សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ រដ្ឋចំនួន ២៥ នៅសហរដ្ឋអាម៉េរិក បានដាក់ពាក្យបណ្ដឹងប្រឆាំងនឹងរដ្ឋបាលប្រធានាធិបតី ដូណាល់ ត្រាំ ជុំវិញការដាក់ពន្ធគយថ្មីលើដៃគូពាណិជ្ជកម្មបរទេស ដោយចោទថា រដ្ឋបាលបានប្រើប្រាស់អំណាចហួសដែនកំណត់ដែលច្បាប់អនុញ្ញាត។
យោងតាមការរាយការណ៍របស់ Al Jazeera ពាក្យបណ្ដឹងត្រូវបានដាក់ជូនតុលាការពាណិជ្ជកម្មអន្តរជាតិអាម៉េរិក កាលពីថ្ងៃចន្ទ ដោយរដ្ឋទាំង ២៥ អះអាងថា រដ្ឋបាលលោក ត្រាំ កំពុងប្រើបញ្ហាពលកម្មបង្ខំជាមូលហេតុ ដើម្បីដាក់ពន្ធគយជាថ្មីលើទំនិញនាំចូល។
រដ្ឋបាលលោក ត្រាំ បានដាក់ពន្ធគយថ្មីដោយលើកហេតុផលថា ប្រទេសដៃគូពាណិជ្ជកម្មមិនបានខិតខំប្រឹងប្រែងគ្រប់គ្រាន់ ដើម្បីទប់ស្កាត់ការនាំចូលទំនិញដែលផលិតតាមរយៈពលកម្មបង្ខំ។
លោកស្រី Letitia James អគ្គព្រះរាជអាជ្ញារដ្ឋញូវយ៉ក បានលើកឡើងថា បន្ទាប់ពីតុលាការកំពូលសហរដ្ឋអាម៉េរិក សម្រេចថា ពន្ធបដិការដែលរដ្ឋបាលលោក ត្រាំ បានដាក់កន្លងមក គឺខុសច្បាប់ រដ្ឋបាលកំពុងព្យាយាមប្រើមធ្យោបាយផ្សេងទៀត ដើម្បីដាក់ពន្ធគយដែលខុសច្បាប់ជាថ្មី។
ជាការឆ្លើយតប លោក Kush Desai អ្នកនាំពាក្យសេតវិមាន បានអះអាងថា ពន្ធគយថ្មីទាំងនេះ គឺជាវិធានការស្របច្បាប់ ដើម្បីឆ្លើយតបទៅនឹងការអនុវត្តពាណិជ្ជកម្មអយុត្តិធម៌ពីបណ្ដាប្រទេសដទៃ។
លោកបានបញ្ជាក់ថា ការដែលប្រទេសដៃគូមិនបានដាក់ចេញ និងអនុវត្តវិធានការហាមឃាត់យ៉ាងម៉ឺងម៉ាត់ចំពោះការនាំចូលទំនិញដែលផលិតដោយពលកម្មបង្ខំ គឺជាទង្វើមិនត្រឹមត្រូវ ដែលបង្កផលប៉ះពាល់ដល់ពាណិជ្ជកម្ម និងកម្មករអាម៉េរិក ហើយបញ្ហានេះចាំបាច់ត្រូវដោះស្រាយ។
ចាប់តាំងពីវិលត្រឡប់ចូលកាន់តំណែងជាប្រធានាធិបតីអាម៉េរិកសម្រាប់អាណត្តិទីពីរ លោក ត្រាំ បានជំរុញគោលនយោបាយពន្ធគយខ្ពស់ ដោយអះអាងថា វានឹងជួយលើកស្ទួយវិស័យឧស្សាហកម្មក្នុងស្រុក និងកែប្រែគោលនយោបាយពាណិជ្ជកម្មរបស់ទីក្រុងវ៉ាស៊ីនតោន ដែលធ្លាប់ផ្តោតលើពន្ធទាប និងពាណិជ្ជកម្មសេរី។
កន្លងមក លោក ត្រាំ បានប្រើប្រាស់ច្បាប់ស្តីពីអំណាចសេដ្ឋកិច្ចគ្រាអាសន្នអន្តរជាតិឆ្នាំ ១៩៧៧ (IEEPA) ដើម្បីដាក់ពន្ធគយលើទំនិញនាំចូលពីបណ្ដាប្រទេសជាច្រើន ដោយអះអាងថា អតុល្យភាពពាណិជ្ជកម្មរយៈពេលវែងរបស់អាម៉េរិក គឺជាបន្ទុកជាតិ។
ទោះជាយ៉ាងណា តុលាការកំពូលសហរដ្ឋអាម៉េរិក បានវិនិច្ឆ័យថា ច្បាប់ IEEPA មិនបានផ្តល់សិទ្ធិអំណាចដល់ប្រធានាធិបតីក្នុងការដាក់ពន្ធគយឡើយ។ តុលាការក៏បានសម្រេចថា ការប្រមូលពន្ធបដិការដែលរដ្ឋបាលលោក ត្រាំ បានដាក់កន្លងមក គឺខុសច្បាប់ និងតម្រូវឱ្យរដ្ឋាភិបាលបង្វិលសងប្រាក់ទៅក្រុមហ៊ុនដែលបានបង់ពន្ធទាំងនោះ។
រដ្ឋបាលលោក ត្រាំ បានសងប្រាក់ពន្ធប្រមាណ ៨១ ពាន់លានដុល្លារ រួចមកហើយក្នុងឆ្នាំសារពើពន្ធបច្ចុប្បន្ន ដែលគិតចាប់ពីខែតុលា ឆ្នាំ២០២៥ ខណៈក្នុងរយៈពេលដូចគ្នាកាលពីឆ្នាំមុន ការសងពន្ធមានត្រឹមប្រមាណ ៥ ពាន់លានដុល្លារប៉ុណ្ណោះ។
ដើម្បីទូទាត់ការខាតបង់ពីការសងពន្ធទាំងនេះ លោក ត្រាំ បានដាក់ពន្ធគយបណ្ដោះអាសន្នជាសកល ១០ ភាគរយ ប៉ុន្តែវិធានការនេះបានផុតកំណត់នៅថ្ងៃទី២៤ ខែកក្កដា។ បន្ទាប់មក រដ្ឋបាលបានដាក់ពន្ធគយជុំថ្មីក្រោមមាត្រា ៣០១ នៃច្បាប់ពាណិជ្ជកម្មឆ្នាំ១៩៧៤ ដោយលើកហេតុផលថា វាជាវិធានការឆ្លើយតបទៅនឹងសកម្មភាពសេដ្ឋកិច្ចអយុត្តិធម៌ ឬការរើសអើងពីបណ្ដាប្រទេសដទៃ។
ពន្ធគយថ្មីនេះគ្របដណ្តប់លើទំនិញនាំចូលរបស់អាម៉េរិកជាង ៩៩ ភាគរយ ដែលបានជំរុញឱ្យរដ្ឋទាំង ២៥ ចូលរួមដាក់ពាក្យបណ្ដឹងប្រឆាំងនឹងរដ្ឋបាលលោក ត្រាំ។
ក្រៅពីបណ្ដឹងរបស់រដ្ឋទាំង ២៥ ក៏មានបណ្ដឹងពីរផ្សេងទៀតដែលដាក់ដោយអាជីវកម្មខ្នាតតូច ដោយលើកហេតុផលស្រដៀងគ្នាថា ពន្ធគយថ្មីកំពុងយកបញ្ហាពលកម្មបង្ខំជាមូលហេតុ ដើម្បីប្រមូលពន្ធឡើងវិញ និងទូទាត់ការខាតបង់ បន្ទាប់ពីតុលាការកំពូលបានសម្រេចថា ពន្ធបដិការដែលដាក់កន្លងមកគឺខុសច្បាប់៕
Account
Security
Favourite Content