ក្រូចថ្លុង ជាប្រភេទក្រូចម្យ៉ាងដែលមានទ្រង់ទ្រាយធំជាងផ្លូចទូទៅ មានរសជាតិឆ្ងាញ់ ជូរអែម ដែលគេអាចទទួលទានដោយផ្ទាល់ ឬយកច្នៃធ្វើជាម្ហូបអាហារក៏បាន និងមានភាពពេញនិយមច្រើន ប៉ុន្តែសម្រាប់ការដាំដុះដំណាំប្រភេទនេះអាចនឹងជួបបញ្ហាមួយចំនួន ដោយសារកត្តាប្រែប្រួលអាកាសធាតុដែលអាចធ្វើឱ្យទិន្នផលថយចុះ ផ្លែមានទំហំតូច ក្រូចមិនសូវមានទឹកដមជាដើម។ ហេតុនេះ ទើបអ្នកជំនាញកសិកម្មបានចងក្រងពីបច្ចេកទេសដាំក្រូចថ្លុងដែលអាចធន់នឹងបម្រែបម្រួលអាកាសធាតុ ហើយអាចកាត់បន្ថយការខាតបង់នានាទាំងថវិកា និងពេលវេលា។

ជាជំហានដំបូង មុននឹងធ្វើការដាំដុះ គឺការជ្រើសរើសពូជដែលកសិករគួររើសពូជណាដែលគេនិយមដាំ ជាពូជធន់ទ្រាំនឹងអាកាសធាតុ ធន់នឹងសត្វល្អិត ធន់ជំងឺ និងជាពូជដែលអាចឱ្យផលលឿន។ ចំណែកការជ្រើសរើសដើម គេត្រូវរើសយកដើមណាដែលត្រង់ល្អ ជាដើមដែលថ្លោស ទើបជាដើមដែលមានសុខភាពល្អ និងឆាប់លូតលាស់។ បន្ទាប់ពីរើសពូជហើយ កសិករអាចរៀបចំដីសម្រាប់ដាំ ដោយត្រូវភ្ជួររាស់ដី ២ទៅ៣ដង ដើម្បីរាស់យកស្មៅចេញឱ្យស្អាត បន្ទាប់មកទុកដីហាលចោលប្រមាណ ៥ថ្ងៃសិន។ សម្រាប់ការដាំ គេត្រូវដាំចម្ងាយពីគុម្ពមួយទៅគុម្ពមួយ ៥ x ៥ម៉ែត្រ ដោយកាប់រណ្ដៅជម្រៅ ០.៥ x ០.៥ តឹក។

សម្រាប់រណ្ដៅក្រូចថ្លុង គេត្រូវបន្ថែមជីកំប៉ុស ហើយច្របល់ជាមូយដីនៅបាតរណ្ដៅឱ្យសព្វល្អរួចដាក់ដាំ ដែលការធ្វើបែបនេះដើម្បីបង្កើនជីជាតិដី ធ្វើឱ្យដីធូរ បង្កើនសត្វល្អិតមានប្រយោជន៍ក្នុងដី ជំរុញការលូតលាស់រុក្ខជាតិ និងកាត់បន្ថយសត្វចង្រៃ។​ យកចំបើង ឬស្លឹកឈើងាប់ៗ គ្របពីលើគល់ក្រូចថ្លុងដើម្បីរក្សាសំណើមឱ្យបានល្អធ្វើឱ្យដើមរុក្ខជាតិអាចបន្សាំទៅនឹងភាពរាំងស្ងួតនៅពេលមានបម្រែបម្រួលអាកាសធាតុ។

ចំពោះការថែទាំវិញ គេត្រូវបោចសម្អាតស្មៅ បន្ទាប់ពីដាក់ដាំក្រូចថ្លុងបាន ២-៣ខែ ហើយដាក់ជីបំប៉នរៀងរាល់ ៣ខែម្ដង ដោយប្រើជីប្រភេទ ១៥-១៥-១៥ និង ១៦-១៦-១៦។ បន្ថែមជីគីមី ក្នុង១គុម្ព ៥០ក្រាម ដោយដាក់ជុំវិញគល់ គម្លាត ១តឹក ពីគល់ក្រូចថ្លុង។ ចំណែកផ្នែកគល់រុក្ខជាតិនេះដែរ គេត្រូវលុបដីពីលើ និងយកស្លឹកឈើងាប់ៗមកលប់បន្ថែមដើម្បីរក្សាសំណើមឱ្យបានល្អ។

ថែមលើនេះ ការគ្រប់គ្រងជីជាតិក្នុងចំការក្រូចថ្លុង កសិករអាចដាំដំណាំគម្របដីដូចជាពពួកសណ្ដែកដែលមិនប៉ះពាល់ឫសរបស់ក្រូចថ្លុង និងសម្អាតស្មៅជាប្រចាំ ហើយទុកស្មៅ និងស្លឹកក្រូចថ្លុងដែលជ្រុះនៅក្បែរគល់។ ដាក់ជីកំប៉ុស្តិ៍ ជីអាចម៍ជន្លេន កម្ទេចកម្ទីស្លឹករុក្ខជាតិពុកផុយ។ ទាក់ទងនឹងការស្រោចស្រប់វិញ កសិករអាចជ្រើសរើសប្រព័ន្ធដំណក់ទឹក ឬហៅថា ទ្រីប ដែលមានប្រសិទ្ធភាពខ្ពស់ និងសន្សំសំចៃទឹក។ ក្រៅពីនេះ កសិករអាចប្រមូលផលបានក្រោយការដាំដុះ ១៨-២០ខែ ដោយគេអាចប្រមូលផលបាន ២ដងក្នុង១ឆ្នាំ ចាប់ពីខែមិនា ដល់ខែមេសា ហើយកសិករត្រូវទុកដាក់ផ្លែក្រូចដែលបេះហើយនៅកន្លែងម្លប់ ទើបមិនធ្វើឱ្យក្រូចខូចសោភ័ណភាព និងរសជាតិ៕