សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ទា ជាប្រភេទសត្វស្លាបក្នុងស្រុកមួយដែលប្រជាពលរដ្ឋ ក៏ដូចជាកសិករនិយមចិញ្ចឹមដោយសារវាអាចឱ្យផលលឿន បានទាំងសាច់ និងយកពង ខណៈដែលតម្រូវការទីផ្សារមានវិសាលភាពធំទូលាយ និងមានតម្លៃសមរម្យ។ ជាការចែករំលែក ថ្ងៃនេះ យើងសូមបង្ហាញពីបច្ចេកទេសខ្លះៗក្នុងការចិញ្ចឹមទា ដែលអាចទទួលបានផលខ្ពស់ និងចំណាយពេលខ្លី។
សម្រាប់បច្ចេកទេសក្នុងការចិញ្ចឹមទា អ្នកចិញ្ចឹមត្រូវយកចិត្តទុកដាក់លើកត្តាសំខាន់ៗចំនួន ៥ រួមមាន ការរើសពូជ ការធ្វើទ្រុង ការឱ្យចំណី ការថែទាំ និងជំងឺ។ ចំពោះការរើសពូជទាមេពង ត្រូវរើសយកមេណាដែលរហ័សធំ កូនទាតូចដកកវែង រោមភ្លឺថ្លា ក្បាលតូជ គូទធ្លាក់ ពូកែរកស៊ី ជម្រុះស្លាបរហ័ស។ ចំណែកទាយកសាច់ ត្រូវយកប្រភេទទាឈ្មោល ឬទាអត់ពងតែម្ដងទើបចិញ្ចឹមឆាប់ធំលឿន។
ចំពោះការធ្វើទ្រុង គេត្រូវបែងចែកផ្សេងៗគ្នាដោយទ្រុងចិញ្ចឹមកូនទា ទ្រុងមេទាពង និងទ្រុងទាយកសាច់។ ទ្រុងចិញ្ចឹមកូនទា គេត្រូវសង់លើដីទួល ជាដីខ្សាច់ បែរចំព្រះអាទិត្យរះ ដំបូលចល័ត ក្រាលអង្កាមមិនឱ្យមានសំណើម ដោយរុំព័ទ្ធលួសសំណាញ់ ឬបន្ទះឫស្សីស្ដើងៗពេលយប់ត្រូវដាក់ភ្លើង ឬអំពូលម៉ែត្រ ហើយត្រូវបំបែកកូនទាជាក្រុមៗពី ១០០-១៥០ក្បាល។
សម្រាប់ទ្រុងចិញ្ចឹមមេទាយកពង ពេលថ្ងៃត្រូវដាក់ក្រោមម្លប់ឈើ ហុំព័ទ្ធដោយបន្ទះឫស្សី ឬស្បៃមុង និងស្ថិតនៅក្បែរមាត់ទឹក ឯពេលយប់ដាក់ក្នុងរោងដើម្បីការពារពីមហន្តរាយគ្រប់យ៉ាង ដោយដាក់ទា ១០០ក្បាលសម្រាប់ផ្ទៃដី ២៤ម៉ែត្រការេឡើងទៅ។ រីឯទ្រុងទាយកសាច់ ក៏ធ្វើដូចទ្រុងទាំងពីរខាងលើដែរ តែពេលទាអាយុ ៣០-៣៥ថ្ងៃ ត្រូវដាក់ក្រោមម្លប់ឈើនៅពេលថ្ងៃ ឯពេលយប់អាចដាក់នៅទីវាល ពិសេសកន្លែងណាដែលមានសុវត្ថិភាព។
ពាក់ព័ន្ធនឹងការឱ្យចំណីវិញ កូនទាអាយុ ១-៣ថ្ងៃត្រូវឱ្យជាអង្ករ ឬគ្រាប់ពោតកិនរួចស្ងោរឱ្យឆ្អិន ចាក់ទឹកលាយឱ្យខាប់ច្របាច់ឱ្យសព្វទុកឱ្យត្រជាក់ទើបឱ្យទាស៊ី ៤ដងក្នុងមួយថ្ងៃ ហើយទឹកសម្រាប់ផឹកត្រូវប្រើទឹកស្អាត ឬយកទឹក៥០-៦០លីត្រលាយជាមួយស្លឹកខ្ទឹមបុក ១គីឡូក្រាម។ សម្រាប់ទាយកពង ចំណីអាចជាសាច់ ម្សៅ និងរុក្ខជាតិ រួមមាន ខ្យង ក្ដាម កូនត្រី កំពិស ឈ្លើង ជន្លេន ស្រូវ ពោត មើមថ្លុង ស្លឹកស្មៅ ស្លែ សារាយ។ ឯទាសាច់មានអាយុត្រឹម ១-៣០ថ្ងៃឱ្យស៊ីដូចទាទូទៅដែរ តែនៅពេលទាអាយុលើសពី ៣០ថ្ងៃទៅ គេត្រូវឃ្វាលជាហ្វូងឱ្យស៊ីនៅតាមវាលស្រែ។
ទាក់ទងនឹងការថែទាំកូនទាត្រូវការកម្ដៅ និងពន្លឺគ្រប់គ្រាន់ ហើយត្រូវចែកជាក្រុមៗកុំឱ្យជាន់គ្នាងាប់ ឬក្រិន។ ចំណែកទាយកពង មិនត្រូវដេញឡើងចំណោតខ្ពស់ពេក ចៀសវាងចិញ្ចឹមកន្លែងអ៊ូអរ សម្លេងខ្លាំង ចិញ្ចឹមនៅដីភក់ ឬដីបែកក្រហែង ពិសេសការពារពីសត្វយាយីដូចជាសត្វឆ្កែជាដើម។ ដោយឡែក ទាយកសាច់ក៏ត្រូវការការថែទាំដូចជាទាយកពងដែរ ដោយរយៈពេលលក់គឺ ២ខែ មានទម្ងន់ ១.២-១.៥គីឡូក្រាម។
ទន្ទឹមគ្នានេះដែរ បញ្ហាដែលគេជួបប្រទះភាគច្រើនគឺការបាត់ទាក្នុងហ្វូង ពិសេសការបាញ់ថ្នាំពុល ឬថ្នាំសម្លាប់សត្វល្អិតលើដំណាំស្រូវដែលអាចប៉ះពាល់ដល់ទា ប៉ុន្តែគេអាចការពារបានតាមរយៈការប្រើវល្លិ៍បណ្ដូលពេជ្រ សំបកគរ និងគល់ស្លឹកគ្រៃ ឯការព្យាបាលអាស្រ័យទៅតាមប្រភេទជំងឺ៕
Account
Security
Favourite Content