សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ កម្ពុជាកំពុងពង្រឹងសមត្ថភាពបច្ចេកវិទ្យាក្នុងស្រុក និងជំរុញការផ្លាស់ប្តូរទៅរកសេដ្ឋកិច្ចឌីជីថល តាមរយៈយុទ្ធនាការជាតិ «អនុភាពបច្ចេកវិទ្យាខ្មែរ» ដែលមានគោលបំណងលើកកម្ពស់ការបង្កើតថ្មី ការប្រើប្រាស់បច្ចេកវិទ្យាក្នុងអាជីវកម្ម និងការភ្ជាប់អ្នកបង្កើតបច្ចេកវិទ្យាក្នុងស្រុកជាមួយវិស័យឯកជន និងអ្នករៀបចំគោលនយោបាយ។
ព្រឹត្តិការណ៍ «ពន្លឿនការលូតលាស់បច្ចេកវិទ្យាកម្ពុជា» ដែលជាសកម្មភាពដំបូងក្រោមយុទ្ធនាការនេះ ត្រូវបានរៀបចំដោយ B2B Asia News នៅ Factory Phnom Penh កាលពីថ្ងៃទី៣១ ខែកក្កដា ឆ្នាំ២០២៦ ដោយប្រមូលផ្តុំសហគ្រិន ស្ថាបនិកក្រុមហ៊ុនបច្ចេកវិទ្យាបង្កើតថ្មី ម្ចាស់អាជីវកម្មធុនតូច និងមធ្យម អ្នកបង្កើតថ្មី សិស្ស-និស្សិត និងអ្នកជំនាញបច្ចេកវិទ្យា។
ព្រឹត្តិការណ៍ពេញមួយថ្ងៃនេះ បានផ្តោតលើការពង្រឹងជំនាញឌីជីថល និងការអនុវត្តបច្ចេកវិទ្យាជាក់ស្តែង ដើម្បីរួមចំណែកជំរុញប្រព័ន្ធអេកូឡូស៊ីឌីជីថលកម្ពុជាឱ្យកាន់តែរឹងមាំ។
កម្មវិធីពេលព្រឹកបានរៀបចំជាសិក្ខាសាលាផ្តោតលើការលើកកម្ពស់ការយល់ដឹង និងជំនាញឌីជីថល ដោយមានអ្នកជំនាញមកពី BKD Academy, 2080 Ventures និង PharmKulen ចែករំលែកបទពិសោធន៍។ អ្នកចូលរួមបានស្វែងយល់ពីការប្រើប្រាស់ជំនាញឌីជីថលក្នុងការងារប្រចាំថ្ងៃ ការបង្កើតគំនិតច្នៃប្រឌិត ការសរសេរកម្មវិធីដោយប្រើបញ្ញាសិប្បនិម្មិត (AI) ជាជំនួយការ និងការជ្រើសរើសឧបករណ៍ AI សម្រាប់អាជីវកម្មធុនតូច។
នៅពេលរសៀល ព្រឹត្តិការណ៍បានបន្តជាមួយពិព័រណ៍ «ទីផ្សារបច្ចេកវិទ្យា» ដែលផ្តល់ឱកាសឱ្យអ្នកចូលរួមជួបប្រាស្រ័យផ្ទាល់ជាមួយក្រុមហ៊ុនបច្ចេកវិទ្យាបង្កើតថ្មី អាជីវកម្មធុនតូច និងមធ្យមផ្នែកឌីជីថល ក្រុមហ៊ុនបច្ចេកវិទ្យា និងសហគ្រិនជាង ២០រូប។
ជាមួយគ្នានេះ អ្នកបង្កើតថ្មីផ្នែកបច្ចេកវិទ្យាឌីជីថលឈានមុខចំនួន ១០រូប ក៏បានឡើងបង្ហាញស្នាដៃនៅលើឆាក ដោយបង្ហាញពីដំណោះស្រាយ និងផលិតផលឌីជីថលដែលបានដាក់ឱ្យប្រើប្រាស់ជាផ្លូវការរួចមកហើយ។
លោក Anthony Galliano អគ្គនាយក B2B Asia News បានលើកឡើងក្នុងពិធីបើកព្រឹត្តិការណ៍ថា ការផ្លាស់ប្តូរទៅរកឌីជីថលរបស់កម្ពុជាកំពុងបន្តរីកចម្រើន ហើយយុទ្ធនាការ «អនុភាពបច្ចេកវិទ្យាខ្មែរ» មានតួនាទីក្នុងការជួយគាំទ្រ និងលើកកម្ពស់អ្នកបង្កើតថ្មីក្នុងវិស័យបច្ចេកវិទ្យាឌីជីថលក្នុងស្រុក។
លោកបានថ្លែងថា អនាគតសេដ្ឋកិច្ចឌីជីថលរបស់កម្ពុជាកំពុងត្រូវបានបង្កើតឡើងតាមរយៈការសរសេរកូដនៅការិយាល័យនានាក្នុងរាជធានីភ្នំពេញ ការប្រើប្រាស់ម៉ាស៊ីនបម្រើសេវាក្លោដក្នុងស្រុក និងការភ្ជាប់បច្ចេកវិទ្យាទៅកាន់អាជីវកម្មធុនតូចនៅតាមបណ្តាខេត្ត។
លោកបានបន្ថែមថា តាមរយៈ «អនុភាពបច្ចេកវិទ្យាខ្មែរ» B2B Asia News មានបំណងលើកស្ទួយបច្ចេកវិទ្យាដែលបង្កើតឡើងក្នុងស្រុក ហេដ្ឋារចនាសម្ព័ន្ធឌីជីថល ដំណោះស្រាយក្លោដ និងវេទិកាពាណិជ្ជកម្មអេឡិចត្រូនិក។
យុទ្ធនាការ «អនុភាពបច្ចេកវិទ្យាខ្មែរ» មានរយៈពេល៦ខែ និងត្រូវបានរៀបចំដោយ B2B Asia News ដោយមានការគាំទ្រពីក្រសួងប្រៃសណីយ៍ និងទូរគមនាគមន៍ មូលនិធិនៃការកសាងសមត្ថភាព និងការស្រាវជ្រាវ និងការអភិវឌ្ឍលើវិស័យទូរគមនាគមន៍ និងបច្ចេកវិទ្យាគមនាគមន៍ និងព័ត៌មាន (មូលនិធិ ស.អ) និងសហគ្រិនខ្មែរ។
យុទ្ធនាការនេះមានគោលបំណងលើកកម្ពស់បច្ចេកវិទ្យាក្នុងស្រុក ជំរុញកិច្ចសហប្រតិបត្តិការឆ្លងវិស័យ និងបង្ហាញពីដំណោះស្រាយឌីជីថលដែលបង្កើតឡើងដោយអ្នកបង្កើតកម្ពុជា។ វាក៏មានបំណងផ្លាស់ប្តូរការយល់ឃើញ និងកសាងទំនុកចិត្តលើការបង្កើតថ្មីក្នុងស្រុក ព្រមទាំងធ្វើជាស្ពានភ្ជាប់អ្នកបង្កើតបច្ចេកវិទ្យាកម្ពុជាជាមួយអ្នកធ្វើសេចក្តីសម្រេចចិត្តក្នុងក្រុមហ៊ុន វិនិយោគិន និងអ្នករៀបចំគោលនយោបាយ។
តាមរយៈការបង្ហាញប្រព័ន្ធបច្ចេកវិទ្យា ឧបករណ៍ឌីជីថល និងគំរូអាជីវកម្មដែលអាចពង្រីកវិសាលភាពបាន យុទ្ធនាការនេះក៏មានគោលដៅបង្ហាញថា វិស័យបច្ចេកវិទ្យាកម្ពុជាមិនត្រឹមតែអាចឆ្លើយតបនឹងបញ្ហាប្រឈមក្នុងទីផ្សារក្នុងស្រុកប៉ុណ្ណោះទេ ប៉ុន្តែថែមទាំងមានសមត្ថភាពកាន់តែខ្លាំងឡើងក្នុងការប្រកួតប្រជែងនៅកម្រិតតំបន់។
បន្ទាប់ពីព្រឹត្តិការណ៍ដំបូងនេះ យុទ្ធនាការនឹងបន្តរៀបចំសកម្មភាពសំខាន់ៗក្នុងរយៈពេល៥ខែខាងមុខ រួមមាន Cambodia Data Trust Lab ដែលនឹងសិក្សាពីមជ្ឈមណ្ឌលទិន្នន័យក្នុងស្រុក និងហេដ្ឋារចនាសម្ព័ន្ធក្លោដ, My Digital Cambodia ដែលនឹងបង្ហាញឧបករណ៍ បច្ចេកវិទ្យា កម្មវិធី និងសេវាកម្មឌីជីថលប្រចាំថ្ងៃ, និង Cambodia Digital Sovereignty ដែលនឹងបើកកិច្ចសន្ទនារវាងរដ្ឋ និងវិស័យឯកជនស្តីពីក្របខ័ណ្ឌគោលនយោបាយសម្រាប់អនាគតឌីជីថលកម្ពុជា។
សកម្មភាពផ្សេងទៀតរួមមាន Cambodia Digital Talent Launchpad ដែលជាការប្រកួតប្រជែងសរសេរកូដផ្ទាល់ សម្រាប់សិស្ស និស្សិត និងអ្នកអភិវឌ្ឍន៍វ័យក្មេង និងពិព័រណ៍បទពិសោធន៍ «អនុភាពបច្ចេកវិទ្យាខ្មែរ» ដែលនឹងក្លាយជាព្រឹត្តិការណ៍បិទបញ្ចប់យុទ្ធនាការ ដើម្បីបូកសរុបសមិទ្ធផល រឿងរ៉ាវ និងរបកគំហើញថ្មីៗក្នុងរយៈពេល៦ខែ។
លោកស្រី Sarvinoz Nuritdinova អគ្គនាយិកា B2B Asia News បានថ្លែងក្នុងពិធីបិទថា ព្រឹត្តិការណ៍នេះបានបង្ហាញពីភាពរស់រវើកនៃអនាគតបច្ចេកវិទ្យាកម្ពុជា តាមរយៈសិក្ខាសាលា និងសកម្មភាពនៅតាមស្តង់ពិព័រណ៍ ខណៈប្រព័ន្ធអេកូឡូស៊ីបច្ចេកវិទ្យាកម្ពុជាកំពុងរីកចម្រើន មានការបង្កើតថ្មី និងត្រៀមខ្លួនសម្រាប់ការពង្រឹងឌីជីថលកម្ពុជា។
លោកស្រីបានប្រៀបធៀបយុទ្ធនាការនេះទៅនឹងការរត់ម៉ារ៉ាតុង ដោយសង្កត់ធ្ងន់ថា ព្រឹត្តិការណ៍ «ពន្លឿនការលូតលាស់បច្ចេកវិទ្យាកម្ពុជា» គ្រាន់តែជាជំហានដំបូងនៃដំណើររយៈពេល៦ខែ ក្នុងការបង្កើតកម្លាំងចលករថ្មីសម្រាប់ «អនុភាពបច្ចេកវិទ្យាខ្មែរ»។
ការរៀបចំព្រឹត្តិការណ៍នេះត្រូវបានគាំទ្រដោយភាគីពាក់ព័ន្ធក្នុងប្រព័ន្ធអេកូឡូស៊ីបច្ចេកវិទ្យា រួមមានក្រសួងប្រៃសណីយ៍ និងទូរគមនាគមន៍ មូលនិធិ ស.អ និងសហគ្រិនខ្មែរ ព្រមទាំងដៃគូទីតាំង Factory Phnom Penh វាគ្មិន និងក្រុមហ៊ុនដែលបានចូលរួមតាំងពិព័រណ៍ជាច្រើន។
B2B Asia News បានអំពាវនាវដល់ក្រសួង ស្ថាប័នវិស័យឯកជន ក្រុមហ៊ុនផ្តល់សេវាកម្មបច្ចេកវិទ្យា អ្នកគាំទ្រប្រព័ន្ធអេកូឡូស៊ី និងភាគីពាក់ព័ន្ធក្នុងវិស័យសារព័ត៌មាន ចូលរួមក្នុងយុទ្ធនាការ «អនុភាពបច្ចេកវិទ្យាខ្មែរ» ដើម្បីរួមចំណែកជំរុញការបង្កើតថ្មី និងការអភិវឌ្ឍសេដ្ឋកិច្ចឌីជីថលរបស់កម្ពុជា៕ អ៊ីមែល៖ sarvinoz@b2b-cambodia.com ឬលេខទូរស័ព្ទ(Telegram) +855 12 902 537
Account
Security
Favourite Content