សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កំពង់ផែកំពត ឡូជីស្ទីក ដែលមានទីតាំងស្ថិតនៅក្នុងភូមិ ចង្អោន សង្កាត់ព្រែកត្នោត ក្រុងបូកគោ ខេត្តកំពត ត្រូវបានរាជរដ្ឋាភិបាលសម្រេចចេញអនុក្រឹត្យឱ្យបង្កើត និងអភិវឌ្ឍន៍ជាផ្លូវការ ដែលគម្រោងនេះមានផ្ទៃសរុបទាំងដែនទឹក និងដែកគោក ជាង១០លានម៉ែត្រការ៉េ។ នេះបើតាមអនុក្រឹត្យរបស់រាជរដ្ឋាភិបាលចុះហត្ថលេខាដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីចុងសប្ដាហ៍មុននេះ ។ ការបង្កើតកំពង់ផែនេះដែរ នឹងអាចជួយកម្ពុជាឱ្យកាន់តែមានភាពងាយស្រួលក្នុងការធ្វើពាណិជ្ជកម្មជាមួយប្រទេសនានាក្នុងតំបន់ និងលើពិភពលោក ។
បើតាមអនុក្រឹត្យដដែលនេះបានឱ្យដឹងថា កំពង់ផែកំពត ឡូជីស្ទីក ជាគម្រោងដែលអភិវឌ្ឍន៍ដោយក្រុមហ៊ុន កំពត ឡូជីស្ទីក អេន ផត ឯ.ក ។ គម្រោងនេះមានផ្ទៃដែនទឹកទំហំ៣,៦៨លានម៉ែត្រការ៉េ និងដែនដីគោកទំហំ ៦,៦២លានម៉ែត្រការ៉េ ។ កំពង់ផែនេះដែរ ត្រូវចាត់ទុកជាកម្មវត្ថុសម្រាប់ការគ្រប់គ្រង និងប្រើប្រាស់ដោយអង្គភាពគ្រប់គ្រងកំពង់ផែកំពតឡូជីស្ទីក ដែលរួមមាន ចំណតនាវា សញ្ញាជំនួយនាវាចរណ៍ កន្លែងបោះយុថ្កា កន្លែងបត់នាវា និងឋបមនីយភណ្ឌផ្សេងទៀត ដើម្បីធានាដល់ការថែរក្សាការពារសុវត្ថិភាព សន្តិសុខ និងបរិស្ថាន សម្រាប់ឱ្យនាវាចូល ចេញ បោះយុថ្កា លើកដាក់ ផ្ទេរ ផ្ទុក ទំនិញ និងប្រតិបត្តិការទាំងមូលនៃកំពង់ផែនេះ ។
ក្នុងអនុក្រឹត្យក៏បានបញ្ជាក់ផងដែរថា កំពង់ផែកំពត ឡូជីស្ទីក មានឋមបនីយភណ្ឌផែទំនិញ ដែលមានសមត្ថភាពផ្ដល់សេវាកម្មសម្រាប់ទំនិញឆ្លងកាត់ប្រមាណ ៣លានតោនក្នុងមួយឆ្នាំ ។
លោកឧកញ៉ា ស៊ិន ចន្ធី អគ្គនាយកក្រុមហ៊ុន LINEX Logistics Cambodia Co., Ltd បានមានប្រសាសន៍ប្រាប់បណ្ដាញព័ត៌មាន AMS ឱ្យដឹងថា ការធ្វើពាណិជ្ជកម្មជាមួយបណ្ដាប្រទេសក្នុងតំបន់ និងលើពិភពលោក គឺមានការទាក់ទងនឹងវិស័យឡូជីស្ទីក ហើយបើវិស័យឡូជីស្ទីកនៅកម្ពុជាមានការរីកចម្រើន នោះនឹងធ្វើឱ្យការធ្វើពាណិជ្ជកម្មរបស់កម្ពុជាជាមួយបណ្ដាប្រទេសនានាលើពិភពលោកក៏កាន់រីកចម្រើនផងដែរ ។
លោកឧកញ៉ាបន្តថា ថ្មីៗនេះ រាជរដ្ឋាភិបាលបានចេញអនុក្រឹត្យចំនួន២ ពាក់ព័ន្ធនឹងបង្កើតកំពង់ផែ ដោយមួយកន្លែងនៅខេត្តកំពត និងមួយកន្លែងទៀតនៅខេត្តកំពង់ឆ្នាំង ។ កំពង់ផែទាំងពីរនេះ សុទ្ធសឹងតែស្ថិតនៅតំបន់ដែលមានសក្ដានុពល ជាក់ស្ដែងកំពង់ឆ្នាំង ជាទីតាំងដែលមានសក្ដានុពលមួយក្នុងការផលិត ទាំងឧស្សាហកម្ម និងកសិ-ឧស្សាហកម្ម ហើយកំពត ក៏ជាតំបន់ដែលកំពុងតែទាក់ទាញលើវិស័យឧស្សាហកម្ម ដូច្នេះ ការសម្រេចចិត្តរបស់រាជរដ្ឋាភិបាលនឹងធ្វើឱ្យការធ្វើពាណិជ្ជកម្មអន្តរជាតិរបស់កម្ពុជាឈានទៅមុខមួយកម្រិតទៀត ។
លោក ឌឹត ចណ្ណា អគ្គនាយកក្រុមហ៊ុនអចលនទ្រព្យ ឡាក់គី បានមានប្រសាសន៍លើកឡើងថា ការបង្កើត ឬការវិនិយោគលើកំពង់ផែនៅខេត្តកំពតនេះ មិនត្រឹមតែធ្វើឱ្យមានតម្រូវការនៃការប្រើប្រាស់ដីនៅក្នុងគម្រោងកំពង់ផែនោះផ្ទាល់ទេ ប៉ុន្តែវានឹងធ្វើឱ្យការប្រើប្រាស់នៅជុំវិញកំពង់ផែនោះ ជាពិសេសតាមបណ្ដោយផ្លូវជាតិសំខាន់ៗ នៅក្នុងខេត្តកំពតក៏ដូចជាខេត្តជាប់គ្នានោះ ។
លោកបន្តថា នៅពេលបង្កើតកំពង់ផែ ប្រាកដណាស់ទំនិញដែលត្រូវចេញចូលកំពង់ផែ នឹងមិនអាចដាក់ក្នុងកំពង់ផែបានអស់ទេ ដូច្នេះត្រូវការទីតាំងសម្រាប់ស្តុកទុក ដូច្នេះហើយតម្រូវការដីសម្រាប់សាងសង់ឃ្លាំងស្តុកទំនិញនៅតាមបណ្ដោយផ្លូវសំខាន់ៗ ជាពិសេសផ្លូវជាតិលេខ៣ និងផ្លូវជាតិលេខ៤១ ដែលជាផ្លូវឆ្ពោះទៅកាន់ខេត្តកំពត ។
គួរបញ្ជាក់ថា រាជរដ្ឋាភិបាលបានកំណត់យកតំបន់ឆ្នេរជាគោលដៅនៃការអភិវឌ្ឍ ដោយរាជរដ្ឋាភិបាលបោះទុនវិនិយោគលើហេដ្ឋារចនាសម្ព័ន្ធក្នុងតំបន់ និងតភ្ជាប់ទៅកាន់តំបន់ផ្សេងទៀតទូទាំងប្រទេស ។ ជាលទ្ធផល ខេត្តព្រះសីហនុ ក៏ទទួលបានភាពទាក់ទាញក្នុងការវិនិយោគពីក្នុង និងក្រៅប្រទេស ។ ដោយឡែក ខេត្តកំពត ក៏កំពុងទទួលបានការវិនិយោគជាបន្តបន្ទាប់ ដោយមានគម្រោងបង្កើតតំបន់សេដ្ឋកិច្ចពិសេសចំនួន២ កំពុងដំណើរការវិនិយោគ ដែលនឹងអាចទាក់ទាញក្រុមហ៊ុនវិនិយោគចូលបន្ថែមជាច្រើនទៀត ៕
Account
Security
Favourite Content