សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មិនខុសពីតាមបណ្ដាខេត្តនោះទេ ចលនាភូមិមួយផលិតផលមួយ កំពុងកៀរគរប្រមូលផ្ដុំសហគ្រាសចំនួន ៥០មកជួបជុំគ្នានៅបរិវេណទីស្ដីការគណៈរដ្ឋមន្ដ្រី ដើម្បីបង្ហាញផលិតផលរបស់ខ្លួនផង និងដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរផងដែរ ដែលនឹងបារព្វនៅថ្ងៃទី០៨-០៩ ខែមេសា ឆ្នាំ២០២៥ ខាងមុខនេះ។
កម្មវិធីនេះនឹងប្រព្រឹត្តទៅនៅទីតាំងអាគារមិត្តភាព ក្នុងបរិវេណទីស្ដីការគណៈរដ្ឋមន្ត្រី ចាប់ពីម៉ោង ៨ព្រឹកដល់ ៥ល្ងាច ដោយមានការចូលរួមពីសំណាក់មន្ត្រីជាន់ខ្ពស់រាជរដ្ឋាភិបាល ជាមួយនឹងវត្តមានសហគ្រាសចម្រុះសរុបប្រមាណ ៥០ ខណៈដែលកាលពីឆ្នាំកន្លងទៅមានត្រឹមតែ ៣២ សហគ្រាសប៉ុណ្ណោះ។
ឯកឧត្តម បណ្ឌិត សួង ណយ អនុប្រធានគណៈកម្មាធិការជាតិជំរុញចលនាភូមិមួយផលិតផលមួយបានមានប្រសាសន៍ថា៖
«ឆ្នាំនេះយើងនឹងអញ្ជើញសហគ្រាសប្រមាណ ៥០-៦០ មកពីខេត្តនានា ដើម្បីឱ្យពួកគាត់យកផលិតផលមកតាំងបង្ហាញ និងលក់ឱ្យមន្ត្រីរាជការ ជាពិសេសអ្នកធ្វើគោលនយោបាយឱ្យដឹងថា ផលិតផលរបស់ខ្មែរមានអ្វីខ្លះ គុណភាណ សោភ័ណភាព និងតម្លៃកម្រិតណាខ្លះ ហើយក៏អាចដឹងថា គោលនយោបាយដើរដល់កម្រិតណាហើយ»។
ឯកឧត្តមបានបញ្ជាក់បន្ថែមថា ៖
«តាមរយៈកម្មវិធីនេះ យើងចង់បង្ហាញពីការយកចិត្តទុកដាក់របស់ថ្នាក់ដឹងនាំ ដែលអនុញ្ញាតឱ្យផលិតផលខ្មែរចូលរួមក្នុងការតាំងបង្ហាញនៅក្នុងឱកាសពិសេសៗ ដូចជាកម្មវិធីសូត្រមន្តចូលឆ្នាំប្រពៃណីជាតិជាដើម ដែលអាចផ្សារភ្ជាប់រវាងក្រុមអ្នកផលិត និងអ្នករៀបចំគោលនយោបាយ។ អ្នកដែលគួរតែត្រៀមខ្លួនសម្រាប់ឱកាសនេះគឺផ្នែកចំណីអាហារ និងគ្រឿងសម្លៀកបំពាក់ រួមមាន បន្លែ ផ្លែឈើ អាហារកែច្នៃ ភេសជ្ជៈ និងខាងក្រមា ហូលផាមួង ជាដើម ដែលបងប្អូនយើងត្រូវការប្រើប្រាស់នៅរដូវបុណ្យចូលឆ្នាំខ្មែរនេះ»។
ឆ្លៀតនៅក្នុងឱកាសនេះ ឯកឧត្តមបណ្ឌិត សួង ណយ បានលើកឡើងថា សម្រាប់នៅតាមបណ្ដាក្រសួង និងស្ថាប័នផ្សេងទៀតក៏គួរតែងាកមកគិតពីការបង្កើតឱ្យមានការដាក់តាំងបង្ហាញ និងលក់ផលិតផលខ្មែរនៅពេលមានបុណ្យទានផ្សេងៗ ដើម្បីឱ្យថ្នាក់ដឹងនាំ ក៏ដូចជាមន្ត្រីរាជការបានដឹង និងស្គាល់ពីផលិតផលខ្មែរឱ្យបានច្រើន ដែលរាល់ការគាំទ្ររបស់សាធារណៈជនទាំងអស់ គឺជាការចូលរួមចំណែកគាំទ្រ និងលើកកម្ពស់សេដ្ឋកិច្ចក្រុមអ្នកផលិតក្នុងស្រុកតាមតំបន់ អ្នកពាក់ព័ន្ធ ក៏ដូចជាសេដ្ឋកិច្ចជាតិទាំងមូលផងដែរ៕
Account
Security
Favourite Content