាក់នៅតាមសណ្ឋាគារ និងផ្ទះសំណាក់ ការហូបចុក ការធ្វើដំណើរ និងការទិញវត្ថុអនុស្សាវរីយ៍ ដែលបង្កើតប្រាក់ចំណូលដោយផ្ទាល់ដល់ប្រជាពលរដ្ឋ និងអាជីវកម្មនៅតំបន់ជុំវិញព្រឹត្តិការណ៍។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATA) បានប្រាប់ AMS ថា ម៉ារ៉ាតុងអន្តរជាតិគឺជាផ្នែកមួយនៃទេសចរណ៍កីឡា ឬទេសចរណ៍ផ្អែកលើព្រឹត្តិការណ៍ ដែលប្រទេសជាច្រើននៅលើពិភពលោកកំពុងប្រើប្រាស់ ដើម្បីទាក់ទាញភ្ញៀវទេសចរដែលមានគុណភាព និងការចំណាយខ្ពស់។
ទោះជាយ៉ាងណា លោកបានបញ្ជាក់ថា ព្រឹត្តិការណ៍តែមួយមិនអាចស្តារវិស័យទេសចរណ៍ទាំងមូលបានទេ ប៉ុន្តែវាអាចក្លាយជាឧបករណ៍ទីផ្សារដ៏មានប្រសិទ្ធភាព ប្រសិនបើត្រូវបានរៀបចំ និងប្រើប្រាស់ជាយុទ្ធសាស្ត្ររយៈពេលវែង។
លោក ធួន ស៊ីណាន បានសង្កត់ធ្ងន់ថា អ្វីដែលសំខាន់ជាងការរៀបចំព្រឹត្តិការណ៍ គឺការផ្សព្វផ្សាយព្រឹត្តិការណ៍ទៅកាន់ទីផ្សារអន្តរជាតិឱ្យបានទាន់ពេល ដោយសារក្រុមហ៊ុនទេសចរណ៍ ក្រុមហ៊ុនអាកាសចរណ៍ និងទីភ្នាក់ងារទេសចរណ៍ ជាទូទៅរៀបចំផែនការលក់កម្មវិធីធ្វើដំណើរពី ៦ ទៅ ១២ខែជាមុន។
លោកបានលើកឡើងថា កម្ពុជាគួរផ្លាស់ប្តូរពីការផ្សព្វផ្សាយនៅនាទីចុងក្រោយ មករៀបចំផែនការទីផ្សារយ៉ាងហោចណាស់មួយឆ្នាំជាមុន ដើម្បីឱ្យព្រឹត្តិការណ៍ម៉ារ៉ាតុងអាចក្លាយជាផលិតផលទេសចរណ៍អន្តរជាតិពិតប្រាកដ។
លោកបានបញ្ជាក់ថា អត្ថប្រយោជន៍របស់ម៉ារ៉ាតុងអង្គរមិនគួរវាស់ត្រឹមចំនួនអ្នករត់ ៦,៥០០នាក់នោះទេ ប៉ុន្តែត្រូវមើលទៅលើផលប៉ះពាល់សេដ្ឋកិច្ច ការផ្សព្វផ្សាយប្រទេស និងកេរ្តិ៍ឈ្មោះរបស់គោលដៅទេសចរណ៍។
តាមលោក ធួន ស៊ីណាន អត្តពលិកជាង ៦,០០០នាក់មកពី ៥១ប្រទេស មិនមែនមកកម្ពុជាត្រឹមតែដើម្បីចូលរួមរត់ប្រណាំងនោះទេ ប៉ុន្តែពួកគេក៏អាចក្លាយជាអ្នកផ្សព្វផ្សាយកម្ពុជាដោយផ្ទាល់ តាមរយៈរូបភាព វីដេអូ បណ្តាញសង្គម និងបទពិសោធន៍ដែលពួកគេចែករំលែកទៅកាន់មិត្តភក្តិ និងសហគមន៍របស់ពួកគេ។
លោកបានបន្ថែមថា ព្រឹត្តិការណ៍នេះក៏អាចជួយបង្កើនរយៈពេលស្នាក់នៅ និងការចំណាយរបស់ភ្ញៀវ ព្រោះអ្នកចូលរួមជាច្រើនអាចស្នាក់នៅមុន និងក្រោយការប្រកួត ដើម្បីទស្សនាអង្គរ សហគមន៍ ទទួលទានអាហារ ទិញវត្ថុអនុស្សាវរីយ៍ និងប្រើប្រាស់សេវាកម្មទេសចរណ៍ផ្សេងៗ។
ក្រៅពីនេះ វាជួយពង្រឹងរូបភាពកម្ពុជាថា ជាគោលដៅដែលមានសុវត្ថិភាព អាចរៀបចំព្រឹត្តិការណ៍អន្តរជាតិបាន និងមានសមត្ថភាពទទួលភ្ញៀវដែលមានគុណភាព។ រូបភាពនេះមានសារៈសំខាន់ទាំងសម្រាប់ការទាក់ទាញទេសចរ និងការវិនិយោគ។
ការចូលរួមរបស់អត្តពលិកកម្ពុជាជាង ៥,៤៥០នាក់ ក៏បង្ហាញពីសក្តានុពលនៃការលើកកម្ពស់ទេសចរណ៍ក្នុងស្រុក ខណៈការរៀបចំព្រឹត្តិការណ៍នៅតាមតំបន់ទេសចរណ៍សំខាន់ៗអាចជួយឱ្យប្រជាពលរដ្ឋក្នុងស្រុកចូលរួមក្នុងសកម្មភាពទេសចរណ៍ និងកីឡាកាន់តែច្រើន។
ដើម្បីបង្កើនផលប្រយោជន៍ពីព្រឹត្តិការណ៍នេះ លោក ធួន ស៊ីណាន បានស្នើឱ្យពិចារណាពង្រីកម៉ារ៉ាតុងអង្គរពីព្រឹត្តិការណ៍រយៈពេលមួយថ្ងៃ ទៅជា «Angkor Marathon Festival Week» ដែលអាចរួមបញ្ចូលការតាំងពិព័រណ៍ វប្បធម៌ ម្ហូបអាហារ សិក្ខាសាលា កម្មវិធីសុខភាព និងការផ្គូផ្គងអាជីវកម្មទេសចរណ៍ ដើម្បីបង្កើនការចំណាយ និងរយៈពេលស្នាក់នៅរបស់ភ្ញៀវ។
លោកបានពន្យល់ថា ការចាក់បញ្ចូលចំណូលទៅក្នុងសេដ្ឋកិច្ចមិនកើតឡើងតែតាមរយៈថ្លៃចុះឈ្មោះរត់នោះទេ ប៉ុន្តែតាមរយៈ Tourism Value Chain ឬខ្សែច្រវាក់តម្លៃទេសចរណ៍ទាំងមូល។ អ្នកចូលរួម និងអ្នកអមដំណើរត្រូវការសំបុត្រយន្តហោះ ការដឹកជញ្ជូន សណ្ឋាគារ ភោជនីយដ្ឋាន មគ្គុទ្ទេសក៍ ការទិញទំនិញ សេវាកម្មកម្សាន្ត និងសកម្មភាពទេសចរណ៍ផ្សេងៗ។
ការចំណាយទាំងនេះបង្កើតប្រាក់ចំណូលដល់សណ្ឋាគារ ភោជនីយដ្ឋាន ក្រុមហ៊ុនដឹកជញ្ជូន អ្នកលក់វត្ថុអនុស្សាវរីយ៍ សហគមន៍មូលដ្ឋាន និងអាជីវកម្មខ្នាតតូចជាច្រើន។ ជាមួយគ្នានេះ ប្រាក់ដែលភ្ញៀវចំណាយក៏អាចបង្កើត «Multiplier Effect» ឬឥទ្ធិពលគុណ ដោយបន្តចរាចរទៅកាន់កសិករ អ្នកនេសាទ អ្នកផលិតម្ហូបអាហារ អ្នកផ្គត់ផ្គង់សម្ភារៈ និងវិស័យពាក់ព័ន្ធផ្សេងទៀត។
ទោះជាយ៉ាងណា លោក ធួន ស៊ីណាន បានកត់សម្គាល់ថា កម្ពុជាគួរបង្កើន «Economic Capture» ឱ្យបានខ្ពស់ជាងនេះ តាមរយៈការរៀបចំឱ្យភ្ញៀវស្នាក់នៅយូរជាងមុន ចំណាយកាន់តែច្រើន និងបន្តធ្វើដំណើរទៅគោលដៅផ្សេងៗ ដូចជា បន្ទាយស្រី បឹងទន្លេសាប ព្រះវិហារ និងកំពង់ផ្លុក ជាដើម។
លោកបានបញ្ជាក់ថា ប្រសិនបើម៉ារ៉ាតុងអង្គរត្រូវបានភ្ជាប់ជាមួយកញ្ចប់ទេសចរណ៍ កម្មវិធីផ្សព្វផ្សាយរបស់ក្រុមហ៊ុនអាកាសចរណ៍ សណ្ឋាគារ និងភ្នាក់ងារទេសចរណ៍ ព្រមទាំងធ្វើទីផ្សារអន្តរជាតិជាមុនពី ៦ ទៅ ១២ខែ ព្រឹត្តិការណ៍នេះអាចវិវត្តពីព្រឹត្តិការណ៍កីឡាទៅជាយន្តការសំខាន់មួយសម្រាប់ជំរុញសេដ្ឋកិច្ចទេសចរណ៍របស់កម្ពុជា និងពង្រឹងភាពប្រកួតប្រជែងរបស់ប្រទេសក្នុងតំបន់៕
Account
Security
Favourite Content