សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ផាសិន ជារុក្ខជាតិវល្លិ៍មួយប្រភេទដែលផ្លែរបស់វាមានរសជាតិជូរ និងអាចផ្ដល់ផលប្រយោជន៍ច្រើនដល់សុខភាព ព្រោះមានផ្ទុកទៅដោយសារធាតុសំខាន់ៗ និងវីតាមីនជាច្រើនប្រភេទ។ ជាមួយនឹងអត្ថបរយោជន៍ដ៏ច្រើន អ្នកជំនាញក្នុងស្រុកបានសាកល្បងចម្រាញ់ផ្លែផាសិនធ្វើជាស្រាមួយប្រភេទ ដែលមានរសជាតិឈ្ងុយឆ្ងាញ់ រហូតធ្វើជាអាជីវកម្មក្នុងស្រុកប្រកបដោយភាពច្នៃប្រតិដ្ឋខ្ពស់ ហើយថែមទាំងផ្ដល់ប្រយោជន៍ដល់កសិករក្នុងតំបន់ថែមទៀតផង។
ស្រាផាសិនមណ្ឌលគិរី ជាយីហោសិប្បកម្មស្រាផាសិនមួយមានទីតាំងនៅខេត្តមណ្ឌលគិរី ដែលបង្កើតឡើងដោយសហគ្រិនក្នុងស្រុកម្នាក់បន្ទាប់ពីមានគំនិតច្នៃប្រតិដ្ឋផលិតស្រាចេញពីផ្លែផាសិនស្រស់ៗ ដោយកៀបយកទឹកដាក់បន្ទំក្នុងធុងជាមួយសីតុណ្ហភាពជាក់លាក់ ហើយជាលទ្ធផលទទួលបានភាពវិជ្ជមានគួរជាទីមោទន។
លោក ប៊ូ សុភក្ដិ ជាស្ថាបនិកសិប្បកម្មស្រាផាសិនមណ្ឌលគិរីបានរៀប់រាប់ពីដំណើរការអាជីវកម្មនេះឱ្យដឹងថា៖
«ដោយសង្កេតឃើញថា ផាសិនជាកសិផលក្នុងស្រុក មានអ្នកស្គាល់ និងមានអ្នកដាំច្រើន អាចនឹងជន់ទិន្នផល ទើបយើងចង់កែច្នៃឱ្យចេញជាផលិតផលមួយដែលមានប្រយោជន៍សម្រាប់សុខភាព និងទុកបានយូរ ក៏នឹកឃើញពីការច្នៃធ្វើជាស្រា ដែលអាចទុកបានយូរជាងភេសជ្ជៈធម្មតាលើទីផ្សារ ណាមួយវាជាផលិតផលថ្មី ប្លែក មានគុណប្រយោជន៍ និងសមស្របតាមទំនោរអ្នកប្រើប្រាស់មិនថាខ្មែរ ឬបរទេសនោះទេ»។
លោកបន្តថា ៖
«ដំបូងឡើយយើងប្រើផាសិន ដែលជាវត្ថុធាតុដើមនេះ ជាកសិផលក្នុងចំការខ្លួនឯង តែឥឡូវយើងសហការជាមួយកសិករដើម្បីដាំ និងផ្គត់ផ្គង់ឱ្យយើង ហើយកសិករក៏ទទួលបានជំនាញច្រើនបន្ថែមទៀត ទាំងការដាំដំណាំបន្ថែមក្នុងចំការ ជំនាញ និងបច្ចេកទេសកសិកម្មរាប់តាំងពីការដាំ ថែទាំ ស្រោចទឹក ដាក់ជី ដែលយើងបានណែនាំ និងផ្ដល់ឱ្យខាងកសិករ»។
បន្ថែមពីលើនេះ ទោះបីវាជាផលិតផលថ្មី និងជាផលិតផលក្នុងស្រុក តែលោកបានខិតខំស្រាវជ្រាវ និងកែច្នៃមិនថារសជាតិ និងការវេចខ្ចប់នោះទេ ធ្វើយ៉ាងណាឱ្យស្រានេះមានភាពទាក់ទាញ គេស្គាល់ច្រើនដូចជាការបង្កើតឈ្មោះប្លែកៗឱ្យស្រាតាមរសជាតិនីមួយៗ ដូចជាឈ្មោះរសជាតិជីវិត មានរសជាតិផ្អែមល្វីង ជូរចត់ ឯមួយទៀត មានរសជាតិស្រាលស្រួលលេប មានឈ្មោះថា ស្នេហ៍គ្រាដំបូង ជាដើម។
ដោយឡែក កន្លែងផ្សព្វផ្សាយធំរបស់ស្រាផាសិន និងជាកន្លែងដែលគេមិនអាចមើលរំលងពេលទៅលេងខេត្តមណ្ឌលគិរី នោះគឺនៅច្រកចូលទឹកធ្លាក់ប៊ូស្រា។
ពាក់ព័ន្ធនឹងរយៈពេលផលិតវិញត្រូវបានស្ថាបនិកខាងលើបន្ថែមថា តាំងពីពេលកៀបរហូតដល់បានទទួលទានគឺប្រើរយៈ ៦ខែ ដោយត្រូវរក្សាស្រាទុកក្នុងបន្ទប់ដែលមានសីតុណ្ហភាពជាក់លាក់មួយ រហូតដល់វាមានរសជាតិដូចអ្វីដែលចង់បាន។ ចំណែកឯរសជាតិនេះទៀតសោត ក៏អាចប្រែប្រួលខ្លះតាមអាកាសធាតុនៅរដូវប្រាំង និងវស្សា ហើយរដូវដែលមានរសជាតិល្អឥតខ្ចោះនោះគឺនៅរដូវដែលមិនមានភ្លៀង ព្រោះផាសិនមានរសជាតិផ្អែមល្អ។
ចំណែកការផ្គត់ផ្គង់វត្ថុធាតុដើម គេអាចប្រមូលបាន២រដូវ គឺនៅរដូវមិនមានភ្លៀង និងដើមរដូវភ្លៀង ហើយរយៈពេលប្រមូលផលនេះ ក៏អាចខុសៗគ្នាអាស្រ័យទៅតាមប្រភេទពូជដូចជា ផាសិនពណ៌លឿង ឬពណ៌ស្វាយ ហើយកសិករដាំផាសិនម្ដងអាចប្រមូលផលបានដល់ទៅ ២-៣ឆ្នាំក្នុងករណីថែទាំបានល្អ ដើមមិនមានជំងឺ និងទទួលបានផលក្នុងមួយហិកតា បានប្រមាណ ១២-១៥តោនក្នុងឆ្នាំទី១ និង ១៨តោន នៅឆ្នាំទីពីរ។
ក្រៅពីសិប្បកម្មស្រា លោកក៏មានសិប្បកម្មច្នៃផាសិនចេញជាផលិតផលផ្សេងទៀតដូចជា ទឹកផ្លែផាសិន ដំណាប់ផាសិន ជេមផាសិន និងទឹកជ្រលក់ផាសិន តែផលិតផលចម្បងគឺ ស្រាផាសិនដែលបងប្អូនតែងតែនិយមគាំទ្រ។
គួរបញ្ជាក់ដែរថា លោក ប៊ូ សុភក្ដិ បានចាប់ផ្ដើមការដាំ និងស្រាវជ្រាវដំបូងតាំងពីឆ្នាំ២០១២ ដោយសារខ្លួនមានជំនាញខាងកសិកម្មស្រាប់ និងមានមិត្តភក្ដិជាអ្នកជំនាញផ្នែកកសិ-ឧស្សាហកម្មជួយពិភាក្សាប្ដូរយោបល់ក្នុងផលិត និងអាចចុះបញ្ជីរស្រាផាសិនជាផ្លូវការនៅឆ្នាំ២០២៦។
ចុងក្រោយ មា្ចស់អាជីវកម្មខាងលើ ក៏មានចក្ខុវិស័យចង់លើកតម្កើងបន្ថែមទៀតនូវពហុវិស័យប្រទាក់ក្រឡាគ្នា ព្រោះផាសិនជាប្រភេទដំណាំ កសិ-ទេសចរណ៍ ដែលអាចទាក់ទាញភ្ញៀវទេសចរមួយកម្រិត ផ្ដល់នូវភាពចម្រុះដល់អ្នកដែលមកលេងខេត្តមណ្ឌគិរី ដូចជាចំការផាសិន ទឹកធ្លាក់ និងអាចចូលមកភ្លក្សស្រាផាសិនប្រចាំតំបន់បាន៕
Account
Security
Favourite Content