សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងចូលរួមជំរុញដល់ការរៀបចំដែនដីនៅក្នុងប្រទេសកម្ពុជាឱ្យកាន់តែលឿន និងមានភាពល្អប្រសើរ រដ្ឋាភិបាលប្រទេសជប៉ុន បានផ្ដល់ហិរញ្ញប្បទានដល់កម្ពុជាជាបន្តបន្ទាប់ ជាក់ស្ដែងនៅថ្ងៃទី ២៥ ខែមីនា ឆ្នាំ២០២៥ កន្លងទៅនេះ កម្ពុជា និងជប៉ុនបានចុះហត្ថលេខាលើលិខិតប្តូរសារ ស្ដីពីការផ្ដល់ហិរញ្ញប្បទានឥតសំណង ចំនួន ១៧,៦២លានដុល្លារអាមេរិក ក្នុងនោះទឹកប្រាក់ចំនួន ៦០០លានយ៉េន ឬប្រមាណ ៤,៣២លានដុល្លារអាមេរិកសម្រាប់គម្រោងបង្កើតស្ថានីយ៍វាស់វែងអចិន្ត្រៃយ៍ ដោយប្រព័ន្ធផ្កាយរណបនៅទូទាំងប្រទេសកម្ពុជា ។
កាលពីចុងឆ្នាំ២០២៤កន្លងទៅនេះដែរ ជប៉ុនក៏បានផ្ដល់ហិរញ្ញប្បទាន ៧,២លានដុល្លារអាមេរិកដល់កម្ពុជាដើម្បីជួយកម្ពុជាក្នុងការរៀបចំយុទ្ធសាស្ត្ររៀបចំផែនការទីក្រុង និងការគ្រប់គ្រងដីធ្លីជាអាទិភាពខ្ពស់ ។ ថវិកានេះ បានផ្ដល់ឱ្យក្រសួងរៀបចំដែនដី នគរូបនីយកម្ម និងសំណង់ នូវរូបភាពផ្កាយរណប ផែនទីស្បែក ទិន្នន័យផែនការទីក្រុង 3D និងថ្នាល់ទិន្នន័យភូមិសាស្ត្រជាដើម ។
ដោយឡែក កាលពីអំឡុងខែតុលាឆ្នាំ ២០២៣ ជប៉ុនក៏បានផ្ដល់ហិរញ្ញប្បទានឥតសំណងប្រមាណជិត១០លានដុល្លារអាមេរិក ( ៩,៧លាន) ដល់កម្ពុជា ដើម្បីគាំទ្រដល់ការអង្កេតវាស់វែង សុរិយោដី និងការចុះបញ្ជីដីធ្លី ។ ហិរញ្ញប្បទាននេះ ក៏ដើម្បីអនុវត្តគម្រោងសម្រាប់ការកសាងបណ្ដាញស្ថានីយវាស់វែងអចិន្ត្រៃយ៍ដោយផ្កាយរណបទូទាំងប្រទេស ដូចនឹងគម្រោងថវិកាដែលបានចុះហត្ថលេខាកាលពីថ្ងៃទី២៥ ខែមីនា ឆ្នាំ២០២៥នេះផងដែរ ដោយគោលបំណងនៃគម្រោងនេះ គឺដើម្បីពន្លឿនការអង្កេតវាស់វែង សុរិយោដី ព្រមទាំងពង្រឹងសេវារដ្ឋបាលពាក់ព័ន្ធនឹងការចុះបញ្ជីដីធ្លី តាមរយៈការដំឡើងស្ថានីយវាស់វែងអចិន្ត្រៃយ៍ ដោយផ្កាយរណប ដើម្បីរួមចំណែកដល់ការលើកកម្ពស់គម្រោងហេដ្ឋារចនាសម្ព័ន្ធនានា ។
ពាក់ព័ន្ធនឹងកិច្ចការងារចុះបញ្ជីដីធ្លីនៅក្នុងប្រទេសកម្ពុជា បើតាមផែនការរបស់ក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា នឹងបញ្ចប់ការវាស់វែងនៅក្នុងអំឡុងខែមេសា ឆ្នាំ២០២៥ខាងមុខនេះ ពោលគឺនៅមុនពិធីបុណ្យចូលឆ្នាំប្រពៃណីជាតិខ្មែរ ។ បន្ទាប់ពីការងារចុះវាស់វែងដីធ្លីចប់សព្វគ្រប់ ក្រុមការងាររបស់ក្រសួងនឹងពន្លឿនដល់ការចុះបញ្ជី ផ្សព្វផ្សាយឯកសារជាសាធារណ និងចេញបណ្ណជូនពលរដ្ឋឱ្យបានរួចរាល់ ។
គួរកត់សម្គាល់ថា ៖ បច្ចុប្បន្ននេះ ក្រុមការងាររបស់ក្រសួងរៀបចំដែនដី នគរូបនីយកម្ម និងសំណង់ នៅតាមបណ្ដាខេត្តមួយចំនួន ក៏បាន និងកំពុងផ្សព្វផ្សាយឯកសារសាធារណៈ និងចែកបណ្ណជូនពលរដ្ឋនៅតាមតំបន់ដែលបានចុះបញ្ជីរួចរាល់ និងទទួលបានការសាទរជាខ្លាំងពីសំណាក់ពលរដ្ឋម្ចាស់កម្មសិទ្ធិដីធ្លី ដែលកន្លងមកមានតែដី ប៉ុន្តែមិនមានឯកសារបញ្ជាក់ពីកម្មសិទ្ធិដីរបស់ខ្លួននោះឡើយ ៕
Account
Security
Favourite Content