សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការចិញ្ចឹមឃ្មុំតែមួយមុខ មិនត្រឹមតែទទួលបានទិន្នផលជាទឹកឃ្មុំមួយមុខនោះទេ គេក៏ទទួលបាននូវក្រមួនឃ្មុំ ពូជឃ្មុំ និងលំអងឃ្មុំដែលធ្លាក់ចេញពីជើងឃ្មុំមុនចូលសំបុកផ្ទាល់តែម្ដង។ លំអងឃ្មុំ ក៏មិនខុសពីផលិតផលពីឃ្មុំដទៃទៀតដែរ ដែលមានតម្លៃថ្លៃ និងមានគុណប្រយោជន៍ច្រើនចំពោះសុខភាពអ្នកទទួលទាន។
បើតាម លោក ហេង ប៊ុនណាល់ ម្ចាស់កសិដ្ឋានចិញ្ចឹមឃ្មុំ «បារាយណ៍ហាន់នី» ជានិស្សិតបញ្ចប់ការសិក្សាលើជំនាញវិទ្យាសាស្ត្រព្រៃឈើផ្ទាល់បានប្រាប់ AMS Economy ថា៖
«សម្រាប់ការចិញ្ចឹមឃ្មុំ យើងទទួលបានទិន្នផលដូចជាទឹកឃ្មុំ ទឹកដោះស្ដេចឃ្មុំ ពូជឃ្មុំ និងលំអងឃ្មុំជាគ្រប់ល្អិតៗ ដែលយើងទាក់ពីជើងឃ្មុំឱ្យជ្រុះនៅមុខធុង និងយកទៅហាលសម្ងួតដើម្បីក្លាយជាផលិតផលមួយដែលមានប្រយោជន៍ច្រើនចំពោះសុខភាព»។
លោកបន្ថែមថា ដើម្បីទទួលបានលំអងឃ្មុំ គេត្រូវមានឧបករណ៍ជាធ្នាក់ ដើម្បីទាក់យកលំអងពីជើងសត្វឃ្មុំ ដោយវាជារណាំងនៅពីមុខច្រកចេញចូល ដែលអនុញ្ញាតឱ្យឃ្មុំចូលបានតែខ្លួនប៉ុណ្ណោះ ឯលំអងធ្លាក់នៅខាងក្រៅ ហើយយើងអាចរកថាសមកត្រង។ ការទាក់យកលំអងនេះ គេធ្វើឡើងនៅពេលព្រឹក ពោលគឺពេលឃ្មុំចេញទៅក្រេបលំអងចន្លោះម៉ោង ៦-៨ព្រឹក ដោយនៅរដូវសម្បូរផ្កាគ គេអាចទទួលបានលំអងឃ្មុំ ១គីឡូក្រាមពីឃ្មុំ ៨-១០ធុង ក្នុងមួយព្រឹក។
ពាក់ព័ន្ធនឹងតម្លៃលំអងឃ្មុំមានតម្លៃ ២០-២៥ដុល្លារក្នុងមួយគីឡូក្រាម ដែលអតិថិជនភាគច្រើនជាអ្នកគិតគូរពីសុខភាព ពិសេសអ្នកនិយមទទួលទានរបស់ធម្មជាតិក្នុងស្រុក។ ចំណែកការប្រើប្រាស់វិញ គេអាចយកលំអងឃ្មុំទៅឆុងជាទឹកក្តៅអ៊ុនៗ លាយជាមួយម្ហូបអាហារ ឬភេសជ្ជៈដទៃ និងទទួលទានផ្ទាល់ក៏បាន ដើម្បីទទួលបានប្រសិទ្ធភាពកាន់តែខ្ពស់។
គួរបញ្ជាក់ដែរថា លំអងឃ្មុំមានអត្ថប្រយោជន៍ច្រើនចំពោះសុខភាពរួមមាន ជំនួយសុខភាពស្បែក សក់ ក្រចក ពង្រឹងប្រព័ន្ធការពាររាងកាយ ព្យាបលជំងឺក្រពះ ពោះវៀន និងបញ្ហាបន្ទោរបង់ ជំនួយចង្វាក់បេះដូង ជួយឱ្យចរន្តឈាមរត់បានល្អ ព្យាបាលជំងឺថប់ដង្ហើម ជំនួយដល់ការរំលាយអាហារ ការរំលាយជាតិខ្លាញ់លើស ជួយឱ្យរដូវមកទៀងទាត់សម្រាប់ស្ត្រី ព្យាបាលជំងឺស្ត្រេស បង្កើនថាមពល និងព្យាបាលជំងឺជាច្រើនមុខផ្សេងទៀត៕
Account
Security
Favourite Content